தொண்டையில தூண்டி முள்ளு!

Image

அடுக்குமா மவராசா

அன்னாடம் குடிச்சுப்புட்டு

எடக்கு  பண்ணுறயே

எழவு எடுக்குறயே

டாஸ்மாக்கு போதையிலே

டவுசர் கிழிஞ்சிடுச்சி

கோஸ் அழுகிப் போனதுபோல்

குடும்பம் அழிஞ்சிடுச்சி

மவுஸ் நெறஞ்ச பெருவாழ்க்கை

மதுவால தாழ்ந்தாச்சே

பியூஸ் போன பல்பாச்சே

பிணம் விட்ட மூச்சாச்சே

மாடத்துல வச்ச காசு

மாலையிலே காணலியே

பாடையிலே போறவனே

பசியாத்தத்  தோணலியே

நான் வடிச்ச கண்ணீரு

நாய் வடிச்ச கண்ணீரா

பேய் புடிச்ச சாராயம்

பேதியிலே போகாதா

ஒருடம்ளர் சாராயம்

ஊத்திக்கிட்டு வந்தாக்கா

தெருவே நடுங்குதையா

திருவாயும் நாறுதையா

வீட்டுக்குக் கேடுன்னு

விளம்பரத்தில் எழுதிவச்சி

நாட்டுச் சரக்குகளோ

நாட்டுடைமை ஆனதென்ன

குடிகாரன் பொஞ்சாதி

கூப்பாடு கேக்கலையா

குடிகாரன் கேக்கவில்ல…

குடியரசு கேக்காதா..?

– வெள்ளச்சி

புதிய சமையலறை

Image

உப்பும் சர்க்கரையும் உள்ள 

பழைய என் சமையலறைதான் 

எனினும்…

சாத்தியங்களை  மீறும் 

புதிய சமையலறை!

இப்போதும் நான்தான் சமைத்துக்கொண்டிருக்கிறேன் 

இனி… 

புதிய சமையல்!

 ******

Image

கத்தரிக்காய் எனது சகோதரி 

அதுவும் 

கொண்டை வைத்திருக்கிறதே…

******

Image

எந்த கிளி 

பட்டினி கிடக்கிறதோ…

கோவைக்காய் 

******

Image 

ஒவ்வொரு நாளும் இந்த உலகத்தை 

வெட்டிச் சமைக்கிறேன் 

முட்டை கோஸ் 

******

Image

எப்போது கேட்கும் 

சமையலறைக்குள் 

ஆண்களின் சத்தம்? 

******

Image

விரல்களின் விஸ்வரூபம் கோலம் 

எப்போது உணர்வாய் 

உனது விஸ்வரூபமே உலகம்!

– ஆதி பெருந்தேவி

Image Courtesy:

http://www.myshutterspace.com

http://www.indiamart.com/

http://pettagum.blogspot.in

http://www.dosomething.org 

எந்திர வாசல்

Image

ஒரு பெண்தான்  

வேட்டையைத் தொடங்கிவைத்தவள் 

தன் பிள்ளைகளுக்காக. 

 

குரங்கிலிருந்து மனிதன் தோன்றிய காலத்தை 

எட்டிப்பார்க்கட்டும் இதயம் உள்ள எல்லோரும் 

தெறிக்கும் உண்மை. 

 

இது பட்டாக்கத்தியுடன் அலையும் 

ரவுடி அறியாத ராகுல ரகசியம்*

அதனால்தான் இன்றும்…

தாய்க்கோழி தன்  சிறகுகளைப்  

பட்டாக் கத்திகளாய்ப் படபடத்து விரிக்க   

குஞ்சுகளைக் கொத்தவரும் பருந்து

பயந்து திரும்பும். 

 

கல்வியும் கருணையும் கவிதையும் 

கைவிடப்பட்ட உலகில் 

துயரங்கள் பெருக அலைகின்றன துன்மார்கங்கள். 

 

இதயங்கள் புறக்கணித்து 

எந்திரங்களில் வழியும் பணத்தாள்களில் 

சமூகத்தின் சவக் களை. 

 

இதயம் பொருத்தப்படாத ஏடிஎம் எந்திரம் 

நிகழ்ந்ததைப் பார்த்து  நினைவிழக்க…

சுயபார்வையற்ற கேமரா 

தன் ஒற்றைக் கண்ணால் 

உதிரம் அதிரும் காட்சிகளை 

உள்விழுங்கத் திணற…

கத்தி பார்த்து உயிர் உறைய 

சரிந்து சாய்கிறாள் பெண் ஒருத்தி. 

 

வழியும் குருதி வழித்தெறிந்து 

சாவகாசமாய்த் துணியில் துடைத்து 

கத்தியைப் பையில் திணித்து 

குற்ற உணர்ச்சியற்று வெளியேறுகிறான் 

கொலையாளி. 

 

பிள்ளைகளின் பசித்தீ தணிக்க 

ஆயுதக் கல்லோடு புறப்பட்ட 

நம் அன்னையின் சொரூபத்தை அறிவதில்லை 

போக்கிரி ஒருத்தனின் 

விலங்கறுக்கும் வேட்டைக்கத்தி. 

 

மரத்துப்போன பிழைமனிதன் பார்த்து 

எழுந்தோட நினைக்கும் ஏடிஎம் எந்திரம்…

ஷட்டரை சாத்தி விட்டுப்போனான் 

சாகசப் போக்கிரி! 

– நா.வே.அருள் 

 

*ராகுல ரகசியம் – ஆதியில்  ஒரு  பெண்தான் சமூகத்தை வழி நடத்தியவள் என்றும், வேட்டைச் சமூகத்தில் பெண்தான் தலைவியாய்த் திகழ்ந்திருக்கிறாள் என்பதை ராகுல சாங்கிருத்தியாயன் எழுதிய “வால்காவிலிருந்து கங்கை வரை” நூல் மூலம் அறிகிறோம்.

Image Courtesy: http://www.kvartha.com/

குழந்தை

Image

குழந்தையின் தளர் நடையை இறைஞ்சிப்பெறவே 

நடன தேவதை தவங்கிடக்கிறாள்.

 

குழந்தையின் மழலை மொழியின்முன் 

இசையின் சாம்ராஜ்யமே மண்டியிடுகிறது.

 

குழந்தைக்குத் தெரிந்திருக்கிறது 

பந்தினைப் பூமியுருண்டையாக்கவும் 

பூமியுருண்டையைப் பந்தாக்கவும்.

 

நிலாவைக் காட்டிச் சோறூட்டிவிட்டதாக 

சாமர்த்தியம் பேசுகிறோம் 

குழந்தை 

நிலாவை உண்டுவிட்டதை 

அறியாத நாம்.

 

விரட்டியடிக்கப்பட்டு அகதிகளாகிப்போன 

வனதேவதையும் கடல் கன்னியும் ஆகாய ராஜனும் 

குழந்தைகளைத் தேடிக்கொண்டிருக்கிறார்கள் 

குழந்தைகள் கட்டிய மணல்வீடு முகாம்களில் 

குடியிருக்க.

 

பெரியவர்கள் 

இதயத்தைப் பொம்மையாய் வைத்திருக்கிறார்கள் 

குழந்தைகளோ 

பொம்மைக்கும் இதயத்தைப் பொருத்திவிடுகிறார்கள்.

 

பெரியவர்களிடம் 

அடம்பிடித்து அழுதுவாங்க 

குழந்தைகளுக்கு ஏராளமானவை இருக்கின்றன 

பலூன்கள்…சாக்லேட்டுகள்…

ஐஸ் கிரீம்…பொம்மைகள்…

குழந்தைகளிடம் யாசிக்க 

பெரியவர்களுக்கு 

ஒன்றே ஒன்றுதான் இருக்கிறது…

“மனசு”

– நா.வே.அருள்

Image Courtesy: http://edfromct.files.wordpress.com

சின்னச் சின்ன கவிதைகள்!

Image

நம்பிக்கை 

செடி முழுக்க 

சிலுத்துக்கிட்டு குத்தும் முட்கள் 

உச்சாங்கொண்டையில் 

ஒற்றைப் பூ 

 யாரும் 

முள் செடின்னு சொல்லுறதில்ல 

ரோஜா செடின்னு சொல்லுறோம்.

Image

முதுமை 

ஒரு விதையாக இருந்த மரணம் 

செடியாகி 

மரமாகி 

தோப்பாகி 

காடாகி 

கவிந்துவிடுகிறது 

Image

எத்தனையோ கவிதைகளை எழுதியிருந்தாலும் 

எனக்காக எழுதப்பட்ட ஒரே கவிதை 

நீ!

Image

ஒரு ஜன்னல் போதும் 

எவர் தடுக்க முடியும் 

எனக்கான பிரபஞ்சம். 

Image

குங்குமம் உசத்திதான் 

நெற்றிதான் மலிவாக இருக்கிறது 

விலைவாசி

Image

அனுப்பியவற்றையெல்லாம் 

கிழித்தெறிந்து விடுகிறாய் 

சிறகுகளையும்தான்….

Image

வெளிச்சத்தைவிட 

இருட்டுக்கு வலிமை அதிகம் 

உன் நிழலையே விழுங்கிவிடுகிறது..!

Image

எனது இறப்பு எவ்வளவு நிச்சயமானதோ 

அவ்வளவு நிச்சயம் 

எனது இறப்பின்மையும்!

Image

காண விருப்பம் 

அதிகாலைச் செய்தியில் 

காயம் படாத இரவுகள்…

– நா.வே.அருள்

Image Courtesy:

http://www.thegardencentral.com

http://www.theatlantic.com

http://www.inspirefirst.com

http://homeguides.sfgate.com

http://bakingwithdynamite.blogspot.in/

http://mysteriousuniverse.org

http://www.zmescience.com

http://thenextweb.com/

அம்முக்குட்டியின் தீபாவளி!

Image

அம்முக்குட்டியின் உள்ளங்கையைவிட 

அழகான மலரொன்றைக் கண்டதேயில்லை இந்தக் 

கவினுலகில்…

அவள் விரல்நகங்களில் அழுக்காய்க் கிடந்திடும் 

ஆசைக்கனவில் 

ஆலயத்தில் தவங்கிடப்பான் ஆண்டவன். 

அம்முக்குட்டியின் ஒற்றைச் சிரிப்புக்கு ஈடாவதில்லை 

சரவெடிகளின் தொணதொணக்கும் தொடர் ஒலிகள். 

பம்பரமாய்ச் சுற்றும் அம்முக்குட்டியின் 

குவிந்த குடைக் குட்டைப்பாவாடைக்கு ஈடாகுமா 

கவிழ்ந்த மலையென 

கலர்க்கலராய் ஊற்றெடுக்கும் பூச்சாடியின்  ஒளியருவி! 

ஒருவிரல் நீட்டி உத்தரவு போடும் அம்முக்குட்டியின்

சுட்டுவிரலில் சூடுபட்டு உடல் தளர்ந்து தொங்கும் 

சடபடவென சரசரக்கும் சாட்டை. 

கம்பிமத்தாப்பைக் கையில் பிடித்தபடி 

அகன்றும் சுருங்கியும் ஆர்ப்பரிக்கின்ற  அவளது 

விழிமத்தாப்புகளை விட ஒளிசிந்த 

வேறேது உலகத்தில்?

சிவகாசியில்

தன் கையில் திணிக்கப்பட்ட உளுந்து வடையின்  

வெண்மருந்தீயத்தை 

ஊதி விலக்கும் உத்தியறியாமல் விழித்துக்கொண்டிருப்பாள் 

சுட்டவடை தின்னும் சுடர்க்கொடி அம்முக்குட்டி. 

ஆனாலும்…

ஒவ்வொரு ஊரிலும் ஒளி விழா நிகழ்த்தி 

தன் திண்ணைக்கு வந்த தீபாவளிக்கு 

ஓர் அகல்விளக்கேற்றி அமுது படைத்துவிடுகிறாள் 

அழகிய நம் அம்முக்குட்டி. 

– நா.வே.அருள்

உண்மை கசக்கும்

Image

ஆம்

அது இப்படித்தான் இருக்கிறது

இறந்து விடுவதை விட

வாழ்ந்து விடலாம் போல

பாடை, மூங்கில்

பூக்கள், விறகு

பானை, புதுத்துணி

சுடுகாட்டுக் கட்டணம்

இத்யாதி, இத்யாதி

இதுவெல்லாம் முடிந்தாலும்

அடுத்தநாள் பாலுக்கு…

பதினாறாம் நாள்

காசு, பணம்,  துட்டு, மணி

இறந்துபோகவில்லையே என்று

நினைக்கவைக்கும்

ஏராளமான செலவுகள்

ஒரு வகையில் –

உயிரோடு இருப்பதைவிட

செத்துப்போனால்தான்

செலவுகள் அதிகம்!

இறந்தவன் தப்பித்துக்கொள்ள

இருக்கிறவர்கள் மாட்டிக்கொள்கிறார்கள்

ஆம்

அது அப்படித்தான் இருக்கிறது!

– நா.வே.அருள்

என் உயிர்த் தோழி!

Image

அருமைத் தோழி!

அழகான தோழி!

அன்பான தோழி!

என் செல்லத் தோழியே!

 

தையல் ‘இயந்திரம்’ என்கிறார்கள் உன்னை!

அதில் எனக்கு உடன்பாடில்லை.

நீயும்

என்னைப் போல்

‘தையல்’.

அயராது உழைக்கும்

உழைப்பாளி!

 

கஷ்டத்திலும் நஷ்டத்திலும்

இன்பத்திலும் துன்பத்திலும்

இணை பிரியாத தோழி!

இதயத்தை நிறைத்தவள்!

என் எண்ணம்…

என் உயிர் நீ!

உன்னை உருவாக்கியவன்

புண்ணியவான்.

உன்னை அறிமுகப்படுத்திய ‘தனம்மாள்’

புண்ணியவதி.

 

நீயின்றி நானில்லை

அறிவார்கள் என் குழந்தைகள்…

அயல் தேசத்திலும்

நாம் பிரியவில்லை

எனக்கு ஒரு ‘பிரதரை’

பரிசளித்தார்கள்.

 

சமயத்தில் சந்தேகம்…

உன்னுடன் நான் இருக்கிறேனா?

என்னுடன் நீ இருக்கிறாயா?

 

பொறுமையும் பெருமையும்

எனக்கு வந்து சேர்ந்தது

உன்னால்தான்.

நன்றி சொல்வதற்கு

நான் செய்வதெல்லாம்

ஒன்றுதான்…

உன்னைத் தொட்டு

வணங்கிய பிறகே

ஒவ்வொரு தினமும்

வேலையைத் தொடங்குகிறேன்.

 

அழகுப் பதுமை நீ!

செய்வதெல்லாம் புதுமை!

இந்த உலகும்

அதில் மனிதர்களும்

இருக்கும் வரை

உன் சேவை தொடரும்.

என் பங்காக

இறுதி மூச்சு உள்ளவரை

உன்னை இயக்கிக் கொண்டிருப்பேன்.

 

உன்னோடு இணைந்து

ஐம்பது ஆண்டுகளுக்கு

மேல் ஆகிவிட்டன.

உன் உதவியால்

அழகிய ஆடைகள்

ஆயிரக்கணக்கில்

தைத்துவிட்டேன்.

ஆனாலும் ஆசை அடங்கவில்லை.

கடவுள் என் முன் தோன்றி

‘என்ன வரம் வேண்டும்?’

என்றால் ஒன்று கேட்பேன்…

‘இறைவா…

பத்தாண்டுகளைப் பின்னோக்கி தா!

தோழியோடு இன்னும் உறவாட வேண்டும்!’

– லெஷ்மி குஞ்சரம்

(ஐம்பது ஆண்டுகளுக்கு மேலாக நான் தையல் தைப்பதை ஒரு பொழுது போக்காகவே மேற்கொண்டு தினந்தோறும் செய்து வருகின்றேன். ஆத்மார்த்தமான அமைதியையும் மகிழ்ச்சியான உணர்வையும் ஏற்படுத்துவதால், தையல் இயந்திரத்தை எனது தோழியாக என்பதை விட ‘உயிர்த் தோழி’யாகக் கருதுகிறேன்.)

Photo Courtesy: http://www.goldcanyonembroidery.com

***

இரு கவிதைகள்

Image

நல்வரவு 

இப்போதெல்லாம்

வீட்டுக்கு வருபவர்களிடம்

அன்யோன்யமும்  சகஜமும் காட்டிட

அநேகமாய் ஒன்றுமில்லை

ஒவ்வொரு வீட்டின் முகப்புச் சுவரிலோ

வாசல் இரும்புக் கிராதியிலோ

தொங்கும்

“நாய்கள் ஜாக்கிரதை”

***

 Image

 கூடைச்சிம்மாசனம்

குருத்தோலை மணிமகுடம்

பானைக்குள் பவனிவரும்

பதநீர் இளவரசி !

அதுசரி …..

கள்ளில் சுண்ணாம்பு கலந்து

பதநீரானது

மனதில் எதைக் கலந்து

மனிதனாவது..?

– நா.வே.அருள் 

Photo Credit: http://chittarkottai.com and http://commons.wikimedia.org/

குறுங்கவிதைகள்!

Image

பள்ளிக்கூட வாசலில்

நீ…ண்ட வரிசையில் நின்று

எனக்காக ஓரிடம்

வாங்கினீர்கள்

என் குழந்தை மனதைப்

புதைப்பதற்கு.

***

Image

குருவிகளுக்காக

நாவல் மரம் வைத்தேன்.

பழுக்கும் காலம் வரை

இருக்குமோ

குருவிகள்?

***

Image

ஆயுத பூசை!

ஏருக்கும் கலப்பைக்கும்

சந்தனம் வை

குங்குமம் வை.

அப்படியே தூக்கிப்

பரணில் வை.

***

Image

நன்றி

ஒருவர்க்குச் செய்தக்கால்

அந்நன்றி

என்று தருங்கொல்

என வேண்டா

நின்று தளரா

வளர் தெங்கு

தாளுண்ட நீரை

இருபத்தைந்து ரூபாய்

விலையாலே

தான் தருதலால்.

***

– செ.ப.வீரத்திருக்குமரன்