அடுப்புகள்… சில நினைவுகள்!

சில நாட்களுக்கு முன் ‘குங்குமம் தோழி’ இதழில் தீபா நாகராணி சமையல் செய்யும் அடுப்பு, ஸ்டவ் பற்றி விரிவாக எழுதி இருந்தார். மிக அருமையான பதிவு அது. பல மலரும் நினைவுகளைக் கிளறி விட்டுவிட்டது அந்தக் கட்டுரை. இத்தனை வருட வாழ்வனுபவத்தில் ஒவ்வொரு நாளும் ஏதோ ஒரு விதத்தில் அடுப்புடனான உறவு தொடர்ந்து வந்திருக்கிறது என்று நினைப்பதே சுகமாக இருக்கிறது. சமையலறையில் புழங்கிய ஒவ்வொரு அடுப்பும் கண்முன் நிழலாடுகிறது.

விறகு அடுப்போடு ‘டாலி’ எனும் அடுப்பையும் உபயோகிப்பார் எனது அம்மா. தங்க வேலை செய்யும் ஆச்சாரிகள் இது போன்ற அடுப்பைத்தான் பயன்படுத்துவார்கள். அது, மூன்று குமிழ் வைத்த சட்டி போலிருக்கும். அதன் அடியில் ஜன்னல் போல மூன்று கண் ஓட்டை இருக்கும். அட்டாச்மென்ட்டாக அடியில் ஒரு சட்டி மாதிரி இருக்கும். நெருப்பு சாம்பல் பூத்தால், தட்டினால் அது அந்த ஓட்டை வழியாகக் கீழே விழுந்து விடும். விறகை எரிக்கும்போது நெருப்பை எடுத்து நீர் ஊற்றி வைப்பார்கள். அந்த கரி டாலி அடுப்புக்கு உபயோகமாகும். மெலிதான தீயில் பருப்பு வேக வைக்கலாம்… பால் காய்ச்சலாம். இப்படி நம் தலைமுறையிலேயே எத்தனையோ விதமான அடுப்புகளை நாம் உபயோகித்திருக்கிறோம்.

சமீபத்தில் அமெரிக்காவிலுள்ள என் மகள் வீட்டுக்குச் சென்றிருந்தேன். ஒருநாள் கொழுக்கட்டை செய்யலாமே என்ற எண்ணம் வந்தது. எங்கள் வீட்டில் உள்ளவர்களுக்கு வேர்க்கடலை + வெல்லம் கலந்த பூரணம் வைத்துக் கொழுக்கட்டை செய்தால்தான் பிடிக்கும்.

Microwave oven

அங்குள்ள காயில் மின் அடுப்பில் சமைப்பது சற்று சிரமம். என் மகள், ‘ஒரு பீங்கான் தட்டில் வேர்க்கடலையை வைத்து, மைக்ரோவேவ் அவனில் 3 நிமிடங்கள் வைத்திருக்க வேண்டும். பிறகு வெளியே எடுத்து, திருப்பிவிட்டு மேலும் 3 நிமிடங்கள் வைத்தால் போதும். கடலை நன்கு வறுபட்டிருக்கும்’ என்றாள். ‘பழைய வழக்கங்களிலிருந்து புதுசுக்கு ஏன்தான் மாற மாட்டேன் என்கிறீர்களோ!’ என்று என் பெண்கள் அடிக்கடி சொல்வார்கள். அன்றைக்கும் வேர்க்கடலையை மின் அடுப்பில் வறுப்பதுதான் சரி என்று எனக்குத் தோன்றியது. என் மகள் அலுவலகத்துக்குச் செல்வதற்கு முன் அதை அவளிடமும் சொன்னேன். சிரித்தபடியே போய்விட்டாள்.

‘வேர்க்கடலை வறுப்பதில் நிறைய டெக்னிக்ஸ் இருக்கிறது’ என்பார் என் அம்மா. சிறிது சிறிதாக போட்டுத்தான் வறுக்க வேண்டும்… தீ நடுநிலையில் (medium fire) தான் இருக்க வேண்டும்… வாயில் போட்டுப் பார்க்கும் போது சரியாக இருக்கிறதே என்று நினைத்தால் தீய்ந்து போயிருக்கும், அதனால் சற்று முன்பே இறக்கிவிட வேண்டும்… போன்ற டெக்னிக்ஸ்! வேர்க்கடலையை வறுத்தெடுக்க குறைந்தது 10 நிமிடங்கள் முதல் 15 நிமிடங்கள் வரை ஆகும்.

எனக்கென்னவோ அன்றைக்கு மகள் சொன்னபடியே மைக்ரோவேவ் அவனில் முயற்சி செய்யலாமே என்று தோன்றியது. அவள் சொன்னபடியே மைக்ரோவேவ் அவனில் வைத்து எடுத்தேன். வேர்க்கடலை சூப்பராக வறுபட்டிருந்தது. கை வலிக்க வறுக்க வேண்டிய சிரம்ம் இல்லை. அதற்கடுத்து உளுத்தம் பருப்பை வறுக்க வேண்டி இருந்தது. அதையும் வேர்க்கடலைக்கு செய்த்தைப் போலவே தட்டில் வைத்து, 4 நிமிடங்கள் வைத்திருந்து எடுத்து புரட்டிப் போட்டு வைத்ததில் நன்கு வறுபட்டிருந்தது.

என் மகள் வந்ததும் உளுத்தம் பருப்பையும் அவனில் வறுத்ததைச் சொன்னேன். ‘பரவாயில்லையே! மைக்ரோவேன் அவனில் சமைக்கிற அளவுக்கு specialist ஆகிடுவீங்க போல இருக்கே… சபாஷ்!’ என்றாள். அந்தக் கணத்தில் என் மனம் பின்னோக்கி அசை போட ஆரம்பித்தது.

Trad Stove 4

என் தாயார் எந்தெந்த அடுப்புகளிலோ சமைத்திருக்கிறார். அவற்றை என் மகள்களிடம் காட்ட ஒரு மாடல் கூட இப்போது இல்லையே என்கிற வருத்தம் பிறந்தது. எனக்கு நினைவு தெரிந்த வயதிலிருந்து என் பள்ளிப் பருவம் வரை வீட்டில் விறகு அடுப்புதான். அப்போதெல்லாம் விறகுகளை வெட்டி, கட்டுகளாக்கி விற்பார்கள். விறகுகளில் சவுக்கு மரம்தான் நிதானமாக எரியும். அதனால் மரத்தொட்டிக்குச் (விறகுக் கடை) சென்று அதை வாங்கி வந்து, காய வைத்து, அடுக்கி வைத்துக் கொள்வோம்.

அப்போது நாங்கள் இருந்தது ஓட்டு வீடு. சமைப்பதற்காக விறகு எடுக்கச் சென்ற சமயங்களில் அம்மாவின் கையை, விறகுக்குள் மறைந்திருக்கும் தேள் பதம் பார்த்திருக்கிறது. அம்மா வலியால் துடிப்பார். என்ன மருந்து, மாத்திரை எடுத்துக் கொண்டாலும் 24 மணி நேரத்துக்குப் பிறகுதான் தேள்கடி குணமாகும். விறகு அடுப்பைப் பற்ற வைக்க ‘வரட்டி’ அல்லது ‘எருமுட்டி’ என்றழைக்கப்படும் ஒன்று தேவைப்படும். சாணியை உருட்டி, வைக்கோல் தூள் கலந்து, பின் சுவற்றில் தட்டி காய்ந்தபின் எடுத்து உலர்த்தி விற்பனை செய்வார்கள். ஒவ்வொரு வரட்டியும் இரு கை அளவுக்கு இருக்கும். அதை உடைத்து, அதில் சிறிது கெராசினை ஊற்றி பற்ற வைப்பார் அம்மா. அதற்குப் பிறகு அதில் இரு விறகுக் கட்டையை வைப்பார். நன்கு பற்றிக் கொண்ட பின் விறகு எரிய ஆரம்பிக்கும். அம்மா வெளியே சென்றிருக்கும் நேரத்தில் விறகை சற்று உள்ளேத் தள்ளி வைப்பது எங்கள் வேலையாக இருக்கும்.

viragu aduppu

விறகு அடுப்பில் சில நுணுக்கங்கள் உண்டு. ஈர விறகாக இருந்தால் எரியாது. சாதமோ, பாலோ பொங்கி வழிந்து விறகில் பட்டு விட்டாலும் எரியாது. அது போன்ற நேரங்களில் ஒரு பேப்பரை எடுத்து அடுப்புக்குள் விறகின் மேல் வைத்து, ஊதுகுழலால் விறகு பற்றிக் கொள்ளும் வரை ஊத வேண்டும். புகை கிளம்பி, நம் கண்களில் எரிச்சலெல்லாம் ஏற்படும். இது ஒரு கஷ்டமான, சிக்கலான வேலை.

சமையல் முடிந்ததும் அடுப்புக்குள் இருந்து விறகுக் கட்டையை எடுப்பார் அம்மா. விறகின் எரிந்த பகுதியில் நீரை ஊற்றுவார். எரிந்த பகுதி கரியாகி இருக்கும். அந்த கரித்துண்டுகளை உலர்த்தி வைத்துக் கொள்வார். அவை தண்ணீர் காயவைக்கும் பாய்லரில் உபயோகிக்கப் பயன்படும்! விறகு அடுப்பின் கீழே சாம்பல் மேடிட்டிருக்கும். அதற்கு மேல் விறகை வைத்து எரித்தால்தான் ஜ்வாலை எளிதில் மேலெழும்பி வைத்திருக்கும் பாத்திரம் சூடாக உதவும். அடுப்பின் அடியில் சாம்பல் இருந்து கொண்டே இருக்க வேண்டும். இல்லையென்றால் விறகு எரிய அதிக நேரம் பிடிக்கும். ஒருநாள் அம்மா இல்லாத ஒரு சந்தர்ப்பத்தில், சமையல் முடிந்ததும் நான் அடுப்பை சுத்தம் செய்ய ஆரம்பித்தேன். அதாவது, கீழ்ப் பகுதியில் தேங்கியிருந்த சாம்பல் மொத்தத்தையும் வழித்து எடுத்துவிட்டேன். விளைவு, விறகு அதிகம் செலவானது.  ஊரிலிருந்து வந்த அம்மா சொன்னார்… ‘சாம்பலை எடுத்ததால நான் ஒரு மாசம் வச்சு எரிக்கிற விறகை பத்து நாள்ல காலி பண்ணிட்டியேம்மா!’

விறகு வைத்து சமைப்பதால் எழும் புகை சமைப்பவர்களுக்கும் மற்றவர்களுக்கு இருமல், மூச்சுத் திணறல் போன்ற தொந்தரவுகளைத் தந்ததால் அரசு விறகு அடுப்பில் ஒரு மாற்றத்தைக் கொண்டு வந்தது. அடுப்பில் ஒரு நீண்ட குழாயைப் பொருத்தினால் புகை அதன் வழியே வெளியே சென்று விடும். மிகச் சில கிராமங்களில் இந்த அடுப்பு பயன்பாட்டுக்கு வந்தது.

விறகு அடுப்புக்கு அடுத்ததாக மரத்தூள் அடுப்பை அம்மா பயன்படுத்தினார். அது நிறைய பேருக்கு அறிமுகமில்லாத ஒரு வகை அடுப்பு. இதில் பயன்படுத்த ‘ரம்பத்தூள்’ எனப்படும் மரத்தூைள மரம் அறுக்கும் கடையில் மூட்டையாக வாங்கி வருவார்கள். இது மண்ணால் ஆன அடுப்புதான். ஆனால், வாய்ப்புறத்தில் ஒரே ஒரு விறகு கட்டையைத்தான் வைக்க முடியும். அதைப் பயன்படுத்துவது ஒரு வகையான டெக்னிக். பழகினால்தான் அதில் சமையல் செய்ய முடியும்.

Marathool aduppu

இந்த அடுப்பைப் பயன்படுத்தும் போது, அம்மா கீழே அமர்ந்து கொள்வார். அடுப்பில் விறகுக்கட்டையை வைக்கும் இடத்தை ஒரு சிறு துணியால் அடைப்பார். பிறகு அரை சாண் அகலமுள்ள ஓர் ஊதுகுழலை நடுவில் வைத்து, அதை ஒரு கையால் பிடித்துக் கொள்வார். அதைச் சுற்றி மரத்தூளை சிறிது சிறிதாக கொட்டுவார். மரத்தூளை மத்து போன்ற ஒன்றைக் கொண்டு லேசாக அழுத்துவார். பார்பதற்கு ஏதோ ஒரு மாஜிக் நிகழ்த்துவது போலத் தெரியும். பின்னாளில் இதை எப்படி நாம் செய்யப் போகிறோம் என்கிற கவலை வரும். (கேஸ் அடுப்பில்தான் சமைக்கப் போகிறோம் என்று ஜோசியமா தெரியும்?) அடுப்பில் மரத்தூள் நிரம்பியதும் உள்ளே இருக்கும் குழலை மெதுவாகத் தூக்குவார் அம்மா. இப்போது நடுவில் ஓட்டை ஒன்று நீளமாக ஏற்பட்டிருக்கும். கீழே வைத்திருந்த துணியை மெதுவாக வெளியே இழுப்பார். ஒரே ஒரு விறகின் நுனியில் மண்ணெண்ணெய் ஊற்றிப் பற்ற வைத்து உள்ளே வைத்தால், அந்த்த் தீயில் மெதுவாக தூள் சேர்ந்து எரிய ஆரம்பிக்கும். இதில் விறகு செலவு குறைவு. ஊத்த் தேவையில்லை. அடுப்பு எரிவதே பார்க்க அழகாக இருக்கும். அக்காலத்தில் எரிபொருள், நேரம் சேமிப்பு தந்த அற்புதம் அது! மரத்தூள் அடுப்பைப் பற்ற வைத்துவிட்டால் ‘கண கண’ என்று எரிந்து கொண்டே இருக்கும். நடுவில் நிறுத்த முடியாது. முழுச் சமையலையும் செய்து முடிப்பதுதான் உசிதம்.

stove 3

அடுத்ததாக வீக்கோ அடுப்பு வந்தது. இது ‘டாலி’ என்கிற மண் அடுப்பு மாதிரி இரும்பு அடுப்பாலானது. இதைப் பற்ற வைப்பது சற்று கடினம். பற்றிவிட்டால் ‘கண கண’ என நெருப்பு ஒளிர எரியும். பார்ப்பதற்கு சூரிய உதயத்திலும், அந்தியிலும் ஒரு நிறம் தெரியுமே, அப்படி இருக்கும்.

gummitti aduppu

பற்ற வைப்பது பிரம்மப் பிரயத்தனமே! முதலில் தேங்காய் நார்களை பிரித்து, அடுப்பில் போடுவார் அம்மா. அதில் சிறிது கெரசின் விட்டு பற்ற வைப்பார். பிறகு அதில் நாட்டுக்கரியைப் (விறகு எரிந்தால் கிடைப்பது) போட்டு அடுக்குவார். உள்ளே காற்றுப் புகும்படி crosswiseஆக அடுக்க வேண்டும். பற்ற ஆரம்பித்த்தும் அதன் மேலே வீக்கோ கரியை (ெநய்வேலியின் உபயம்) அடக்குவார். கனமாக இருக்கும். கரி பற்ற 10 முதல் 15 நிமிடம் ஆகும். அம்மா ஒரு விசிறி எடுத்து பற்றிக் கொள்ளும் வரை விசுறுவார். பற்றிக் கொண்டால் வேகமாக நடக்கும் சமையல்.

வீக்கோ கரியை பாய்லரில் வெந்நீர் போடவும் உபயோகித்துக் கொள்வோம். சமையல் முடிந்ததும் கரியை வெளிேய எடுத்து, அதன் மேல் ஒரு பாத்திரத்தைப் போட்டு கவிழ்த்து விடுவார். நாங்கள் பள்ளி முடிந்து வந்து மாலையில் திறந்து பார்த்தால், கறுப்புத் தங்கமான நிலக்கரி வெந்நிற திருநீறு போல மாறி இருக்கும். இதை அடுத்த நாளும் உபயோகிக்கலாம்.

thiri stove thiri stove 2

பிறகு மண்ணெண்ணெய் ஸ்டவ் புழக்கத்துக்கு வந்தது. இதில், திரி மாற்றுவது கடினமான வேலை. திரிகளை ஒரே அளவாக, சீராக வெட்டி வைக்க வேண்டும். திரிகளைத் துடைத்து எடுக்கும் போது கையெல்லாம் கெரசின் நாற்றம் அடிக்கும். வார விடுமுறை நாளில் அம்மா ஸ்டவ்வை சுத்தம் செய்து வைப்பார். அடுத்துதான் கேஸ் ஸ்டவ் புழக்கத்தில் வந்தது. அதன் பிறகு பம்ப் ஸ்டவ், சைடில் சிலிண்டர் வைத்த ஸ்டவ்வெல்லாம் பயன்பாட்டுக்கு வந்தன.

pump stove

stove 2

அதிகமாகக் காற்றடித்தால் பம்ப் ஸ்டவ் வெடித்துவிடும். அந்தக் காலத்தில் வீட்டில் ஸ்டவ் வெடித்து பெண் இறந்து போனால், மாமியார்-மருமகள் சண்டை என்பார்கள். சினிமாக்களிலேயே கூட ஸ்டவ் வெடிப்புச் சம்பவங்கள் காட்சிகளாக இடம் பெற்றுள்ளன. அதன் பின் கேஸ் ஸ்டவ், இண்டக்‌ஷன் ஸ்டவ், மைக்ரோவேவ் அவன் என்று நீண்டு கொண்டிருக்கிறது அடுப்புகளின் பட்டியல்! அடுப்புகள் மாறினாலும் அம்மாக்கள் சமைப்பது மட்டும் நின்ற பாடாக இல்லை.

gas stove

மகளும், அக்கா மகளும் விடுமுறைக்கு என் அம்மா வீட்டுக்குச் செல்வது வழக்கம். வரும் போது அங்கிருக்கும் பிடித்த பாத்திரங்கள், பொருட்களை அள்ளிக் கொண்டு வருவார்கள். ஊருக்குக் கிளம்பும் நாள் வந்த போது, என் 4 வயது மகள் ‘பாட்டி, இந்த ஸ்டவ் பார்க்க புதுசா இருக்கு. எடுத்து வைங்க. நான் அம்மாவோட வர்றப்போ எடுத்துட்டுப் போறேன். எங்க வீட்டுல இந்த மாதிரி ஸ்டவ்வே இல்லை’ என்று சொல்லியிருக்கிறாள். அம்மாவோ, ‘அப்படியா! அது என்ன அப்படிப்பட்ட அருமையான ஸ்டவ்? காட்டு’ என்று சொல்லியிருக்கிறார். என் மகள் காட்டியது வீட்டின் மூலையில் இருந்த பழைய கெரசின் ஸ்டவ்!

அ.ப.மலர்க்கொடி பலராமன் 

Malarkodi balaraman

Image courtesy:

http://www.hedon.info/

http://cdn.indiabizclub.com

http://www.immt.res.in/i

http://pimg.tradeindia.com

http://foodslice.blogspot.in

upload.wikimedia.org

https://vegetarianirvana.files.wordpress.com

http://www.parasptk.com/

http://www.electricstoveheater.net/

22 இன் 1 – அசத்துது அவகடோ!

OLYMPUS DIGITAL CAMERA

மதுமிதா

ganze und halbe avocado isoliert auf weiss

பட்டர் ஃப்ரூட் என்றும் அறியப்படும் அவகடோ பழத்தின் சாறு, தொண்டையில் இறங்கும் போது வெண்ணெய் இறங்குவது போல இதம் தரும். அதனால் இதை வெண்ணெய் பழம் என்றும் கூறுவதுண்டு. பழம் கனிந்ததும் சாலட், ஜூஸ் செய்யலாம் என்பதைப் போல, காயாக இருக்கும்போதும் சமையலில் பயன்படுத்தலாம். மாங்காய் அல்லது குடைமிளகாய் போன்று தனித்த சுவையோ, மணமோ இதற்குக் கிடையாது. எனினும், இதன் சுவை அலாதியானது. பச்சை வண்ண சதைப் பகுதி மருத்துவ குணமுடையது. வெளிநாட்டிலிருந்து வந்த காய் என்பதாலும் பழமாக மட்டுமே பயன்படுத்தி வந்ததாலும் ஜூஸ், சாலடுக்கு மட்டுமே விதவிதமாகப் பயன்படுத்தினர். நம் சமையல் முறைப்படி பொரியல், சாம்பார், சாதமாகவும் முயற்சிக்கலாம்.

அவகடோ ஜூஸ்

அவகடோ பழத்தின் கனிந்த சதையை ஸ்பூனால் எடுத்து, மிக்ஸியில் தேவையான சர்க்கரை சேர்த்து, அரைத்து, நீர் கலந்து ஜூஸாக அருந்தலாம்.

அவகடோ மில்க் ஷேக்

Avocado milk shake

அவகடோ பழத்தின் கனிந்த சதையை ஸ்பூனால் எடுத்து, மிக்ஸியில் தேவையான சர்க்கரை சேர்த்து, அரைத்து, காய்ச்சி ஆற வைத்த பால் சேர்த்து மில்க் ஷேக் ஆகப் பருகலாம்.

அவகடோ சாலட்

Avocado Salad 1

கனிந்த பழத்தின் சதைப் பகுதியை ஸ்பூனால் எடுத்து மசித்து, எலுமிச்சை பிழிந்து, உப்பு சேர்த்து, கொத்தமல்லி இலையை பொடியாக வெட்டிச் சேர்த்தால், சாலட் ரெடி.

பழத்தின் சதைப் பகுதியை எடுத்ததுமே, எலுமிச்சைச்சாறை சேர்த்துவிட்டால், நிறம் மாறாமல் இருக்கும்.

2வது முறை: கனிந்த பழத்தின் சதைப் பகுதியை ஸ்பூனால் எடுத்து மசித்து, பொடியாக நறுக்கிய தக்காளியும் உப்பும் சேர்க்கவும். பொடியாக நறுக்கிய பெரிய வெங்காயம், பச்சை மிளகாய், கறிவேப்பிலை, கொத்தமல்லி சேர்த்து சாலட்டாக உபயோகிக்கலாம். கொத்தமல்லி இலையை பொடியாக நறுக்கி, அதிக அளவில் சதைப் பகுதி எவ்வளவு எடுத்திருக்கிறோமோ அதே அளவுக்கு சேர்க்க வேண்டும்.

Avocado Salad 2

3வது முறை: 2வது முறைப்படி செய்த பின், அதோடு, துருவிய கேரட், வெள்ளரிக்காய் எனத் தனித்தனியாக சேர்க்கலாம்.

4வது முறை: காயைத் தோல் சீவி, துருவி எடுத்துக்கொண்டு, அதனுடன் பொடியாக நறுக்கிய பெரிய வெங்காயம், பச்சை மிளகாய், கறிவேப்பிலை, கொத்தமல்லி இலை சேர்க்கவும். இதனுடன் துருவிய கேரட், வெள்ளரிக்காய் எனத் தனித்தனியாக சேர்க்கலாம். உப்பு சேர்த்து பரிமாறவும்.

அவகடோ தயிர் பச்சடி

Avocado thayir pachadi

காயைத் தோல் சீவி துருவி எடுத்துக்கொண்டு, அதனுடன், பொடியாக நறுக்கிய பெரிய வெங்காயம், பச்சை மிளகாய், கறிவேப்பிலை, கொத்தமல்லி இலை சேர்க்கவும். தயிரில் உப்பு சேர்த்து மேலே குறிப்பிட்ட கலவையையும் சேர்த்து பரிமாறலாம்.

அவகடோ ரைத்தா

Avocado Raitha

கனிந்த பழத்தின் சதைப் பகுதியை ஸ்பூனால் எடுத்து மசித்து, உப்பு சேர்க்கவும். பொடியாக நறுக்கிய பெரிய வெங்காயம், பச்சை மிளகாய், கறிவேப்பிலை, கொத்தமல்லி இலை சேர்த்து இந்தக் கலவையை தயிரில் உப்பு கலந்து சேர்க்கலாம்.

2வது முறை: கனிந்த பழத்தின் சதைப் பகுதியை ஸ்பூனால் எடுத்து மசித்து, உப்பு சேர்க்கவும். பொடியாக நறுக்கிய பெரிய வெங்காயம், பச்சை மிளகாய், கறிவேப்பிலை, கொத்தமல்லி இலை சேர்த்து இந்தக் கலவையை தயிரில் உப்பு கலந்து சேர்க்கவும். இதனுடன் துருவிய கேரட், வெள்ளரிக்காய் எனத் தனித்தனியாகவும் சேர்க்கலாம். தக்காளி அல்லது எலுமிச்சைச்சாறு தேவையெனில் சிறிது சேர்க்கலாம்.

அவகடோ மசால்

Aalu avacado masal

உருளைக்கிழங்கை வேக வைத்து எடுத்துக் கொள்ளவும். பொடியாக நறுக்கிய பெரிய வெங்காயம், கறிவேப்பிலை சேர்த்து வதக்கி, அவகடோ காயை தோல் சீவி, கொட்டை நீக்கி, ஒரு இஞ்ச் அளவில் நறுக்கிச் சேர்த்து வதக்கவும். அந்த வதக்கிய கலவையுடன் வேக வைத்து மசித்த உருளைக்கிழங்கு சேர்த்து, மஞ்சள் தூள், தனி வத்தல் தூள், உப்பு சேர்த்து வதக்கவும். கொத்தமல்லி இலை தூவி இறக்கவும். அவகடோ மசால் தயார்.

அவகடோ மசால் தோசை

Avocado Dosai 3

தோசையின் நடுவில் அவகடோ மசால் வைத்து மசால் தோசையாகப் பரிமாறலாம்.

2வது முறை: அவகடோ பழ சாலட்டை தோசையின் நடுவில் வைத்துப் பரிமாறலாம்.

அவகடோ துருவல்

அவகடோ காயை தோல் சீவி, கொட்டையை விலக்கி எடுக்கவும். காயை துருவலாகத் துருவிக் கொள்ளவும். தாளித்து, பொடியாக நறுக்கிய வெங்காயம், பச்சை மிளகாய், கறிவேப்பிலை சேர்த்து வதக்கவும். துருவலைச் சேர்க்கவும். நன்றாக வதங்கியதும் துருவிய தேங்காய், உப்பு சேர்த்து இறக்கவும்.

அவகடோ பொரியல்

அவகடோ காயை பொடியாக நறுக்கி, கேரட் அல்லது பீன்ஸ் பொரியல் செய்வது போல அவகடோ பொரியல் செய்யலாம்.

அவகடோ ஸ்டஃப்டு சப்பாத்தி

Avacado stuufed chappathi

தாளிக்காமல் அவகடோ துருவல் செய்து சப்பாத்திக்கு நடுவில் வைத்து ஸ்டஃப்டு சப்பாத்தியாகச் செய்யலாம்.

அவகடோ கறி

Avacado curry

அவகடோ காயை கத்தரிக்காய் நறுக்குவது போல நறுக்கிக் கொள்ளவும். கடுகு, உளுத்தம்பருப்பு, கறிவேப்பிலை, பெருங்காயத்தூள் போட்டு தாளிக்கவும். காயை லேசாக வதக்கவும். சாம்பார் பொடி, உப்பு சேர்க்கவும். மிக்ஸியில் ஒரு பெரிய வெங்காயம், ஒரு பச்சை மிளகாய், சிறிது புளி, பாதி மூடி தேங்காய், 3 தக்காளி சேர்த்து அரைத்துச் சேர்க்கவும். வெந்ததும் கெட்டியாக எடுத்துப் பரிமாறவும்.

அவகடோ – கடலைப் பருப்பு கூட்டு

Avacado kadalaiparuppu kuuttu

கடலைப் பருப்புடன் நறுக்கிய கேரட் 2, அவகடோ காய் நறுக்கிச் சேர்க்கவும். சின்ன வெங்காயம் 5, ஒரு தக்காளி, இரண்டு சில்லு தேங்காய் பொடியாக நறுக்கிச் சேர்க்கவும். சாம்பார் பொடி, பெரிய உப்பு சேர்க்கவும். இரண்டு தேங்காய் சில்லு, ஒரு பச்சை மிளகாய், சிறிது புளி, ஒரு தக்காளி சேர்த்து மிக்ஸியில் அரைத்துச் சேர்க்கவும். குக்கரில் சிறிது தண்ணீர் விட்டு அனைத்தையும் ஒன்றாக சேர்த்து வேக வைக்கவும். கடுகு, உளுத்தம் பருப்பு, கறிவேப்பிலை, ஒரு மிளகாய் வத்தல் போட்டு, ஒரு சிட்டிகை பெருங்காயத்தூள் சேர்த்துத் தாளிக்கவும்.

அரைத்து விட்ட அவகடோ சாம்பார்

Avacado araithu vitta sambar

அவகடோ காயைத் தனியாக நறுக்கி வைத்துக் கொள்ளவும். சின்ன வெங்காயம் சேர்த்து அரைத்து விடும் சாம்பாருக்குச் செய்வதைப் போல அனைத்தையும் சேர்த்து, அவகடோ லேசாக வதங்கும் போது அனைத்தையும் சேர்த்து வேக வைக்கவும். கொத்தமல்லி இலை தூவி பரிமாறவும்.

அவகடோ – முருங்கைக்காய் சாம்பார்

Avocado Sambar

துவரம் பருப்பு சேர்த்து முருங்கைக்காய் சாம்பார் செய்யும்போது காய்கள் சேர்க்கும் அளவுக்கு, அவகடோ காய் சேர்க்கவும்.

அவகடோ துவையல்

Avocado Thuvaiyal

உளுத்தம் பருப்பு 5 டீஸ்பூன், சீரகம் ஒரு டீஸ்பூன், பச்சை மிளகாய் 3, மிளகாய் வத்தல் 3, வெள்ளைப் பூண்டு 4, கறிவேப்பிலை சேர்த்து வதக்கவும். அவகடோ காயை தோல் சீவி பொடியாக நறுக்கிச் சேர்த்து வதக்கவும். வதங்கும்போது புளி, உப்பு, கொத்தமல்லி இலை சேர்த்து வதக்கி ஆறியதும் மிக்ஸியில் அரைக்கவும். விரும்பினால் தேங்காய் சிறிது சேர்க்கலாம்.

அவகடோ கொத்து பரோட்டா

Avocado Kothu parota

கொத்து பரோட்டா செய்யும் போது, கேரட், பீன்ஸுடன் அவகடோ காயை நீளமாக பொடியாக நறுக்கிச் சேர்த்து செய்யலாம்.

2வது முறை: 3 சப்பாத்தி மீதமாகி இருந்தால், அவற்றைத் துண்டுகளாக்கி அல்லது துண்டுகளை மிக்ஸியில் லேசாக பெரிய சைஸ் தூளாக அரைத்து எடுத்து வைத்துக் கொள்ளவும்.

எண்ணெய் விட்டு பெருஞ்சீரகம், ஏலக்காய், கிராம்பு போட்டு, கறிவேப்பிலை, இஞ்சி, வெள்ளைப் பூண்டு, பச்சை மிளகாய் விழுது சேர்த்து, பெரிய வெங்காயம் பொடியாக நறுக்கிச் சேர்த்து, அவகடோ காயை நீளமாக பொடியாக நறுக்கிச் சேர்க்கவும். வதங்கும் போது மஞ்சள் தூள், தனி வத்தல் பொடி சேர்க்கவும். தக்காளி 2 பொடியாக நறுக்கிச் சேர்க்கவும். மிக்ஸியில் தூளாகச் செய்த அல்லது சப்பாத்தியை துண்டுகளாகப் பிய்த்து எடுத்ததை இதில் சேர்க்கவும். சிறிது உப்பு, கொத்தமல்லி இலை தூவி பரிமாறவும்.

அவகடோ – ஆலு – பட்டர் பீன்ஸ் குருமா

Avocado  aalu butter beans

எண்ணெய் விட்டு, பெருஞ்சீரகம், ஏலக்காய், கிராம்பு போட்டு, கறிவேப்பிலை, இஞ்சி, வெள்ளைப் பூண்டு, பச்சை மிளகாய் விழுது சேர்த்து, பெரிய வெங்காயம் பொடியாக நறுக்கிச் சேர்த்து, அவகடோ காயை பொடியாக நறுக்கிச் சேர்க்கவும். நறுக்கிய உருளைக்கிழங்கு, பட்டர் பீன்ஸ் சேர்க்கவும். இவை லேசாக வதங்கும் போது மஞ்சள் தூள், தனி வத்தல் பொடி, கொத்தமல்லி பொடி, கறிமசால் பொடி, உப்பு சேர்க்கவும். 2 தக்காளியை மிக்ஸியில் அரைத்துச் சேர்க்கவும். அரை மூடித் தேங்காய், ஒரு பச்சை மிளகாய், 5 முந்திரிப் பருப்பு, மிக்ஸியில் அரைத்துச் சேர்த்து குக்கரை மூடி, 2 விசில் வந்ததும் எடுத்து கொத்தமல்லி இலை தூவி பரிமாறவும்.

அவகடோ பிரியாணி

Avocado Biriyani

பிரியாணி செய்வது போலவே, இஞ்சி – பூண்டு விழுது, கறிமசால் வகைகள், உப்பு அனைத்தையும் சேர்க்கவும். அவகடோ சேர்க்கவும். மிக்ஸியில் அரை மூடி தேங்காயுடன் கால் கட்டு கொத்தமல்லி இலை, கால் கட்டு புதினா இலை சேர்த்து அரைத்து அனைத்தையும் குக்கரில் வைத்து வேக விடவும். முந்திரி வறுத்து சேர்த்து பரிமாறவும்.

அவகடோ ஃப்ரைடு ரைஸ்

Avocado Fried Rice

சாதத்தை வேக வைத்து ஆற வைக்கவும். அவகடோ காயை பொடியாகத் துருவி வைத்துக்கொள்ளவும். எண்ணெய் விட்டு பெருஞ்சீரகம், ஏலக்காய், கிராம்பு போட்டு, கறிவேப்பிலை, இஞ்சி, பூண்டு, பச்சை மிளகாய் பொடியாக நறுக்கி வதக்கவும். துருவிய அவகடோ காயையும் சேர்த்து வதக்கவும். விரும்பினால், அரை டீஸ்பூன் சர்க்கரை, அரை தக்காளியை பொடியாக நறுக்கிச் சேர்க்கலாம். வதங்கும் போது தேவையான அளவு மஞ்சள் தூள், தனி வத்தல் பொடி, கறிமசால் பொடி சேர்க்கவும். உப்பு, கொத்தமல்லி இலை சேர்க்கவும். ஆறிய சாதத்தை இதில் சேர்த்துக் கிளறி இறக்கவும்.

2வது முறை: இதில் கேரட், பீன்ஸ் சேர்த்தும் செய்யலாம்.

அவகடோ தேங்காய்ப் பால் பிரியாணி Avocado Biriyani 1

பிரியாணி செய்யும் போது, தேங்காய் விழுதாக அரைத்து விடாமல் தேங்காய் சக்கையைப் பிழிந்து விட்டு, தேங்காய்ப் பாலை அரிசிக்கு அளவு நீராக வைத்து செய்தால் சுவை கூடும்.

அவகடோ – மட்டர் – ஆலு குருமா

எண்ணெய் விட்டு பெருஞ்சீரகம், ஏலக்காய், கிராம்பு போட்டு, கறிவேப்பிலை, இஞ்சி, வெள்ளைப் பூண்டு, பச்சை மிளகாய் விழுது சேர்த்து, பெரிய வெங்காயம் பொடியாக நறுக்கிச் சேர்த்து, அவகடோ காயை பொடியாக நறுக்கிச் சேர்க்கவும். நறுக்கிய உருளைக்கிழங்கு சேர்க்கவும். இவை லேசாக வதங்கும் போது மஞ்சள் தூள், தனி வத்தல் பொடி, கொத்தமல்லி பொடி, கறிமசால் பொடி சேர்க்கவும். பச்சைப் பட்டாணி சேர்க்கவும். ஃப்ரெஷ் பச்சைப் பட்டாணி எனில் அப்படியே சேர்க்கலாம். இல்லையெனில் முதல் நாள் இரவு ஊற வைத்து சேர்க்கவும். 2 தக்காளி மிக்ஸியில் அரைத்துச் சேர்க்கவும். அரை மூடித் தேங்காய், ஒரு பச்சை மிளகாய், தேவையான அளவு உப்பு, 5 முந்திரிப் பருப்பு, மிக்ஸியில் அரைத்துச் சேர்த்து குக்கரை மூடி 2 விசில் வந்ததும் எடுத்து கொத்தமல்லி இலை தூவி பரிமாறவும்.

அவகடோ – மட்டர் ரைஸ்

Avacado Muttar 2

எண்ணெய் அல்லது நெய்யில் பெருஞ்சீரகம், ஏலக்காய், கிராம்பு, கறிவேப்பிலை போட்டு வறுக்கவும். இஞ்சி – பூண்டு விழுது சேர்க்கவும். இரண்டு தக்காளியை மிக்ஸியில் அரைத்துச் சேர்க்கவும். தேவையான தனி மஞ்சள் பொடி, தனி வத்தல் பொடி, உப்பு, கறிமசால் பொடி அனைத்தையும் சேர்க்கவும். அவகடோ காயை தோலெடுத்து நறுக்கி சேர்க்கவும். பச்சைப் பட்டாணி சேர்க்கவும். நனைய வைத்த அரிசியைச் சேர்த்து லேசாக வதக்கவும். மிக்ஸியில் அரை மூடி தேங்காயுடன் கால் கட்டு கொத்தமல்லி இலை அரைத்து சேர்த்து குக்கரில் வைத்து வேக விடவும். முந்திரி வறுத்து சேர்த்து பரிமாறவும்.

ஆரோக்கியத்துக்கு உத்தரவாதம்… சிறுதானிய உணவகம்!

10406746_1443493422586108_6480229173682198535_n

‘உடலுக்குத் தேவையான அனைத்து ஊட்டச் சத்துகளும் கிடைக்கும்’, ‘நீரிழிவு பிரச்னைக்கான வாய்ப்பைக் குறைக்கலாம்’, ‘கொழுப்புச் சத்தைக் குறைக்கலாம்’, ‘மாரடைப்பு வருவதற்கான வாய்ப்பைக் குறைக்கலாம்’, ‘கேன்சர் நோய் வராமல் தடுக்க முடியும்’… எப்படி? தானியங்களை சுழற்சி முறையில் உட்கொள்வதால்!

சிறுதானியங்களின் மகத்துவத்தை உணர்த்தும் அர்த்தம் பொதிந்த இந்த வாசகங்களை வெறுமனே அறிவுரையாக மட்டும் சொல்லிவிடாமல் நடைமுறைப்படுத்தி, நிரூபித்தும் வருகிறார் லட்சுமி… உடுமலைப் பேட்டையில் ‘ஆரோக்யம் – இயற்கை மற்றும் பாரம்பரிய உணவகம்’ என்கிற சிறுதானிய உணவு விடுதியை நடத்தி வரும் இவர் ஒரு எம்.பி.ஏ. பட்டதாரி!

10300271_1443493745919409_2459276033068071820_n

உடுமலைப்பேட்டை பேருந்து நிலையத்துக்கு அருகில் இருக்கிறது ‘ஆரோக்யம் இயற்கை மற்றும் பாரம்பரிய உணவகம்’. ஐந்து மேசைகள், நாற்காலிகள்… 20 பேர் உட்கார்ந்து சாப்பிடக் கூடிய சிறிய உணவு விடுதி. சுவரெங்கும் சிறுதானியங்களின் முக்கியத்துவம், பயன், அவற்றிலுள்ள சத்துகள் அனைத்தும் வண்ண எழுத்துகளில் பட்டியலிடப்பட்டிருக்கின்றன. உணவகத்துக்கு வரும் குழந்தைகள் விளையாட விளையாட்டுக் கருவிகள் ஒருபுறம், மற்றொருபுறம் விற்பனைக்காக வைக்கப்பட்டிருக்கும் சிறுதானியங்கள், அவை தொடர்பான புத்தகங்கள் என அந்த இடமே வித்தியாசமான சூழலை ஏற்படுத்துகிறது. இங்கே பணிபுரியும் அத்தனை பேரும் பெண்கள்!

10468359_1443493615919422_1349460631703228093_n10418262_1443493535919430_5443805577336662061_n10509678_1443493905919393_7999180408903767029_n

‘‘இப்படி ஓர் உணவகத்தை நடத்த வேண்டும் என்கிற எண்ணம் எப்படி வந்த்து?’’ என்று ஒற்றைக் கேள்வி கேட்டால் விரிவாக பதில் சொல்கிறார் லட்சுமி.

‘‘முதல்ல சிறுதானிய உணவுகள் மேல ஈடுபாடு எப்படி வந்துச்சுன்னு சொல்லிடறேன். நானும் என் கணவர் மணிகண்டனும் அடிக்கடி ‘வானகர’த்துக்குப் போய் அய்யா நம்மாழ்வாரைப் பார்ப்போம். அவரோடப் பேசப் பேச சிறுதானியங்களின் முக்கியத்துவம் புரிய ஆரம்பிச்சுது. அப்புறம் வீட்ல அடிக்கடி சிறுதானிய உணவுகளை விதவிதமா செஞ்சு பார்த்தோம். ரொம்ப நல்லா வந்தது. இதை மத்தவங்களுக்கும் அறிமுகப்படுத்தலாமேன்னு தோணிச்சு. சின்னதா ஒரு உணவகம் ஆரம்பிக்க முடிவு செஞ்சோம். உடுமலைப்பேட்டை டவுன்ல சொந்த வீடு ஒண்ணு இருக்கு. அதை உணவு விடுதிக்கு ஏத்த மாதிரி கொஞ்சம் ஆல்டர் பண்ணினோம். நான், என் மாமியார் தவிர 6 பெண்கள் வேலை பார்க்கறாங்க. எனக்கு ஒரு பையன், ஒரு பொண்ணு. பையன் ஏழாவது படிக்கிறான். பொண்ணு ஒண்ணாவது படிக்கிறா. ரெண்டு பேரையும் காலையில ஸ்கூலுக்கு அனுப்பற வேலை இருக்கு. அதோட என் கணவர் கோயம்பத்தூர்ல வேலை பார்க்கிறார். அதனால காலையில உணவகத்தைத் திறக்க முடியலை. மதியம் சாப்பாடு, ராத்திரி டிபன். 12 மணிக்கு கடைக்கு வந்துடுவேன். சாயந்தரம் வேலை விட்டு வந்து என் கணவர் கொஞ்சம் உதவியா இருப்பார்’’ என்கிறார் லட்சுமி.

சிறுதானிய உணவுகள் சமைக்க எப்படிக் கற்றுக் கொண்டார் லட்சுமி? ‘‘ஆர்வம் வந்துட்டதால சிறுதானிய உணவுகள் தொடர்பா எங்கெல்லாம் சொல்லித் தர்றாங்கன்னு விசாரிச்சேன். அப்போதான், ‘கோவை வேளாண் பல்கலைக்கழக’த்துல சிறுதானிய உணவுகள் தொடர்பாக இரண்டு நாள் கோர்ஸ் இருக்கறது தெரிஞ்சுது. அங்கே கத்துகிட்டேன். அப்புறம், ‘சிறு குறு தொழில் மையம்’ நட்த்தின 10 நாள் வகுப்புல கலந்துகிட்டு, கத்துகிட்டேன். இந்த உணவுகள் தொடர்பாக அடிப்படை ஐடியா கிடைச்சுது. சமைக்க ஆரம்பிச்சுட்டேன். அனுபவம் இன்னும் ஏராளமா கத்துக் கொடுத்துச்சு’’. ஆர்வம் இருந்தால் எதையும் கற்றுக் கொள்ளலாம் என்பதில் தெளிவாக இருக்கிறார் லட்சுமி.

IMG_3541

சரி… லட்சுமியின் ஆரோக்ய உணவகத்தில் என்னவெல்லாம் கிடைக்கும்? ‘‘மதியத்துக்கு சாப்பாடு… நாட்டுப் பொன்னி அரிசி, வரகு, கம்புல செஞ்ச சாதம். திணையரிசி பாயசம், கீரைக்கூட்டு… நாட்டுக் காய்களை மட்டும் பயன்படுத்தி செஞ்ச சாம்பார்… தூதுவளை, வல்லாரை போன்ற மூலிகை ரசம். உடம்புக்கு நல்லதில்லைங்கறதுனால நாங்க தயிர் பரிமாறுவதில்லை… மோர்தான். தொட்டுக்க ஊறுகாய் கிடையாது. கீரைக் கூட்டு, பொரியல்… அதே மாதிரி அப்பளமும் கிடையாது. ராத்திரி டிபனுக்கு மைதா சேர்க்காத கோதுமை பரோட்டா, சீரகம் தூவின சப்பாத்தி… அதுக்கு சைட் டிஷ்ஷா வெஜிடபிள் குருமா, சோயா குருமா, சுண்டல் குருமான்னு ஏதாவது ஒண்ணு இருக்கும். சிறுதானியங்களில் செய்யப்பட்ட இட்லி, தோசை, பொங்கல் உண்டு… மாப்பிள்ளை சம்பா அரிசி, குதிரைவாலி அரிசி, வரகு, சாமைல செஞ்ச தோசை… தொட்டுக்க தேங்காய் சட்னி, பிரண்டை சட்னி, நிலக்கடலை சட்னி, புதினா சட்னி, புளி சட்னின்னு ஏதாவது இருக்கும். அப்புறம்… கோதுமை, கம்பு, ராகில செஞ்ச இடியாப்பம். சாமைல செஞ்ச குஸ்கா, திணை கிச்சடி, பெருநெல்லிக்காய் ஜூஸ், கீரை சூப், ஆவாரம்பூ டீ, உரம் போடாம வளர்த்த பப்பாளி… பப்பாளி தினமும் கிடைக்கும். சாமை ஆப்பம், தொட்டுக்க தேங்காய்ப் பால். தேங்காய்ப் பால்ல சர்க்கரை போடமாட்டோம். கரும்புச் சர்க்கரைதான் போடுவோம். கெமிக்கல் இல்லாம கருப்புக் கலர்ல இருக்கும் பால்…’’ ரெசிபிகளை லட்சுமி அடுக்கிக் கொண்டே போக சிறுதானிய உணவுகளில் இத்தனை வெரைட்டியா என நமக்கு மலைப்பாக இருக்கிறது.

சாப்பாடு, டிபன் தவிர சிறுதானியங்களில் செய்யப்பட்ட ஸ்நாக்ஸும் இங்கே கிடைக்கிறது. தினை முறுக்கு, கம்பு முறுக்கு, குதிரைவாலி முறுக்கு, சாமை முறுக்கு, வரகு கார சேவு, எள் உருண்டை, கடலை உருண்டை, ஜவ்வரிசி லட்டு என கார, இனிப்பு வகைகள்… ‘‘இங்கே சிறுதானியங்களை விற்கிறோம். அதை வாங்க வர்றவங்களுக்கு எப்படி செய்யறதுன்னு சொல்லியும் தர்றோம்’’ என்கிறார் லட்சுமி.

இந்த சிறுதானிய உணவகத்துக்கு மக்கள் மத்தியில் வரவேற்பு எப்படி இருக்கிறதாம்? ‘‘ரொம்ப நல்லா இருக்குன்னும் சொல்ல முடியாது. மோசம்னும் சொல்ல முடியாது. லாபம் பெருசா இல்லை. ஆனா, நாங்க லாபத்துக்காக இந்தத் தொழிலைப் பண்ணலையே..! என்ன… முன்னாடி தனியா வந்து சாப்பிட்டுட்டுப் போனவங்க, இப்போ குடும்பத்தோட வந்து சாப்பிட ஆரம்பிச்சிருக்காங்க…’’ புன்னகை சற்றும் குறையாமல் சொல்கிறார் லட்சுமி.

ஒரு நல்ல நோக்கத்தோடு லட்சுமி நடத்தும் இந்த உணவகத்தில் விலையும் அதிகமில்லை. மதிய சாப்பாடு 55 ரூபாய். அதையே பார்சலாக வாங்கிச் செல்வதென்றால் 60 ரூபாய்!

– பாலு சத்யா

மும்பையைக் கலக்கும் இட்லி, வடை!

Image

மும்பை… தமிழர்கள் வாழும் பகுதி அது… காலை ஏழுமணி… ரப்பர் பந்து பொருத்திய குழல் ஒன்றிலிருந்து ‘பீப்… பீப்’ என்கிற சத்தம் ஒலிக்கிறது. இந்த ஒலிதான் அந்த மக்களுக்கு அன்றாட தேவ கானம்… அந்த ஒலி அன்றையபிழைப்பு தொடங்கிவிட்டதற்கான அடையாளம்.

பத்தாம் வகுப்புப் படிக்கும் வயதில் சிறுவன்… அவன் தலையில் ஒரு பெரிய அலுமினிய அண்டா! அது முழுக்க இட்லிகளும் வடைகளும்! அதைச் சுற்றி சைக்கிள் டியூபினால் இறுக்கிக் கட்டப்பட்ட சில்வர் டப்பாக்களில் சட்னி, சாம்பார் மற்றும் பேப்பர் பிளேட்டுகள்! அந்தச் சிறுவன், அவனைப் போலவே உள்ள மற்றவர்களுடன் சேர்ந்து கொள்ள பாத யாத்திரை தொடங்குகிறது. கால் நடையாகவே வீடு விடாகச் சென்று இட்லி, வடை விற்கிறார்கள் இந்த ‘தலையேந்தி பவன்’ வியாபாரிகள்!

இவர்களுடைய இட்லி,வடையின் சுவை மும்பையில் வசிக்கும் மற்றமாநில மக்களையும் கவர்ந்திருப்பதுதான் ஆச்சரியம். நடுத்தர மக்கள் மட்டுமில்லாமல் சில மேல்தட்டு வர்க்கத்தைச் சேர்ந்தவர்களும்கூட இவர்களின் இட்லி, வடைக்கு பரம ரசிகர்களாகியிருக்கிறார்கள். 

Image

இந்த வியாபாரிகள் ஒருவர், இருவரல்ல… சுமார் ஆயிரம் பேர்! வியர்வை சிந்தி உழைக்கும், தினம் தினம் சாதனைபடைக்கும் ஒரு மனிதப் படையே இருக்கிறது. அதிகாலையில், மும்பையின் சென்ட்ரல்வெஸ்டர்ன் மற்றும் ஹார்பர் ரயில்களில் பயணம் செய்கிறார்கள். பிறகு, பல இடங்களுக்கு நடந்து சென்று எத்தனையோ பேரின் காலைப் பசிக்கு குறைந்த விலையில் உணவு தருகிறார்கள்.

அதிகாலை 3:30…  பேயும்உறங்கும்,திருடர்களுக்கு வசதியான நேரம்… அது இந்த சிறு வியாபாரிகளின் தொழில் தொடங்கும் நேரம். மும்பை தாராவியில் 90 அடி ரோட்டில், சாந்தி டவுனில் இருக்கும் இவர்களுடைய பதினைந்துக்குப் பதினைந்து அளவிலான  குடிசைகளில் டியூப் லைட்டுகள் எரிய ஆரம்பிக்கின்றன.பெரிய அலுமினிய அண்டாக்களை வணங்கி, அடுப்பிலேற்றி, அடுப்பைப் பற்ற வைக்கிறார்கள். (தொழிலுக்கு மரியாதை!) குடிசைக்கு வெளியே சாக்கடை ஓடுகிறது… வீட்டின்உள்ளேயோ கண்ணாடி போலப் பளபளக்கும் ‘பளிச்’ சுத்தம்.

சுமார் 500லிருந்து 700 குடும்பங்கள் இட்லி, வடை தயாரிக்கும்பணியில் ஈடுபட்டிருக்கின்றன. ஒரு வீட்டில், ஒருநாளைக்கு சராசரியாக 400 இட்லிகள் வார்க்கப்படுகின்றன. உதவிக்குபெண்களோ, ஓரிருவரோ கூட இருந்தால் அந்த எண்ணிக்கை ஆயிரத்தைத் தொடும். மலைக்க வைக்கும் எண்ணிக்கை..! ஒரு நாளைக்கு கிட்டத்தட்ட மூன்றுலட்சம் இட்லிகள் இங்கிருந்து தயாராகின்றன. ஏழு மணிக்குள்அவற்றை எடுத்துக் கொண்டு புறப்பட்டும்விடுகிறார்கள் இவர்கள்.  

இந்தத் தொழிலில் ஈடுபட்டிருப்பவர்களில் பெரும்பாலானவர்கள் மதுரை மாவட்டத்தில்இருந்து வந்தவர்கள் என்பது முக்கியமான செய்தி. ‘ஒருநாளைக்கு 400  ரூபாய் சம்பாதிக்கலாம்’ என்கிறார் மும்பையில் இப்படி இட்லி, வடை விற்கும் இளைஞர் ஒருவர். வியர்வைசிந்தி உழைக்கும் இவர்களுக்கு மற்ற சமுதாயத்தினரிடம் அதற்கான மரியாதையும்கிடைக்கிறது. இவர்களை ‘அண்ணாச்சி’ அல்லது ‘தம்பி’ என்றுதான் அழைக்கிறார்கள். 

இன்றைக்கு மும்பையின் புறநகர்களில் தெருவுக்குத் தெரு மண்டிக்கிடக்கும் ‘கை ஏந்தி பவன்’களின் ரிஷி மூலம் இந்த ‘தலை ஏந்தி’ பவன்களே! 

மதியம் 2 மணிக்கு வீடு திரும்புகிறார்கள் இந்த தலையேந்தி பவன் வியாபாரிகள். சிறிது நேரம் ஓய்வு… 5 மணிக்கு எழுந்து அரிசியையும் உளுந்தையும் ஊறப் போடுகிறார்கள். அடுத்த நாள் பிழைப்பு ஓட வேண்டுமே!

– உஷா ராமானுஜம்

Image courtesy:

http://jalebiink.com/ 

மயிலை மாமி உணவுத் திருவிழா!

Image

சென்னை சைவ உணவுப் பிரியர்களுக்குக் கொண்டாட்டம்! கமகமக்கும் நம் பாரம்பரிய சைவ உணவுகளின் மிக நீண்ட அணிவகுப்போடு நடக்க இருக்கிறது ‘மயிலை மாமி உணவுத் திருவிழா’. உணவுத் திருவிழாவில் ருசி கூட்டுவதற்காகவே கும்பகோணத்திலிருந்து பிரேமா மாமி வந்திருக்கிறார். மே 23ம் தேதியிலிருந்து ஜூன் 1ம் தேதி வரை நடக்க இருக்கிறது இந்த உணவுத் திருவிழா! 

இடம்: ஆலிவ்ஸ், மல்டி குஷன் ரெஸ்டாரன்ட் – டெக்கான் பிளாஸா, 36, ராயப்பேட்டை ஹை ரோடு, ராயப்பேட்டை, சென்னை-600 014.

வார இறுதி நாட்களில் (வெள்ளி, சனி மற்றும் ஞாயிறு) மதிய விருந்தும், இரவு விருந்தும் உண்டு. மற்ற நாட்களில் இரவு விருந்து மட்டும்..! 

Image

மயிலை மாமி உணவுத் திருவிழாவில் 23ம் தேதி இடம் பெறும் உணவுகளின் பட்டியல்…

WELCOME DRINK

PAANAKAM

NEER MOORE

STARTERS

MYSORE BONDA

KEERAI VADAI

SOUP

MURUNGAI KEERAI CHARU    

ACCOMPLIMENTS

KOSUMBARY

VAZHA THANDU THAIR PACHADI

SWEET PACHADI

4 TYPES PICKLES

TENGA THOYIAL

PEETHANGAI  THOYIAL

EALLU THOYIAL

GATTI THAIR

VARIETY OF SOUTH VADAMS / MOORE MILAGAI / 4 TYPES PODI /2 TYPE

MAIN COURSE

1. CHINNA VENGAYA SAMBAR

2. THAKKALI INGI RASAM

3. MANA THAKKALI VATHA KOZHAMBU

4.VENDAKAI MOORE KOZHAMBU

5.SEPANKAZHANGU VARUVAL

6.PODALNGAI PAL KOOTU

7.VAZHAKAI PULI KOOTU

8.BEANS USILI CURRY

9.CABBAGE PATTANI CURRY

10.ENNAI KATHRIKAI ARACHA CURRY

11.PULIODHARAI

12.KOTHAMALLI RICE

13.PLAIN RICE

14. TENGAI  SADAM

15.PLAIN SEVAI

16.KEERAI MASIYAL

17. 2 STARTERS

18 .STARTER

19.VAZHAKAI PODI MAS

20.GATTI PARUPPU

21.URLAI KARA KARI

DESSERTS

AKARA VADASAL

GOTHUMAI HALWA

POLI

MINI JANGIRI

MADHULA PAZHAM KESARI

MINI LADDU

RAWA LADDU

எல்லாமே ரூ.499/- (வரிகள் சேர்க்காமல்).

மேலும் தகவல்களுக்கு தொடர்பு கொள்ள…

98849 32022, 044-66773333.       

ஸ்பெஷல் ரெசிபி

பாம்பே மசால்

 Image

என்னென்ன தேவை?

பொடியாக நறுக்கிய வெங்காயம் – 1 கப், பொடியாக நறுக்கிய தக்காளி – 1/2 கப், மிகப் பொடியாக நறுக்கிய பச்சை மிளகாய் – 7, மஞ்சள் தூள் – 1/4 டீஸ்பூன், மிளகாய் தூள் – 1/4 டீஸ்பூன், கடலை மாவு – 2 டீஸ்பூன், உப்பு – தேவையான அளவு, தண்ணீர் – 1 கப், எண்ணெய்,  கடுகு, உளுத்தம் பருப்பு – தாளிக்கத் தேவையான அளவு, பொடியாக நறுக்கிய கறிவேப்பிலை, கொத்தமல்லித்தழை – சிறிது.

எப்படிச் செய்வது?

கடாயில் எண்ணெய் விட்டு கடுகு, உளுத்தம் பருப்பு தாளிக்கவும்.  வெங்காயம், பச்சை மிளகாய் சேர்த்து வதக்கவும். அதில்தக்காளியை சேர்த்து இரண்டு நிமிடம் வதக்கி ஒரு கப் தண்ணீர் விட்டுக் கொதிக்கவிடவும். கடலை மாவை கொஞ்சம் தண்ணீர் விட்டு, கட்டியில்லாமல் நீர்க்கக் கரைத்து வைக்கவும். கலவை கொதித்ததும் மஞ்சள் தூள், மிளகாய் தூள், உப்பு சேர்க்கவும்.  கரைத்து வைத்திருக்கும்  கடலை மாவையும் சேர்க்கவும். அடுப்பை அதிக தீயில் வைத்துக் கிளறிவிடவும். இரண்டு நிமிடத்தில் கெட்டியான மசால் ரெடி. இறக்குமுன் கறிவேப்பிலை, கொத்தமல்லித்தழை சேர்க்கவும்.

 * கடலை மாவை கொஞ்சம் கெட்டியாகக் கரைக்கலாம். தேவைப்பட்டால் கொஞ்சம் தண்ணீரை பிறகு சேர்த்துக் கொள்ளலாம். கிளறிவிடாவிட்டால் மசாலா கெட்டிதட்டி விடும். இதிலேயே கடலை மாவுக்கு பதில் பொட்டுக்கடலை, தேங்காய், சோம்பு இஞ்சி, பூண்டு போட்டால் குருமா ஆகிவிடும். தோசை, பூரிக்குத் தொட்டுக்கொள்ள பிரமாதமான பதார்த்தம்.

 – விஜி ராம்

14 இன் 1 – சத்துமாவு சர்ப்ரைஸ்!

மதுமிதா

 Image

சத்தான மாவிலே அத்தனையும் செய்யலாம் செம ருசியாக!

சத்துமாவு தயார் செய்ய…

தானியங்கள் அனைத்தும் ஒரே அளவு எடுத்துக்கொள்ளவும். கம்பு, கேப்பை (கேழ்வரகு), வெள்ளைச் சோளம், தினை, கோதுமை, புழுங்கலரிசி, பச்சரிசி சிறு தானியங்கள் அனைத்தையும் தனித்தனியாக மண் நீக்கி, கழுவி, வெயிலில் உலர்த்தி, வறுத்து ஆற வைத்து, ஒன்றாகக் கலந்து மில்லில் நைசாக அரைத்துக் கொள்ளவும். இதனுடன் பொட்டுக்கடலை, நிலக்கடலையும் சேர்த்து அரைத்துக் கொள்ளலாம். இந்த மாவு சத்துமாவு கஞ்சிக்கு மட்டும் பயன்படுத்த என்றால், இதனுடன் நாலுக்கு ஒரு பங்கு என முந்திரி, பாதாம் பருப்புகளும், வாசனைக்குத் தேவையெனில் சிறிது ஏலக்காயும் சேர்க்கலாம். இங்கு கொடுக்கப்பட்டுள்ள மற்ற வகை பதார்த்தங்கள் செய்ய மு.பருப்பு, பா.பருப்பு, ஏலக்காய் சேர்க்க வேண்டியதில்லை.

1. சத்துமாவு கஞ்சி  

Image

என்னென்ன தேவை?

சத்துமாவு, பனங்கற்கண்டு அல்லது வெல்லம், பால்.

எப்படிச் செய்வது?

சத்துமாவில், தூசி நீக்கிய வெல்லம் அல்லது பனங்கற்கண்டு தேவையான அளவு சேர்த்து, மாவு அளவில் 4 மடங்கு நீர் சேர்த்துக் கிளறவும். நீர்க்க இருந்தது கஞ்சி போல கெட்டியாகும் போது,  தேவையான பால் விட்டு லேசாக கிளறி இறக்கவும். ஹார்லிக்ஸ் போல சூடாகக் குடிக்கலாம்.

* கூல் கஞ்சி: ஆற வைத்து ஃபிரிட்ஜில் வைத்தும் கூல் கஞ்சியாக ஸ்பூனில் எடுத்தும் சாப்பிடலாம்! 

2. சத்துமாவு உருண்டை 

Image

என்னென்ன தேவை?

சத்துமாவு, வெல்லம், நெய் அல்லது நல்லெண்ணெய், ஏலக்காய் தூள் சிறிது.

எப்படிச் செய்வது?

இதை அடுப்பில் வைக்க வேண்டியதில்லை. மாவை வறுத்து அரைத்திருப்பதால் அப்படியே சாப்பிடலாம். பச்சை வாடை தெரியாது.

வெல்லத்தில் நீர்விட்டு தூசு எடுத்துவிட்டு சத்து மாவு, ஏலக்காய் தூள் சேர்க்கவும். நன்றாக கெட்டியாகப் பிசைந்து சிறிதளவு நெய் அல்லது நல்லெண்ணெய் சேர்த்து உருண்டை பிடிக்கவும். 

3. புட்டு

என்னென்ன தேவை?

சத்துமாவு, தேய்காய்த் துருவல், லேசாக வறுத்த வெள்ளை எள்.

எப்படிச் செய்வது?

சிறிது வெந்நீரை லேசாக மாவில் தெளித்து உதிரியாக பிசறிக்கொள்ளவும். வெள்ளை எள்ளை லேசாக வறுத்துக் கொள்ளவும். இட்லி தட்டில் வெந்நீர் விட்டு உதிரியாகப் பிசைந்து வைத்த மாவை வைக்கவும். தேங்காய்த் துருவலையும், வறுத்த எள்ளையும் மாவின் மேல் போட்டு வேக வைக்கவும்.

* இனிப்புப் புட்டு 

Image

வேக வைத்த புட்டுடன் தேவையான அளவு ஏலக்காய், சர்க்கரை கலந்து நெய்யில் வறுத்த முந்திரிப்பருப்பைச் சேர்க்கவும்.

* வெல்லப் புட்டு 

Image

வேக வைத்த புட்டுடன் தேவையான அளவு வெல்லம், ஏலக்காய் கலந்து நெய்யில் வறுத்த முந்திரிப்பருப்பைச் சேர்க்கவும்.

* காரப் புட்டு 

Image

கடுகு, உளுந்தம் பருப்பு, கடலைப்பருப்பு, மிளகு, கறிவேப்பிலை, பொடியாக நறுக்கிய பச்சை மிளகாய், இஞ்சி, வெங்காயம், மிளகாய் வத்தல் தாளித்து, பெருங்காயத்தூள், தேவையான உப்புச் சேர்த்து, வேக வைத்து இறக்கிய புட்டை சேர்த்துக் கிளறவும். நெய்யில் வறுத்த முந்திரிப்பருப்பு சேர்க்கவும்.

4. கார கொழுக்கட்டை 

Image

என்னென்ன தேவை?

சத்துமாவு.

தாளிக்க…

நல்லெண்ணெய், கடுகு, உளுந்தம்பருப்பு, கடலைப்பருப்பு, மிளகு, கறிவேப்பிலை, மிளகாய் வற்றல், பச்சை மிளகாய், இஞ்சி, வெங்காயம், தேங்காய் (பொடியாக நறுக்கியது), உப்பு.

எப்படிச் செய்வது?

இவை அனைத்தையும் சேர்த்து தாளித்ததும், சத்துமாவை சேர்த்து லேசாக நீர் தெளித்து கொழுக்கட்டை செய்ய வரும் அளவில் உருட்டி எடுத்துக் கொள்ளவும். இட்லித் தட்டில் கொழுக்கட்டை பிடித்து வைத்து வேக வைத்து எடுக்கவும்.

5. இனிப்பு கொழுக்கட்டை 

Image

என்னென்ன தேவை?

சத்துமாவு,  வெல்லம், பொடியாக நறுக்கிய தேங்காய், நெய் அல்லது நல்லெண்ணெய்,  தேவையெனில் சிறிது ஏலக்காய்த்தூள், வறுத்த முந்திரி.

எப்படிச் செய்வது?

வெல்லத்தில் நீர் விட்டு, தூசு எடுத்துவிட்டு, சத்துமாவு, சிறிது நெய் அல்லது நல்லெண்ணெய் சேர்த்துப் பிசையவும். பொடியாக நறுக்கிய தேங்காய், வறுத்த முந்திரி சேர்க்கவும். நன்றாக கெட்டியாகப் பிசைந்து கொழுக்கட்டை பிடிக்கவும். இட்லித் தட்டில் வேக வைத்து எடுக்கவும்.

6. சத்துமாவு நிப்பட்டி 

Image

Image

என்னென்ன தேவை?

சத்துமாவு, பச்சை மிளகாய், இஞ்சி, வெங்காயம், தேங்காய் (பொடியாக நறுக்கியது), மிளகு, கறிவேப்பிலை, நல்லெண்ணெய், உப்பு.

எப்படிச் செய்வது?

எண்ணெய் தவிர அனைத்தையும் லேசாக தண்ணீர் விட்டு பிசைந்து வைக்கவும். மாவு இனிப்பாக இருக்கும் என்பதால் கொஞ்சம் அளவு அதிகமாகவே காரம் சேர்க்கலாம். சப்பாத்தி உருண்டை செய்வது போல கொஞ்சம் பெரிய அளவில் எடுத்து, கையாலேயே தட்டி அப்படியே தோசைக்கல்லில் போட்டு, அதிலும் லேசாக தட்டி அளவை பெரிதாக்கலாம். இல்லையெனில் ஒரு டிபன் ப்ளேட்டை பின்பக்கமாகத் திருப்பி, லேசாக எண்ணெய் தடவி, உருண்டையை வைத்து கையாலேயே தட்டி தோசை போல வட்டமாக விரித்து தோசைக்கல்லில் போடலாம். நல்லெண்ணெய் விட்டு ஒரு பக்கம் வெந்ததும், திருப்பிப்போட்டு நல்லெண்ணெய் விட்டு மறு பக்கமும் கொஞ்சம் வெந்து நிறம் மாறியதும் எடுக்கவும். சுவையான சத்துமாவு நிப்பட்டி அல்லது அடை தயார்.

7. சத்துமாவு தோசை 

Image

என்னென்ன தேவை?

சத்துமாவு – 5 பங்கு, உளுந்தம் பருப்பு – 1 பங்கு, உப்பு – தேவையான அளவு.

எப்படிச் செய்வது?

உளுந்தம் பருப்பை ஒரு மணி நேரம் ஊறவைக்கவும். மிக்ஸியில் நீர் சேர்த்து நைசாக அரைக்கவும். உப்புச் சேர்க்கவும். அரைத்த உளுந்த மாவுடன் சத்துமாவு சேர்த்து தோசை மாவு பக்குவத்தில் கரைத்து அரை மணிநேரம் ஊற வைக்கவும். இப்போது தோசை சுடலாம்.

8. சத்துமாவு முறுக்கு 

Image

என்னென்ன தேவை?

சத்துமாவு – 6 பங்கு, உளுந்தம் பருப்பு – 1 பங்கு, வெள்ளை எள், சீரகம், உப்பு, பொரிக்க தேவையான எண்ணெய்.

எப்படிச் செய்வது?

உளுந்தம் பருப்பை நன்றாகக் கழுவி நைசாக வேக வைக்கவும். வெந்தவுடன் நன்றாக மசித்து, எண்ணெய் தவிர மற்ற அனைத்தையும் சேர்த்துப் பிசைந்து வைக்கவும். கடாயில் எண்ணெய் ஊற்றிக் காய்ந்ததும், முறுக்கு சில் போட்டுப் பிழிந்து எடுக்கவும்.

* முறுக்கு, சீவல், ஓமப்பொடி செய்யும்போது முதல் முறை செய்யும் அளவு சரி பார்த்து அளவு சேர்க்கவும். வேக வைத்த பருப்பின் அளவின்படி அதில் இருக்கும் நீர் அளவுக்கு தகுந்தாற்போல சத்துமாவு அளவைச் சேர்க்க வேண்டும். பிசையும் போது சிறிது எண்ணெய் சேர்க்கலாம்.

9. சத்துமாவு முள்முறுக்கு 

Image

என்னென்ன தேவை?

சத்துமாவு –  6 பங்கு, பாசிப் பருப்பு – 1 பங்கு, வெள்ளை எள், சீரகம்,  உப்பு – சிறிது, பொரிக்கத் தேவையான எண்ணெய்.

எப்படிச் செய்வது?

பாசிப் பருப்பை நன்றாகக் கழுவி நைசாக வேக வைக்கவும். வெந்தவுடன் நன்றாக மசித்து, எண்ணெய் தவிர மற்ற அனைத்தையும் சேர்த்துப் பிசைந்து வைக்கவும். கடாயில் எண்ணெய் ஊற்றிக் காய்ந்ததும், முள்முறுக்கு சில் போட்டு பிழிந்து எடுக்கவும்.

10. சத்துமாவு சீவல் 

Image

என்னென்ன தேவை?

சத்துமாவு – 4 பங்கு, கடலை மாவு – 1 பங்கு, வெள்ளை எள், சீரகம், உப்பு – சிறிது, பொரிக்கத் தேவையான எண்ணெய்.

எப்படிச் செய்வது?

எண்ணெய் தவிர மற்ற அனைத்தையும் சேர்த்துப் பிசைந்து வைக்கவும். கடாயில் எண்ணெய் ஊற்றி காய்ந்ததும், சீவல் சில் போட்டுப் பிழிந்து எடுக்கவும்.

 * பாசிப் பருப்பு முறுக்கு மாவு போலச் செய்தும் சீவல் பிழியலாம்.

11. சத்துமாவு ஓமப்பொடி 

Image

என்னென்ன தேவை?

சத்துமாவு – 4 பங்கு, கடலை மாவு – 1 பங்கு, வெள்ளை எள், சீரகம், உப்பு – சிறிது, பொரிக்கத் தேவையான எண்ணெய்.

எப்படிச் செய்வது?

எண்ணெய் தவிர மற்ற அனைத்தையும் சேர்த்துப் பிசைந்து வைக்கவும். கடாயில் எண்ணெய் ஊற்றி, காய்ந்ததும், ஓமப்பொடி சில் போட்டுப் பிழிந்து எடுக்கவும்.

 * பாசிப் பருப்பு முறுக்கு மாவு போலச் செய்தும் ஓமப்பொடி பிழியலாம்.

12. சத்துமாவு வடை 

Image

என்னென்ன தேவை?

சத்துமாவு, பச்சை மிளகாய் – 2, இஞ்சி – சிறிது, வெங்காயம் – 1, தேங்காய் – கால் மூடி (பொடியாக நறுக்கியது), மிளகு – 5, கறிவேப்பிலை, உப்பு – சிறிது.

எப்படிச் செய்வது?

பொடியாக நறுக்கிய அனைத்தையும் ஒரு பாத்திரத்தில் எடுத்து சிறிது நீருடன் சத்துமாவும் சேர்த்துப் பிசையவும். கடாயில் எண்ணெய் ஊற்றி, மாவை உருண்டை செய்து வடையாகத் தட்டி பொரித்தெடுக்கவும்.

 * பொடியாக நறுக்கிய முட்டைக்கோஸ் சேர்க்கலாம்.

13. சத்துமாவு பக்கோடா 

Image

என்னென்ன தேவை?

சத்துமாவு, பச்சை மிளகாய் – 2, இஞ்சி – சிறிது, வெங்காயம் – 2, தேங்காய் – கால் மூடி (பொடியாக நறுக்கியது), மிளகு – 5, கறிவேப்பிலை, உப்பு – சிறிது.

எப்படிச் செய்வது?

பொடியாக நறுக்கிய அனைத்தையும் ஒரு பாத்திரத்தில் எடுத்து, சிறிது நீருடன் சத்துமாவும் சேர்த்துப் பிசையவும். கடாயில் எண்ணெய் ஊற்றி, மாவை எடுத்து சிறு உருண்டையாக உதிர்த்துப் பொரித்தெடுக்கவும்.

14. சத்துமாவு இடியாப்பம்

என்னென்ன தேவை?

சத்துமாவு, உப்பு.

எப்படிச் செய்வது?

தேவையான சத்துமாவில் சிறிது உப்புச் சேர்த்து, வெந்நீர் தெளித்துப் பிசைந்து கொள்ளவும். இடியாப்ப சில்லில் பிழிந்து, இட்லி தட்டில் வேகவைத்து எடுத்துக்கொள்ளவும்

* இனிப்பு இடியாப்பம்

பிழிந்து வேக வைத்த இடியாப்பத்தை உதிர்த்து, தேங்காய்த் துருவல், சர்க்கரை, ஏலக்காய் தூள் சேர்த்து, நெய்யில் வறுத்த முந்திரிப்பருப்பு சேர்த்தால் இனிப்பு இடியாப்பம் தயார். பால், சர்க்கரையோடும் சாப்பிடலாம்.

* கார இடியாப்பம் 

தாளிக்க…

கடுகு, உளுந்தம் பருப்பு, கடலைப் பருப்பு – தலா 1/2 ஸ்பூன், பச்சை மிளகாய் – 2, மிளகாய் வற்றல் – 1, இஞ்சி – சிறிது, பெல்லாரி வெங்காயம் – 1 (பொடியாக நறுக்கியது), மிளகு – 5, கறிவேப்பிலை சிறிது, எண்ணெய் – தேவையான அளவு.

தாளிக்க கொடுத்தவற்றைத் தாளித்து, பிழிந்து வேகவைத்த இடியாப்பத்தை உதிர்த்துச் சேர்த்துக் கிளறி, நெய்யில் வறுத்த முந்திரிப்பருப்புச் சேர்த்தால் சத்துமாவு கார இடியாப்பம் தயார்.

Image

14 இன் 1 – பீட்ரூட் பிரமாதங்கள்!

பொரியலாக மட்டுமே பெரும்பாலும் பயன்படுத்தப்படும் பீட்ரூட்டில் கோலாவும் செய்யலாம்… கோலாகலமாக பாயசமும் சுவைக்கலாம்!

1. பீட்ரூட் பொரியல் 

Image

என்னென்ன தேவை?

பீட்ரூட் – 1, பாசிப்பருப்பு – 2 டேபிள்ஸ்பூன், தேங்காய்த் துருவல் – தேவையான அளவு, உப்பு – 1 டீஸ்பூன்.

தாளிக்க…

எண்ணெய் – சிறிது, கடுகு – 1/2 டீஸ்பூன், உளுத்தம் பருப்பு – 1/2 டீஸ்பூன், பெரிய வெங்காயம் – 1, பச்சை மிளகாய் – 3, மிளகாய் வற்றல் – 2, பெருஞ்சீரகம் – 1 டீஸ்பூன், கறிவேப்பிலை – சிறிதளவு.

எப்படிச் செய்வது?

பாசிப்பருப்பைக் கழுவி 10 நிமிடங்கள் ஊற வைக்கவும். பீட்ரூட்டை தோல் சீவி, நன்றாகக் கழுவி, சிறிய துண்டுகளாக நறுக்கிக் கொள்ளவும். கடாயில் எண்ணைய் விட்டு, கடுகு, உளுத்தம் பருப்பு தாளிக்கவும். பெருஞ்சீரகம், கறிவேப்பிலை சேர்க்கவும். நறுக்கிய வெங்காயத்தையும் பச்சை மிளகாயையும் சேர்க்கவும். மிளகாய் வற்றலையும் சேர்த்து வதக்கவும். வெங்காயம் நன்றாக வதங்கியவுடன், பீட்ரூட் சேர்த்து வதக்கவும். பாசிப்பருப்பையும் சேர்க்கவும். மூடியால் மூடி, நெருப்பைக் குறைத்து சிம்மில் வேக வைக்கவும். தண்ணீர் சேர்க்காமல் கிளறி விடவும். தேவையெனில் லேசாக தண்ணீர் தெளித்து வேக வைக்கலாம். பீட்ரூட் வெந்ததும், உப்பு போட்டுக் கிளறி தேங்காய்த் துருவல் சேர்க்கவும்.

* பாசிப்பருப்பை முதலிலேயே உதிரியாக வேக வைத்து வைத்துக்கொண்டு, தேங்காய்த்துருவல் சேர்க்கும் போதும் சேர்க்கலாம்.

2. பீட்ரூட் துருவல் 

Image

என்னென்ன தேவை?

பீட்ரூட் – 1, தேங்காய்த் துருவல் – தேவையான அளவு, உப்பு – 1 டீஸ்பூன்.

தாளிக்க…

எண்ணெய் – சிறிதளவு, கடுகு – 1/2 டீஸ்பூன், உளுந்தம் பருப்பு – 1/2 டீஸ்பூன், கறிவேப்பிலை – சிறிதளவு, பெரிய வெங்காயம் – 1,

பச்சை மிளகாய் – 3, மிளகாய் வற்றல் – 2, பெருஞ்சீரகம் – 1 டீஸ்பூன்.

எப்படிச் செய்வது?

பீட்ரூட்டை தோல் சீவி நன்றாகக் கழுவி, துருவி வைத்துக்கொள்ளவும். கடாயில் எண்ணெய் விட்டு, தாளிக்கக் கொடுத்தவற்றைத் தாளித்து, துருவிய பீட்ரூட்டை சேர்க்கவும். லேசான தீயில் கிளறி விடவும். மூடியால் மூடி, கிளறிவிட்டு வெந்ததும் உப்பு, தேங்காய்த் துருவல் சேர்த்து இறக்கவும்.

3. பீட்ரூட் உசிலி 

Image

என்னென்ன தேவை?

பீட்ரூட் – 1, கடலைப் பருப்பு – 50 கிராம், உப்பு – 1 டீஸ்பூன், தேங்காய்த் துருவல் – தேவையான அளவு.

தாளிக்க…

எண்ணெய் – சிறிதளவு, கடுகு – 1/2 டீஸ்பூன், உளுந்தம் பருப்பு – 1/2 டீஸ்பூன், பெரிய வெங்காயம் – 1, பச்சை மிளகாய் – 4, மிளகாய் வற்றல் – 2, பெருஞ்சீரகம் – 1 டீஸ்பூன், கறிவேப்பிலை – சிறிதளவு.

எப்படிச் செய்வது?

கடலைப்பருப்பைக் கழுவி ஒரு மணிநேரம் ஊற வைக்கவும். மிக்ஸியில் அரைத்து எடுத்துக்கொள்ளவும். பீட்ரூட்டை தோல் சீவி, நன்றாகக் கழுவி, சிறிய துண்டுகளாக நறுக்கிக்கொள்ளவும். தண்ணீர் விட்டு வேக வைத்து தனியே எடுத்துக்கொள்ளவும். தாளிக்கக் கொடுத்தவற்றைத் தாளித்து மிக்ஸியில் அரைத்து எடுத்து வைத்திருக்கும் கடலைப் பருப்பையும் போட்டு நன்றாக வதக்கிக்கொள்ளவும். வதங்கியதும், வேக வைத்த பீட்ரூட் சேர்த்து உப்பு, தேங்காய்த் துருவல் கலந்து இறக்கவும்.

4. பீட்ரூட் ரைஸ் 

Image

உசிலியுடன் தேவையான சாதத்தைக் கலந்தால் பீட்ரூட் ரைஸ் தயார்.

5. பீட்ரூட் சத்துப் பொரியல்

Beet Poriyal

என்னென்ன தேவை?

பீட்ரூட் – 1, நிலக்கடலை – 50 கிராம், தேங்காய் – கால்மூடி (பொடியாக நறுக்கியது), மஞ்சள் தூல் – 1/2 டீஸ்பூன், தனி வற்றல் தூள் – 1 டீஸ்பூன், உப்பு – 1 டீஸ்பூன், கறிமசால் தூள் – 1 டீஸ்பூன்.

தாளிக்க…

எண்ணெய் – சிறிதளவு, கடுகு – 1/2 டீஸ்பூன், உளுந்தம் பருப்பு – 1/2 டீஸ்பூன், பெரிய வெங்காயம் – 1, பச்சை மிளகாய் – 4, மிளகாய் வற்றல் – 2, பெருஞ்சீரகம் – 1 டீஸ்பூன், கறிவேப்பிலை – தேவையான அளவு.

எப்படிச் செய்வது?

பீட்ரூட்டை தோல் சீவி, நன்றாகக் கழுவி, சிறிய துண்டுகளாக நறுக்கிக் கொள்ளவும். தண்ணீர் விட்டு வேக வைத்து, தனியே எடுத்துக்கொள்ளவும். நிலக்கடலைப் பருப்பை வறுக்கவும். தாளிக்கக் கொடுத்தவற்றைத் தாளித்து, வறுத்த நிலக்கடலைப்பருப்பு, நறுக்கிய தேங்காய், மஞ்சள் தூள், தனி வற்ற்ல் தூள் சேர்த்து வதங்கியதும், வேக வைத்த பீட்ரூட் சேர்த்து, உப்பு, கறிமசால் தூள் சேர்த்து இறக்கவும்.

6. பீட்ரூட் சத்து சாதம் 

Image

பீட்ரூட் சத்துப் பருப்புப் பொரியலை, தேவையான சாதத்துடன் கலந்தால் பீட்ரூட் சத்து சாதம் தயார்.

7. பீட்ரூட் பச்சடி 

Image

பீட்ரூட்டை கழுவி, தோலுடன் 5 நிமிடம் வேக வைத்து தோல் சீவி, துருவி வைத்துக் கொள்ளவும். தேவையான தயிரில் பொடியாக நறுக்கிய வெங்காயம், பச்சை மிளகாய், உப்பு, கறிவேப்பிலை, கொத்தமல்லி ஆகியவற்றுடன் வேக வைத்துத் துருவிய பீட்ரூட்டை தேவையான அளவில் சேர்க்கவும்.

8. பீட்ரூட் கோலா

beetroot Kola

என்னென்ன தேவை?

பீட்ரூட் – 1, கடலைப் பருப்பு அல்லது துவரம்பருப்பு – 200 கிராம்

பெரிய வெங்காயம் – 1, பச்சை மிளகாய் – 1, மிளகாய் வற்றல் – 4, பெருஞ்சீரகம் – 1 டீஸ்பூன், எண்ணெய் – தேவையான அளவு,

உப்பு – தேவையான அளவு.

எப்படிச் செய்வது?

பருப்பை ஒரு மணி நேரம் ஊற வைக்கவும். பருப்புடன் மிளகாய் வற்றல், பெருஞ்சீரகம், உப்பு சேர்த்து நன்றாக அரைக்கவும். பீட்ரூட்டைத் தோல் எடுத்து கழுவித் துருவி வைக்கவும்.

பொடியாக நறுக்கிய வெங்காயம், பச்சை மிளகாயை பீட்ரூட் துருவல் மற்றும் அரைத்த பருப்பு விழுதுடன் சேர்த்து சிறிய உருண்டைகளாக உருட்டி வைத்துக் கொள்ளவும்.

கடாயில் எண்ணெய் விட்டு சூடானதும், உருண்டைகளை ஒவ்வொன்றாகப் போட்டு பொன்னிறமாக வெந்ததும் எடுத்துப் பரிமாறவும்.

9. பீட்ரூட் வடை

Beetroot vadai

என்னென்ன தேவை?

பீட்ரூட் – 1, கடலைப் பருப்பு – 200 கிராம், பெரிய வெங்காயம் – 2,

பச்சை மிளகாய் – 1, இஞ்சி – சிறிது, தேங்காய் கால் மூடி – பொடியாக நறுக்கியது, மஞ்சள் தூள் – 1/4 டீஸ்பூன், மிளகாய் வற்றல் – 4, பெருஞ்சீரகம் – 1 ஸ்பூன், எண்ணெய் – தேவையான அளவு, உப்பு – தேவையான அளவு.

எப்படிச் செய்வது?

கடலைப் பருப்பை ஒரு மணி நேரம் ஊற வைக்கவும். பருப்புடன் மிளகாய் வற்றல், பெருஞ்சீரகம், உப்பு சேர்த்து நன்றாக அரைக்கவும். பீட்ரூட்டைத் தோல் எடுத்து கழுவித் துருவி வைக்கவும். பொடியாக நறுக்கிய வெங்காயம், இஞ்சித்துண்டு, பச்சை மிளகாய், தேங்காய் மற்றும் மஞ்சள் தூளை பீட்ரூட் துருவல் மற்றும் அரைத்த பருப்பு விழுதுடன் சேர்த்து சிறிய உருண்டைகளாக உருட்டி வைத்துக் கொள்ளவும். கடாயில் எண்ணெய் விட்டு சூடானதும், உருண்டைகளை ஒவ்வொன்றாக எடுத்து, வடை வடிவில் தட்டிப் போடவும். பொன்னிறமாக வெந்ததும் எடுத்துப் பரிமாறவும்.

10. பீட்ரூட் துவையல்

OLYMPUS DIGITAL CAMERA

என்னென்ன தேவை?

பீட்ரூட் – 1, பாசிப் பருப்பு – 2 டேபிள்ஸ்பூன், மிளகாய் வற்றல் – 6,

நல்லெண்ணெய் –  2 டேபிள்ஸ்பூன், தேங்காய் – பாதி மூடி, சீரகம் – 2 டீஸ்பூன், பூண்டு – 4 பல், கறிவேப்பிலை – சிறிது, புளி – தேவையான அளவு, உப்பு – தேவையான அளவு.

தாளிக்க…

கடுகு, கறிவேப்பிலை, பெருங்காயத்தூள்.

எப்படிச் செய்வது? 

பீட்ரூட்டை தோல்சீவி, கழுவி, பொடியாக நறுக்கிக் கொள்ளவும். கடாயியில் எண்ணெய் காய்ந்ததும் பாசிப் பருப்பு, சீரகம், வெள்ளைப்பூண்டு, மிளகாய் வற்றல், கறிவேப்பிலை இட்டு வதக்கவும். பாசிப் பருப்பு சிவப்பதற்கு முன்பே நறுக்கிய பீட்ரூட்டுடன், துருவிய தேங்காய், புளி, உப்பு சேர்த்து, வதங்கியதும் இறக்கவும். நன்றாக ஆறியவுடன் மிக்ஸியில் நைசாக அரைக்க வேண்டும். கிண்ணத்தில் எடுத்து கடுகு, கறிவேப்பிலை, பெருங்காயத்தூள் போட்டு தாளித்துப் பரிமாறவும்.

11. பீட்ரூட் அல்வா

Beetroot halwa 1

என்னென்ன தேவை?

பீட்ரூட் – 1, பால் – 200 மி.லி., சர்க்கரை – 200 கிராம் அல்லது தேவையான அளவு, ஏலக்காய் – 5 பொடித்தது, ரீஃபைண்ட் ஆயில், நெய் – தேவையான அளவு, முந்திரிப் பருப்பு, கிஸ்மிஸ் பழம் – தலா 10.

எப்படிச் செய்வது?

பீட்ரூட்டை நன்றாகக் கழுவி தோல் சீவி துருவவும். மிக்ஸியில் நைஸாக அரைக்கவும். ரீஃபைண்ட் ஆயிலில் லேசாக வதக்கி, பால் சேர்த்து வேக வைக்கவும். வெந்ததும் சர்க்கரை சேர்க்கவும். கிளறி, சுருள வரும்போது, ஏலக்காய் சேர்க்கவும். நெய்யில் முந்திரிப் பருப்பு, கிஸ்மிஸ் பழம் வறுத்து, இதில் நெய்யோடு சேர்த்துக் கிளறி இறக்கவும்.

12. பீட்ரூட் துருவல் அல்வா 

Image

என்னென்ன தேவை?

பீட்ரூட் – 1, வெல்லம் – 200 கிராம், பால் – 200 மி.லி., ஏலக்காய் – 5 (பொடித்தது), ரீஃபைண்ட் ஆயில் – சிறிது, நெய் – சிறிது, முந்திரிப் பருப்பு, கிஸ்மிஸ் பழம் – தலா 10.

எப்படிச் செய்வது?

பீட்ரூட்டை நன்றாகக் கழுவி தோலுடன் வேக வைக்கவும். தோல் சீவி பீட்ரூட்டைத் துருவவும். கடாயில் ரீஃபைண்ட் ஆயில் விட்டு துருவிய பீட்ரூட்டை போட்டு லேசாக வதக்கவும். பால் விட்டு கெட்டியாகும் வரை வேக வைக்கவும். தூள் செய்த வெல்லம் சேர்க்கவும். ஏலக்காய்த் தூள் சேர்க்கவும். நெய்யில் முந்திரிப் பருப்பு, கிஸ்மிஸ் பழம் வறுத்து, நெய்யுடன் அல்வாவில் சேர்க்கவும்.

* வெல்லத்துக்கு பதிலாக சர்க்கரை சேர்த்தும் செய்யலாம். இனிப்பு தேவைக்கேற்ப அதிகமாகவோ குறைவாகவோ சேர்க்கலாம்.

13. பீட்ரூட் கீர் 

Image

என்னென்ன தேவை?

பீட்ரூட் – 1, பால் – 200 மி.லி., சர்க்கரை – 200 கிராம் அல்லது சுவைக்கேற்ப, ஏலக்காய் – 5 (பொடித்தது), ரீஃபைண்ட் ஆயில், நெய் – சிறிது, முந்திரிப் பருப்பு, கிஸ்மிஸ் பழம் – தலா 10.

எப்படிச் செய்வது?

பீட்ரூட்டை நன்றாகக் கழுவி தோல் சீவி துருவவும். மிக்ஸியில் நைஸாக அரைக்கவும். ரீஃபைண்ட் ஆயிலில் லேசாக வதக்கி, தண்ணீர், பால் சேர்த்து வேக வைக்கவும். மிக்ஸியில் அரைமூடி தேங்காய், ஏலக்காய் சேர்த்து அரைத்து இதில் சேர்க்கவும். சர்க்கரை சேர்க்கவும். நெய்யில் முந்திரிப்பருப்பு, கிஸ்மிஸ் பழம் வறுத்து, இதில் நெய்யோடு சேர்த்துக் கிளறி இறக்கவும்.

14. பீட்ரூட் பாயசம்

Image

என்னென்ன தேவை?

பீட்ரூட் – 1, வெல்லம் – 200 கிராம், பால் – 200 மி.லி., ஏலக்காய் – 5 (பொடித்தது), ரீஃபைண்ட் ஆயில், நெய் – சிறிது, முந்திரிப் பருப்பு, கிஸ்மிஸ் பழம் – தலா 10, தேங்காய் – அரை மூடி.

எப்படிச் செய்வது?

பீட்ரூட்டை நன்றாகக் கழுவி தோலுடன் வேக வைக்கவும். தோல் சீவி, பீட்ரூட்டைத் துருவவும். கடாயில் ரீஃபைண்ட் ஆயில் விட்டு துருவிய பீட்ரூட்டைப் போட்டு லேசாக வதக்கவும். தண்ணீருடன் பால் விட்டு லேசாக வேக வைக்கவும். மிக்ஸியில் அரைமூடி தேங்காய், ஏலக்காய் சேர்த்து அரைத்து இதில் சேர்க்கவும். தூள் செய்த வெல்லம் சேர்க்கவும். நெய்யில் முந்திரிப் பருப்பு கிஸ்மிஸ் பழம் வறுத்து நெய்யுடன் சேர்க்கவும். இனிப்பு தேவையான அளவில் அதிகமாகவோ குறைவாகவோ சேர்க்கலாம்.

– மதுமிதா

***