நூல் அறிமுகம் – 11 – செல்லமே…

Chellamae_Wrapper

குழந்தை வளர்ப்பை ‘கலை’ என்று சொல்கிறார்கள் மேற்கத்திய நாடுகளைச் சேர்ந்தவர்கள். ஆங்கிலத்தில் இது ‘The art of Parenting’ என்று அழைக்கப்படுகிறது. இதற்காகவே சிறப்பு வகுப்புகள், முகாம்கள் என்று பெற்றோருக்கு பல பயிற்சிகள் வழங்கப்பட்டு வருகின்றன. இப்போது இந்தியாவிலும் ‘குழந்தை வளர்ப்புக்கலை’க்கான அழுத்தமான தேவை ஏற்பட்டிருக்கிறது.

இருபது ஆண்டுகளுக்கு முன்பு வரை கூட இந்தியாவில் குழந்தை வளர்ப்பு குறித்து பெரும்பாலான பெற்றோர் கவலைப்பட வேண்டிய அவசியம் இல்லாமல் இருந்தது. காரணம், அன்றையச் சூழலில் நிலவி வந்த கூட்டுக் குடும்ப வாழ்க்கை! வீட்டில் இருக்கும் பெரியவர்கள் குழந்தை வளர்ப்பை தங்கள் கையில் எடுத்துக் கொண்டார்கள். இருக்கிற குழந்தைகளோடு சேர்த்து புதிதாக பிறக்கிற குழந்தையையும் அனாயசமாக வளர்த்தார்கள். பார்த்துக் கொள்ள அத்தை, சித்தி, பாட்டி, பெரியம்மா என்று எத்தனையோ பேர் இருந்தார்கள். குழந்தைகள் தஞ்சமடைய பெற்ற தாய்மடி மட்டுமில்லாமல் இப்படி எத்தனையோ அம்மாக்களின் மடியும் காத்திருந்தன. இன்றைக்கு தனிக்குடித்தனம், தம்பதி இருவரும் வேலைக்குப் போக வேண்டிய நிர்ப்பந்தம், தடதடத்து ஓடும் இயந்திரத்தனமான வாழ்க்கை என்று மாறிவிட்ட சூழலில் குழந்தை வளர்ப்பை கற்றுக் கொள்ள வேண்டிய அவசியத்தில் நாம் ஒவ்வொருவருமே இருக்கிறோம். அதற்கு வழி காட்டுகிறது ‘செல்லமே…’ என்கிற இந்நூல்.

பிரசவம் தொடங்கி குழந்தைக்கு விவரம் தெரியும் வயது வரை குழந்தைகளோடு பழகுவது, அவர்களைப் புரிந்து கொள்வது, வழிநடத்துவது, கற்றுக் கொடுப்பது… என எத்தனையோ அம்சங்களை நேர்த்தியாக சுட்டிக் காட்டியிருக்கிறார் இந்நூலாசிரியர் எஸ்.ஸ்ரீதேவி. ‘கூட்டுக் குடும்பங்கள் அருகி, தனிக் குடும்பங்களில் குழந்தை வளர்ப்பு என்பது மிக சிக்கலான விஷயமாகி வருகிறது. பெரும்பாலான பெற்றோர் தங்களது எதிர்பார்ப்பு அல்லது ஆசைக்கேற்ப குழந்தையை உருவாக்கும் முயற்சியில் களத்தில் இறங்குகின்றனர். இந்த வளர்ப்பு முறையில் குழந்தைகள் சந்திக்கும் இடர்களைப் பற்றி அவர்கள் சிந்திப்பதில்லை. இதனால், காலப் போக்கில் பெற்றோர் மற்றும் குழந்தைகளுக்கு மத்தியில் உருவாகும் புரிதல் இன்மை எனும் சுவர் இறுக்கமாகி இந்த உறவை கசப்பாக்குகிறது. அடிப்படை வளர்ப்பு முறையில் உண்டாகும் பிரச்னை அவர்களது கடைசி நாள் வரை துயரத்தை சுமந்து செல்கிறது. இந்தச் சுவர்களை உடைக்க விரும்பினோம்…’ என்று இந்நூலின் முன்னுரையில் குறிப்பிடுகிறார் எஸ்.ஸ்ரீதேவி. அதைச் செய்வதற்காக ஒவ்வொரு அத்தியாயத்திலும் மெனக்கிடவும் செய்திருக்கிறார்.

‘குழந்தைகள் காலை உணவைத் தவிர்க்கக் கூடாது’, ‘குழந்தைகளுக்கு அப்பாவின் நேரம் தேவை’, ‘கவனக் குறைபாட்டை கவனியுங்கள்’ என்று ஒவ்வொரு அத்தியாயத்திலும் குழந்தை வளர்ப்பில் பெற்றோர் தெரிந்து கொள்ள வேண்டிய பல்வேறு அம்சங்களை புள்ளிவிவரங்களுடன் பட்டியலிடுகிறார் நூலாசிரியர். அதோடு, சம்பந்தப்பட்ட பிரச்னைகளுக்கு டாக்டர், கல்வியாளர், உணவு ஆலோசகர், அழகுக்கலை நிபுணர், கல்வியாளர், இயறகையியலாளர் என பல்வேறு நிபுணர்களிடம் கருத்துகளையும் சேர்த்து தொகுத்திருக்கிறார். அத்தியாயங்கள் குழந்தைகள் தொடர்பாக குட்டிக் குட்டிக் கவிதைகளுடன் தொடங்குவது அழகு!

‘வீடு முழுவதும்

உடைந்த கண்ணாடிச் சில்லுகள்

சுவரில் அப்பாவின் தடித்த வார்த்தைகள்

கொடியில் அம்மாவின் உறைந்த கண்ணீர்

பாதித் தூக்கத்தின் இடையே

வெடித்து அழ வேண்டுமென தோன்றுகிறது…’ என்று தொடங்குகிற அத்தியாயம் எளிதாக அத்தியாயத்துக்குள் ஈர்த்துவிடுகிறது.

இந்நூலைப் படைத்திருக்கும் எஸ்.ஸ்ரீதேவி, பத்திரிகை உலகில் 12 ஆண்டுகால அனுபவம் உள்ளவர். ‘சங்கவை’ என்ற பெயரில் கவிதைகள் படைப்பவர். கல்வி, சுற்றுச்சூழல், குழந்தைகள் மற்றும் கிராமம் சார்ந்த விஷயங்களில் ஆர்வமுள்ளவர். இதுவே இவருடைய முதல் புத்தகம்.  ‘செல்லமே…‘ தொடராக குங்குமம் தோழியில் வந்தபோதே வாசகர்களின் பெரும் வரவேற்பைப் பெற்றது என்பது குறிப்பிடத்தக்கது.

குழந்தை வளர்ப்பு என்பது அற்புதமான கலை. ஒரு குழந்தையை உடலாலும் உள்ளத்தாலும் வளமாக வளர்த்து, கல்வியறிவு பெற வழிகாட்டி, ஆளாக்கி, சமூகத்தில் உயர்ந்த மனிதராக ஆக்க வேண்டிய மாபெரும் பொறுப்பு  பெற்றோருக்கு இருக்கிறது. அதற்கு உதவுகிறது இந்நூல். சுருக்கமாக, ‘முழுமையான குழந்தை வளர்ப்பு வழிகாட்டி.’

நூல்: செல்லமே…

ஆசிரியர்: எஸ்.ஸ்ரீதேவி

விலை: ரூ.125/-

வெளியீடு: சூரியன் பதிப்பகம், 229, கச்சேரி ரோடு, மயிலாப்பூர், சென்னை – 600 004.

விற்பனைப் பிரிவு தொலைபேசி: 044-4220 9191 Extn.21125.

மொபைல்:7299027361.

இ-மெயில்: kalbooks@dinakaran.com

பிற நூல்கள்…

நூல் அறிமுகம் – 1 

நூல் அறிமுகம் – 2

நூல் அறிமுகம் – 3

நூல் அறிமுகம் – 4

நூல் அறிமுகம் – 5

நூல் அறிமுகம் – 6 

நூல் அறிமுகம் – 7

நூல் அறிமுகம் – 8

நூல் அறிமுகம் – 9

நூல் அறிமுகம் – 10

நூல் அறிமுகம் – 10 – கவர்னரின் ஹெலிகாப்டர்

kavarnarin helicopter

து உரையாடலோ, எழுத்தோ… சுற்றி வளைத்து, நீட்டி முழக்கிச் சொல்லாமல் நேரடியாக ஒரு விஷயத்தைச் சொல்வதில் முக்கியமான சிரமம் ஒன்று இருக்கிறது. கேட்பவருக்கோ, படிப்பவருக்கோ அந்த நேரடித் தன்மை அல்லது எளிமை சுவாரஸ்யமாக இருக்க வேண்டும். இல்லையென்றால், அவை கவனிக்கப்படாமல் கடந்து போய்விடும் அபாயம் இருக்கிறது. எந்த மொழியாக இருந்தாலும், இலக்கியத்தின் எந்த வடிவமாக இருந்தாலும் ஒரு படைப்பு எளிமையாக, அதி சுவாரஸ்யமாகச் சொல்லப்படும் போதுதான் மக்களைச் சென்றடைகிறது… எழுதிய படைப்பாளனும் மக்களால் கொண்டாடப்படுகிறான். அந்தக் கலை இந்நூலாசிரியர் எஸ்.கே.பி. கருணாவுக்கு இயல்பாகக் கை வந்திருக்கிறது.

‘ஒரு கர்பிணிக்கு பேருந்தில் தன் இருக்கையை விட்டுக் கொடுத்தது’, ‘விவசாயியின் விளைந்த நிலத்தில் மத்திய அரசுக்கு சொந்தமான பிரம்மாண்ட பைப் விழுந்தது’, ‘படிக்கிற காலத்தில் சைக்கிள் தொலைந்து போனது’, ‘ஆஸ்திரேலியாவுக்குப் போய் திமிங்கிலத்தைக் கடலில் பார்த்தது’… இப்படி இந்நூலில் இடம் பெற்றிருக்கும் எல்லா கட்டுரைகளையுமே ஒற்றை வரி கருக்களுக்குள் சுருக்கிவிடலாம். அதையும் தாண்டி அந்தச் சம்பவங்கள் தரும் தரிசனம், நாம் அருகில் இருந்து பார்ப்பது போல, நமக்கே நடந்தது போல உணர வைக்கும் சொல்லாடல் தன்மை, நிகழ்வுகள் ஆகியவையே இத் தொகுப்பை மிகவும் கவனிக்கத்தக்க ஒன்றாக மாற்றியிருக்கின்றன.

இந்நூலில் இடம் பெற்றிருக்கும் எல்லா கட்டுரைகளும் கடினமான கட்டுரைத்தன்மையைக் கொண்டிராமல், புனைவுக்கான வடிவத்தைக் கொண்டிருப்பது இதன் மற்றொரு சிறப்பு. உண்மைச் சம்பவங்களை அவற்றுக்கான அழுத்தம் குறையாமல் ஆசிரியர் தன் மனவோட்டத்தோடு கூடிய அழகு தமிழில், வாசகனை வெகு எளிதாக ஈர்த்துவிடும் மொழியில் முன் வைக்கிறார். படிக்கப் படிக்க பக்கங்கள் வேக வேகமாகப் புரள்கின்றன. சிலோனிலிருந்து (இலங்கை) திருவண்ணாமலைக்கு வந்த ‘சண்டைக்காரர்கள்’, ‘சைக்கிள் டாக்டர்’, ‘பிரியாணிக்காக பின்னால் சுற்றும் ஹெட்கான்ஸ்டபிள்’, ‘எழுத்தாளர் சுஜாதா’, ‘கவர்னரின் பைலட்’, ‘புரொபசர் பசவராஜ்’, ‘கையில் கசங்கிய பத்து ரூபாய் நோட்டை அழுத்திவிட்டுப் போன மூதாட்டி’… என நூலைப் படித்து முடித்த பிறகும் ஒவ்வொரு பாத்திரமும் மனதில் நிலைத்து நிற்கிறார்கள். உச்சக்கட்டமாக ‘கவர்னரின் ஹெலிகாப்டர்’ என்று இரு அத்தியாயங்களாக எழுதப்பட்டிருக்கும் கட்டுரைகள்… ஒரு சாமானியனுக்கும் அரசு இயந்திரத்துக்கும் இடையிலான இடைவெளியை அப்பட்டமாகாச் சொல்லிச் செல்கின்றன.

எளிமைதான் தன் எழுத்தின் அடிநாதம் என்றாலும், எஸ்.கே.பி.கருணா, வாழ்க்கையின் யதார்த்தமான பக்கங்களைச் சொல்லும் போது வெகு அநாயசமாக சில வரிகளைக் கையாள்கிறார். உதாரணமாக, ‘ஆகிஸிடெண்ட் என்ற வார்த்தையைக் கேட்டவுடன், எனக்கு நெஞ்சமெல்லாம் பரவசம் வந்து நிறைத்தது’. இந்த வரியைப் படிக்கும் போது அதிர்வைக் கொடுத்தாலும், ‘மதுரை வீரன்’ என்கிற ஆளுமையைப் பற்றித் தெரிந்து கொள்ளும்போது அதற்கான நிறைவு நமக்குக் கிடைத்து விடுகிறது. ‘அது எப்படி மனைவியும், மகனும் வெளியூர் சென்றிருக்கும் சில நாட்களிலேயே நம்முடைய வீடுகள் வாழுமிடம் என்பதிலிருந்து வெறுமனே வசிப்பிடமாக மாறி விடுகிறது?’ என்ற வரி குடும்பஸ்தர்கள் அனைவருக்குமாக எழுதப்பட்ட பொது வரியாக உருக்கொள்கிறது.

இந்நூலில் இடம் பெற்றிருக்கும் கட்டுரைகள் நம்மை நாமே சுயமாக சில கேள்விகளைக் கேட்டுக் கொள்ள, அவற்றுக்கான விடைகள் எப்படிப்பட்டவையாக இருந்தாலும் அலசி ஆராய, ஒரு புதிய யதார்த்தத்தை அறிந்துகொள்ளத் தூண்டுபவை. யாரோ ஒருவர், தன் மன ஓட்டத்தை தன் பார்வையில் முன் வைத்த கட்டுரைகள் என ஒதுக்கித் தள்ள முடியாதவை. ஒவ்வொரு கட்டுரையிலும் ஒரு புதிய படிப்பினை, அனுபவம் வாசகருக்குக் கிடைக்கும் என்று உத்தரவாதமளிக்கும் தொகுப்பு இந்நூல். சரளமான, சுவாரஸ்யமான வாசிப்பனுபவத்தைத் தரும் ‘கவர்னரின் ஹெலிகாப்டர்’ என்ற இந்நூல் எஸ்.கே.பி. கருணாவுக்கு பரந்த இலக்கியப் பரப்பில் அவர் எடுத்து வைத்த முதல் அடி என்றே தோன்றுகிறது. அவர் புனைவும் கட்டுரைகளுமாக நிறைய எழுத வேண்டும்… அவற்றை எதிர்பார்த்து, வாசித்துத் தீர்க்கும் பேரார்வத்துடன் நிறைய வாசகர்கள் காத்திருக்கிறார்கள் என்பது மறுக்க முடியாத நிஜம்.

  • பாலு சத்யா

நூல்: கவர்னரின் ஹெலிகாப்டர்

ஆசிரியர்: எஸ்.கே.பி.கருணா

வெளியீடு: வம்சி புக்ஸ், 19, டி.எம்.சாரோன், திருவண்ணாமலை – 606 601.

தொலைபேசி: 9445870995, 04175-251468.

விலை: ரூ.200/-.

பிற நூல்கள்…

நூல் அறிமுகம் – 1 

நூல் அறிமுகம் – 2

நூல் அறிமுகம் – 3

நூல் அறிமுகம் – 4

நூல் அறிமுகம் – 5

நூல் அறிமுகம் – 6 

நூல் அறிமுகம் – 7

நூல் அறிமுகம் – 8

நூல் அறிமுகம் – 9

நூல் அறிமுகம் – 9

இலைகள் பழுக்காத உலகம் 

Wrapper

ராமலக்ஷ்மி

ளைத்தளத்தில் பிரபலமான கவிஞர் ராமலக்ஷ்மி 1987ல் இருந்து தொடர்ந்து எழுத்துலகில் இயங்கி வருபவர். ‘முத்துச்சரம்’ என்ற வலைப்பூவை உருவாக்கி, தொடர்ந்து பதிவுகள் இடுபவர். இத்தொகுப்பில் இடம் பெற்றுள்ள கவிதைகள் பல்வேறு பத்திரிகைகளிலும் இணைய இதழ்களிலும் வெளியானவை.

‘‘அன்பையும், பாசத்தையும், கவலைகளையும் வெளிப்படுத்துகிற எந்தக் கவிதையிலும் வலிந்து திணிக்கப்பட்ட பாசாங்கோ, வார்த்தைகளின் ஆர்ப்பாட்டமோ இல்லை. இயல்பாக, உண்மையின் மையப் புள்ளியிலிருந்து இதைப் பதிவு செய்கிறார். அதனால்தான் இந்தக் கவிதைகள் மென்மையையும் முரண்பாட்டையும் ஒருங்கிணைத்துச் செல்கின்றன.

கவிதையை உச்சநிலைக்கு எடுத்துச் செல்வதில் முதன்மையானது ரசனை சார்ந்த அனுபவம். ரசனைக்குக் கூர்மையான கவனிப்பு அவசியம். யாரும் நுழையாத கவிதைப் பாதைக்குள் வாசகனைக் கைப்பிடித்து அழைத்துச் செல்கிற போது, வாசகன் காணும் உலகம் ஆச்சரியங்கள் விரியும் வண்ண உலகமாகிறது. ‘அரும்புகள்’ கவிதையில் ராமலக்ஷ்மியின் கவிதைப் பார்வை நேர்த்தியும் அழகும் மிக்கதாக இருக்கிறது. நாம் கவனிக்கத் தவறி விட்டோமே என்று வியக்கத் தோன்றுகிறது…’’ என்று இந்நூல் மதிப்புரையில் குறிப்பிடுகிறார் கவிஞர் க. அம்சப்ரியா. ராமலக்ஷ்மியின் ‘அரும்புகள்’ கவிதை மட்டுமல்ல… பல கவிதைகள் ரசனை சார்ந்த அனுபவத்துக்கு நம்மை உட்படுத்துபவை.

எளிமையான வரிகளில், மிரட்டாத சொல்லாட்சியில் மிளிர்கின்றன இத் தொகுப்பில் உள்ள கவிதைகள். உதாரணத்துக்கு சில கவிதைகள்…

அரும்புகள் 

moon

என்றைக்கு

எப்போது வருமென

எப்படியோ தெரிந்து

வைத்திருக்கின்றன

அத்தனைக் குஞ்சு மீன்களும்

அன்னையருக்குத் தெரியாமல்

நடுநிசியில் நழுவிக்

குளம் நடுவே குழுமிக் காத்திருக்க

தொட்டுப் பிடித்து விளையாட

மெல்ல மிதந்து

உள்ளே வருகிறது

பிள்ளைப் பிறை நிலா.

***

எல்லாம் புரிந்தவள் 

mother and daughter

மகளின் மழலைக்கு

மனைவியே அகராதி

அர்த்தங்கள் பல

முயன்று தோற்று

‘அப்பா அம்மாவாகவே முடியாதோ…’

திகைத்து வருந்தி நிற்கையில்

புரிந்தவளைப் போல்

அருகே வந்தணைத்து

ஆறுதலாய் முத்தமிட்டு

எனக்கு

அம்மாவாகி விடுகிறாள்

அன்பு மகள்.

***

கடன் அன்பை வளர்க்கும் 

coin

‘வேறு எந்தக் கடனும் இப்போது இல்லை’

புதுக்கடனுக்கு விண்ணப்பிக்க வந்த இட்த்தில்

வங்கி மேலாளர் கேட்கும் முன்னரே சொன்னான்

முந்தைய கடன்களை

காலத்தே அடைத்த்தற்கான

நற்சான்றிதழ்களை பெருமையுடன் முன்வைத்தான்.

சிணுங்கியது அலைபேசி

‘அப்பா எனக்கு நீ பத்து ரூவா தரணும்’

அறிவித்தாள் அன்பு மகள்

முன் தினம் கடற்கரையில் கடலை வாங்க

சில்லறை இல்லாதபோது

தன்குட்டிப் பையைக் குலுக்கித் தேடி

எடுத்துத் தந்த இரு ஐந்து ரூபாய்

நாணயங்களை நினைவூட்டி.

***

நூல்: இலைகள் பழுக்காத உலகம்

ஆசிரியர்: ராமலக்ஷ்மி

வெளியீடு: அகநாழிகை பதிப்பகம், எண் 33, மண்டபம் தெரு, மதுராந்தகம் – 603 306.

தொலைபேசி: 9994541010.

விலை: ரூ.80/-

பிற நூல்கள்…

நூல் அறிமுகம் – 1 

நூல் அறிமுகம் – 2

நூல் அறிமுகம் – 3

நூல் அறிமுகம் – 4

நூல் அறிமுகம் – 5

நூல் அறிமுகம் – 6 

நூல் அறிமுகம் – 7

நூல் அறிமுகம் – 8

Image courtesy:  

ww.chinese.cn

http://api.ning.com/

http://www.circlevillegifts.com/

நூல் அறிமுகம் – 8

pamban swamigal

ஸ்ரீமத் பாம்பன் சுவாமிகள்

எஸ்.ஆர்.செந்தில்குமார்

’இரை தேடுவதோடு இறையும் தேடு’ என்பது பொன்னெழுத்துகளில் பொறிக்கப்பட வேண்டிய வாசகம். அதை உலகுக்கே உரத்துச் சொல்ல பிறவி எடுத்து வந்த மகான் ‘ஸ்ரீமத் பாம்பன் சுவாமிகள்.’ இந்து மரபில் கடவுளர்க்குக் கொடுக்கப்படும் மரியாதையும் பக்தியும் அடியார்க்கும் உண்டு. இறைவனை விட அவன் அடியார்களை ஒரு படி மேலே போய் துதித்தவர்களும் உண்டு. ‘அடியார்க்கு அடியேன் ஆவேனே’ என்பதுதான் இறைச்சான்றோரின் உள்ளக் கிடக்கையாக இருந்தது என்பதற்கு நம் பக்தி இலக்கியங்களில் ஆதாரங்கள் இருக்கின்றன. காரணம், இறைவன் எளியோர்க்கு உணர்த்த விரும்பியதை எடுத்துச் சொல்பவர்கள், வழிகாட்டுபவர்கள் மகான்கள். அப்படிப்பட்ட பெரியவர்களில் இன்றைக்கு உலகம் முழுக்க பிரபலமாகியிருக்கும் பாம்பன் சுவாமிகளின் சரிதத்தை எளிய முறையில் அறிமுகப்படுத்தியிருக்கிறது இந்நூல்.

எந்தப் பிறவியாயினும் அதற்கோர் காரணம் இருக்க வேண்டும் என்பது துறவிகளுக்கு முழுக்கப் பொருந்தும். அப்படி ஒரு காரணத்தோடு பிறவி எடுத்தவர் பாம்பன் சுவாமிகள். எல்லா சாதாரண மனிதர்களைப் போலவே மூப்பையும் பிணியையும் உடலில் தாங்கிக் கொண்டவர். பல கஷ்டங்களுக்கு நடுவேயும் தமிழுக்கும் சைவநெறியான குகப்பிரம்ம நெறிக்கும் தன் வாழ்வையே அர்ப்பணித்தவர். இவர் இயற்றிய ‘சண்முகக்கவசம்’ ஒன்றே இவர் புகழ் சொல்லப் போதுமானது. ஆனாலும் அவர் நம்பிய முருகன் அவரைக் கைவிடவில்லை. அவர் இன்னலைப் பொறுக்க மாட்டாமல் ஓடோடி வருகிறான். உதவுகிறான். நோய் நீக்குகிறான். தெரியாத ஊரில் யார் மூலமாகவோ வந்து வழிகாட்டுகிறான். தாக்குவதற்கு அடியாட்கள் வந்தால் காவல்துறையினர் வேடத்தில் பதிலடி கொடுக்கிறான்… இந்நூல் படிக்கப் படிக்க சுவாரஸ்யம்.

ஒரு துறவி எப்படி வாழ வேண்டும் என்பதற்கு ஸ்ரீமத் பாம்பன் குமருகுருதாச சுவாமிகள் சிறந்த உதாரணம். அதற்கான இரண்டு சம்பவங்கள் நூலிலேயே குறிப்பிடப்பட்டிருக்கின்றன.

***

ஒன்று

ஒருநாள் மதிய வேளை.

பாம்பன் சுவாமிகள் அமர்ந்திருந்த இடத்துக்கு அருகே ஒரு மூட்டைப் பூச்சி ஓடியது. அப்போது அங்கிருந்த ஒரு சிறுவனிடம், ‘அந்தப் பூச்சியைப் பிடித்துக் கொண்டு போய் வேறிடத்தில் விடு குழந்தாய்’ என்று சொன்னார் பாம்பன் சுவாமிகள்.

அந்தச் சிறுவனோ இதற்கு முன்பெல்லாம் மூட்டைப் பூச்சியை நசுக்கியே பழக்கப்பட்டவன். சுவாமிகள் மூட்டைப் பூச்சியை அப்புறப்படுத்தச் சொன்னதைக் கேட்டவுடன் தன் விரலால் நசுக்கிக் கொன்றான்.

பாம்பன் சுவாமிகள் துடித்துப் போனார். ‘அடடா… என்ன காரியம் செய்துவிட்டாய்? ஒரு உயிரைக் கொன்றுவிட்டாயே’ என்று வருந்தினார்.

அன்றைய உணவைத் தவிர்த்தார். மௌனமானார்.

‘சுவாமி! சின்னப் பையன் தெரியாமல் செய்த பிழைய மன்னிக்க வேணும். சிறு பூச்சிதானே… தயவுசெய்து சாப்பிடுங்கள்’ எனக் கோரினார்கள், நயினார் பிள்ளை குடும்பத்தார்.

‘உங்கள் மீது தவறேதும் இல்லை. ஆனால், அதுவும் ஒரு உயிர் அல்லவா? என்னால் அந்த உயிரின் துயரைத் தாங்கிக் கொள்ள முடியவில்லை. என் முன்னே ஒரு மரணம் சம்பவித்திருக்கிறது. ஆகவே, என்னால் நிம்மதியாக உணவெடுத்துக் கொள்ள இயலாது…. இந்த மூட்டைப் பூச்சிக்காக உணவு துறக்கிறேன். ஜபம் செய்யப் போகிறேன். என்னைத் தனியாக விடுங்கள்’ என்றார் சுவாமிகள்.

***

இரண்டு

ஒருநாள் இரவு 8 மணியளவில் சுவாமி வீட்டின் மாடியில் இருந்தார். வீட்டின் உரிமையாளர் பாலசுப்பிரமணிய முதலியார் மாடிக்கு வந்து, ‘சுவாமி!’ என்று அழைத்தார்.

தீப வெளிச்சமில்லை. ஆகவே, ‘யாரது?’ எனக் கேட்டார் சுவாமிகள்.

‘நான் தான் பாலசுப்ரமணியன். தங்களுக்குத் தந்தி வந்திருக்கிறது சுவாமி’ என்று பதில் சொன்னார்.

‘அது என் மூத்த மகன் இறந்த செய்தியே… படித்துப் பார்’ என்றார் சுவாமிகள். அதோடு தனக்கு செய்தி சொன்னவரிடம் ‘செய்ய வேண்டிய காரியங்களை செய்க’ என ஒற்றை வார்த்தையை உதிர்த்துவிட்டு நகர்ந்தார்.

நிலவொளியில் அமர்ந்து தியானத்தில் கரையத் தொடங்கினார் சுவாமிகள்.

***

இந்த இரண்டு நிகழ்வுகளும் எளியவர்களுக்கு முரணாகத் தெரியலாம். அதென்ன மூட்டைப்பூச்சிக்கு இரங்குகிறவர், சொந்த மகனின் மரணத்துக்கு கலங்காமல் இருக்கிறாரே எனக் கேள்வி எழலாம். உலக ஜீவராசிகள் அனைத்தையும் நேசிப்பதும் தனக்கென சொந்ந்த பந்தங்களோ, பற்றோ இல்லாமல் வாழ்வதுதான் துறவு நிலை. அதை சீராகப் பின்பற்றியவர் பாம்பன் சுவாமிகள். இதை இந் நூலின் ஆசிரியர் சிறப்பாக பதிவு செய்திருக்கிறார்.

பாம்பன் சுவாமிகளின் சரிதத்தோடு நூல் முழுக்க அவர் இயற்றிய, படித்தால் பலன் தரும் பாக்களும், அவர் மகிமையால் எத்தனையோ இன்னல்களிலிருந்து விடுபட்ட பக்தர்களின் அனுபவங்களும் இடம் பெற்றிருக்கின்றன. பக்தியில் திளைக்க, உன்னதமான ஓர் ஆன்மிகப் பெரியவரின் முழு வரலாறை தெரிந்து கொள்ள உதவுகிறது இந்நூல்.

***

நூல்: ஸ்ரீமத் பாம்பன் சுவாமிகள்

ஆசிரியர்: எஸ்.ஆர்.செந்தில்குமார்

வெளியீடு: சூரியன் பதிப்பகம்

விலை: ரூ.125/-

முகவரி: சூரியன் பதிப்பகம்,

229, கச்சேரி ரோடு, மயிலாப்பூர்,

சென்னை – 600 004.

தொ.பேசி: 044 – 4220 9191 Extn: 21125

மொபைல்: 72990 27361.

இ-மெயில்: kalbooks@dinakaran.com

நூல் அறிமுகம் – 7

wrapper375

மிச்சமென்ன சொல்லுங்கப்பா

கி.பி.அரவிந்தன்

‘ஈழத்தமிழரின் வாழ்விலும் இருப்பிலும் இன்று என்னதான் மிஞ்சியுள்ளது? அந்தக் குழந்தைக்குச் சொல்வதற்கு அப்பனிடமும் மிச்சம் மீதம் என்ன இருக்க முடியும்?

பொய்யையும் புனைகதையையுமா எடுத்துரைக்க முடியும்?

அறுபதாண்டுகளுக்கும் மேலாக அறவழியிலும் ஆயுத வழியிலும் தொடர்ந்த ஈழத்தமிழரின் அரசியல் கோரிக்கைக்கான போராட்டம் 2009ல் முள்ளிவாய்க்காலில் சிதைவுற்றது.

அறவழிப் போருக்கும் ஆயுதவழிப் போருக்கும் இடையேயான பிரரிப்பும் தொடுப்பும் 1970ம் ஆண்டில் முகிழ்ந்த ஓர் இளந்தலைமுறையால் முன்னெடுக்கப்பட்டிருந்தது.

70ம் ஆண்டு இளந்தலைமுறையைச் சேர்ந்த ஒரு போராளியாகவும் கவிஞனாகவும் அந்த்த் தலைமுறையினருடன் இணைந்து நான் கண்ட கனவுகளும் அவற்றின் மீதிகளும்தான் இக்கவிதைகள்…’

கவிஞர் கி.பி.அரவிந்தன், இந்நூலின் முன்னுரையில் சொல்லியிருக்கும் இந்தக் குறிப்புகளே இக்கவிதைத் தொகுப்பை அறிமுகம் செய்யப் போதுமானவை. பெரும்பாலான கவிதைகளின் அடிநாதம் துயரம் தோய்ந்ததாக இருக்கிறது. கவிதை வரிகளோ அத்துயரத்தை ஏற்படுத்திய சூழலின் மீது நம்மை கோபம் கொள்ள வைக்கின்றன.

எழுத்தாளர்கள் வ.கீதா மற்றும் எஸ்.வி.ராஜதுரை கி.பி.அரவிந்தனின் கவிதைகளுக்கான அணிந்துரையில் இப்படிக் குறிப்பிடுகிறார்கள்… ‘கி.பி.அரவிந்தனின் கவிதைகள் மூன்று வகை அனுபவங்களை உள்ளடக்கியவை: யாழ்ப்பாணத்து அனுபவங்கள்; தமிழகத்தில் வாழ்ந்த இடைக்காலத்து அனுபவங்கள்; அகதி வாழ்வின் பாதிப்புகள் (மேற்கு ஐரோப்பிய அனுபவங்கள்). இக்கவிதைகள் வரலாற்றனுபவங்களில் தோய்ந்து எழுந்தவை மட்டுமல்ல. அவ்வனுபவங்கள் அலாதியான ஒரு கற்பனைத் திறத்தால், பளிங்கு போன்றதொரு தெளிவான மொழியால் சீரமைக்கப்பட்டுப் பண்படுத்தப்பட்டுக் கவிதைகளாக வார்த்தெடுக்கப்பட்டுள்ளன. போராளியின் சோர்வு, அகதியின் மனத்தாங்கல்கள், சிந்திக்கும் எவருக்குமே உண்டாகும் ஐயப்படுகள், தர்ம சங்கடங்கள் – இவை ஒன்றோடொன்று பின்னிப் பிணைந்த நிலையை இக்கவிதைகளில் காணலாம்…’

பேராசிரியர் கார்த்திகேசு சிவத்தம்பியோ, ‘ஒரு நாட்டில் வாழுகிற ஒரு இனத்திலுள்ள ஒரு அகதியின் அவலத்தை இனத்தின் அவலமாக, நாட்டின் அவலமாக, உலகின் அவலமாகக் காட்டுகிற திறமை அரவிந்தனுக்குக் கைவந்துள்ளதென்றே கருதுகிறேன்’ என்று குறிப்பிடுகிறார்.

’தன் ஆன்ம நிறைவைத் தேடியும், தன் சகமனிதர்களுக்கு அது இல்லையே என ஏங்கியும் எழுகிற விசும்பலின், கண்ணீரின், அரற்றலின், சினத்தின் வார்த்தைகளாகவே அரவிந்தனின் அனைத்துக் கவிதைகளும் அமைந்துள்ளன. தான் இழந்தவைதாம் ‘தான்’ என்று கண்டுகொண்ட தகிப்பில் சொற்களாக்க் குமைந்து வெடிக்கின்றன’ என்று குறிப்பிடுகிறார் பேராசிரியர் பாரதிபுத்திரன்.

இந்தத் தொகுப்பில் ஏற்கனவே வெளிவந்த கி.பி.அரவிந்தனின் ‘இனி ஒரு வைகறை’, ‘முகம்கொள்’, ‘கனவின் மீதி’ ஆகிய தொகுப்புகளில் இடம் பெற்ற கவிதைகளும், நூலாக்கம் பெறாத கவிதைகளும் இடம் பெற்றுள்ளன.

தொகுப்பிலிருந்து சில கவிதைகள்…

இருப்பு

குளிர் சிரிக்கும்

தோற்றுக் கொண்டிருப்பது

தெரியாமல்

மரங்கள் எதிர்கொள்ளும்

தயங்காமல்

தங்களை நட்டுக்கொள்ளும்

தலைகீழாய்

பட்டுப்போன பாவனையாய்

பனியாய்ப் படிந்து

நளின அழகில்

பரிசோதிக்கும் குளிர்

பின்வாங்கல் வேருக்குள்

சூரியன் வரும்வரை…

***

நெல்லியும் உதிரும் கனிகளும்

வேப்பமர நிழலில்

கொப்பெல்லாம்

காய்க்கொத்தாய்

சாய்ந்து நிற்குமே

பாரமதைத் தாங்காமல்

நெல்லி மரம்

நினைவுண்டா?

கனி உதிர்த்து நிற்குமந்த

நிறு நெல்லி மரத்தில்தான்

காய் சுவைத்தோம்.

சாட்சியமாய்

வாய் சுவைத்தோம்.

காய்த்திருந்தது பார்

தேனடையில் தேனீக்களாய்

கலையாத சுற்றம்போல்

குலைகள்

அப்போது

உன் வயிற்றில் நம் கனி.

இரும்புச் சிறகசைத்து

சாவரக்கன்

வானேறி வருகையிலும்

சின்னி விரலால்* அவனைப்

புறந்தள்ளி

அதனடியில்தானே

வெயில் காய்ந்திருக்க

வேப்பங்காற்றினால் நாம்

தோய்ந்திருந்தோம்.

வான்வெளியை அளந்தபடி

நம் கனவில்.

நெல்லி

இலைக்காம்புதனை

ஒன்றொன்றாய் நீ பொறுக்கி

மடக்கென்று மொக்கொடிக்கும்

மெல்லொலியிலும்

கேட்டது பார்

நம் சுற்றமெல்லாம்

உயிரொடியும் ஓசை

அறியாயா?

அறிந்தோமா நாம்

ஊரொடிந்து

ஊரோடிணைந்த

உறவொடிந்து

உறவின் ஊற்றான

குடும்ப அலகொடிந்து

உதிர்ந்த கனிகளாய்

வேறாகி வேற்றாளாகி

அந்நியமாகும் கதை

காலவெளிதனில் கரைந்த்து

ஒரு பத்தாண்டானாலும்

நெல்லி உண்ட அவ்வையின்

பழங்கதையைச்

சிதறி உருண்டோடும்

நம் வயிற்றுக் கனிகளுக்கு

ஒப்புவிக்கும் போதினிலே

உயிர் பின்னிக் கிடக்குமெம்

காதல்தனை இசைக்கிறது

கண் நிறைத்து வீற்றிருக்கும்

நெல்லி.

நூல்: மிச்சமென்ன சொல்லுங்கப்பா

ஆசிரியர்: கி.பி.அரவிந்தன்

விலை: ரூ.200/-

வெளியீடு: ஒளி, இராயப்பேட்டை, சென்னை-600 014. செல்: 9840231074.

விற்பனை உரிமை: அகல், 348-ஏ, டி.டி.கே.சாலை, இராயப்பேட்டை, சென்னை – 600 014. செல்: 9884322498.

***

தொகுப்பு: பாலு சத்யா

நூல் அறிமுகம் – 6

wrapper373

மழையைப் போலத்தான் நீயும்…

ழைய நினைவுகளை, பரவசத்தை, நண்பர்களை, தோழிகளை, இயற்கையை என எத்தனையோ விஷயங்களை நினைவுகூரும் கவிதைகள். இந்தக் கவிதைகளில் சொல்லப்பட்டிருக்கும் பல பாடுபொருள்கள் நாம் அனுபவித்தவையாக இருக்கும் என்பதுதான் இந்நூலின் சிறப்பு. வாசகனை அதிகம் கஷ்டப்படுத்தாத எளிய வரிகள்… உவமைகள். ஒவ்வொரு கவிதைக்கும் பொருத்தமான ஓவியங்கள் தொகுப்புக்கு பலம் சேர்க்கின்றன.

தொகுப்பிலிருந்து சில கவிதைகள்…

சம்பந்தமில்லா

மனக்குழப்பம்.

சட்டென்று தொலைந்து போகிறது

தோளில்

கைவைத்து அழுத்தும்

நட்பில்.

***

தொலைபேசியில்

பேசும்

ஏனைய வாக்கியங்களுக்கிடையே

‘அப்புறம்’

என்ற வார்த்தைதான்

அதிகமாய் உபயோகித்திருக்கிறாய்…

பின்னொரு நாளில்

தெரிந்துகொண்டேன்

அவ்வார்த்தைக்கு

உன் அகராதியில்

காதலென்ற பொருளுண்டென்பதை!

***

வாழ்தலுக்கு

வழிமுறையென்று

ஏதேதோ

பேசினார்கள்…

எவருமே உணர்த்தவில்லை

இயல்பாக இருந்தாலே

போதுமென்பதை!

***

அதிகாலை

மார்கழிக் கோலம்.

அதை நீயே

போடுவது.

மழைத்தூறல் வந்து

மென்மையாய் கலைப்பது…

ஒரே நேரத்தில்

எப்படி மூன்று கவிதை..!

***

நூல்: மழையைப் போலத்தான் நீயும்…

விலை: ரூ.80/-

ஆசிரியர்: ஆர்.சத்தியன்

வெளியீடு: சித்ரகலா பதிப்பகம், அகரக்கடம்பனூர், கீழ்வேளூர் – 611 104. நாகப்பட்டினம் மாவட்டம்.

தொலைபேசி: 9443382614.

நூல் அறிமுகம் – 5

திருவண்ணாமலை கிரிவலம்

ஒரு தரிசன வழிகாட்டி

wrapper374

‘திருவாரூர்ல பிறந்தா முக்தி; காசியில இறந்தா முக்தி; திருவண்ணாமலையை நினைச்சாலே முக்தி’… இது பல காலமாக தமிழகத்தில் உலாவரும் ஒரு பழைய பழமொழி. அந்த அளவுக்கு கீர்த்தியும் மகிமையும் திருவண்ணாமலை திருத்தலத்துக்கு உண்டு. வெல்லத்தை நாடி வரும் எறும்புக் கூட்டம் போல இந்தப் புண்ணிய தலத்தை ஒவ்வொரு நாளும் பக்தர்கள் கூட்டம் மொய்த்துக் கொண்டே இருக்கிறது. தமிழகம் மட்டுமல்ல… இந்தியாவின் பல பகுதிகளிலிருந்தும் வெவ்வேறு நாடுகளிலிருந்தும் இந்தப் புனிதத் தலத்துக்கு அன்றாடம் வருகை தரும் பக்தர்கள் பல்லாயிரக்கணக்கானோர்.

இந்த கையடக்க நூல், திருவண்ணாமலையின் பெருமையை எளிய முறையில் அறிமுகம் செய்கிறது. உதாரணமாக, ‘இப்படிப்பட்ட ஆன்மிகப் பொக்கிஷம் வேறெங்கும் இல்லை. அதற்குக் காரணம் திருவண்ணாமலையில் இருக்கும் மலை. இந்த மலையே சிவலிங்கம். இந்த மலைச்சாரலிலும், அதன் குகைகளிலும் இன்னும் பல்வேறு சித்தர்களும் ஞானிகளும் உலகறியாமல் தங்களை ஒளித்துக் கொண்டு வாழ்ந்து வருகிறார்கள்.’… இப்படி திருவண்ணாமலை பற்றிய பல முக்கிய, பெருமைக்குரிய உதாரணங்களை எளிமையாகத் தருகிறார்கள் இந்நூலை எழுதிய சொ.மணியன் மற்றும் நா.மோகன கிருஷ்ணன்.

இந்தக் கையடக்கப் புத்தகத்தில் அக்னி ஜோதியான சிவன் கல் மலையானது எப்படி, திருவண்ணாமலை கிரிவல முறைகள், மலையைச் சுற்றியுள்ள லிங்கங்கள், புண்ணிய ஸ்தலங்கள் அவற்றின் வரலாறு, திருவண்ணாமலையில் தங்கும் இடங்கள், கட்டணம், சுற்றியுள்ள முக்கிய இடங்கள் அத்தனையும் விவரிக்கப்பட்டிருக்கின்றன. மொத்தத்தில் திருவண்ணாமலை செல்ல விரும்புகிறவர்களுக்கு உற்ற வழிகாட்டி இந்தப் புத்தகம்.

நூல்: திருவண்ணாமலை கிரிவலம் – ஒரு தரிசன வழிகாட்டி

ஆசிரியர்கள்: சொ.மணியன் மற்றும் நா.மோகன கிருஷ்ணன்

விலை: ரூ.25/-

வெளியீடு: தங்கத்தாமரை பதிப்பகம், 37, கால்வாய்க்கரைச் சாலை, கஸ்தூரிபா நகர், அடையாறு, சென்னை – 600 020.

தொலைபேசி: +91 73057 76099 / 044-2441 4441/ mail2ttp@gmail.com

நூல் அறிமுகம் – 4

கெடை காடு

 Kedai_Kaadu_Wrapper_very_Final (1)

  • ‘கெடை காடு’… வெளியான சூட்டோடு எழுத்தாளர் ஜெயந்தனின் நினைவாக வழங்கப்படும் சிறந்த நாவலுக்கான ‘செந்தமிழ் அறக்கட்டளை’ விருதை பெற்றிருக்கும் நாவல்.
  • ‘இந்த நாவலின் கதைக் களம் தமிழுக்கு மிகவும் புதியது’ என்று புகழ்ந்திருக்கிறார் எழுத்தாளர் எஸ்.ராமகிருஷ்ணன்.
  • ‘காடு, அது சார்ந்த வாழ்க்கை, மாடுகள், மேய்ச்சல், காதல், காமம் என மேய்ச்சல் காடுகளின் கசப்பும் இனிப்புமான தனித்துவமான இனத்தின் வாழ்வியலைப் பேசும் தமிழின் முதன்மையான புதினங்களில் ‘கெடை காடு’க்கு மிகப் பெரிய இடம் இருக்கிறது…’ என்று குறிப்பிடுகிறார் எழுத்தாளர் சுந்தர புத்தன்.

இந்த நூல் குறித்த அறிமுகத்துக்கு இவையெல்லாம் அவசியமாக இருக்கின்றன. எழுத்தில் கொங்கு வட்டார வழக்கை முன்னிறுத்திய ஆர்.சண்முகசுந்தரம் தொடங்கி கரிசல் பூமி வட்டார வழக்கை வெகு லாவகமாகக் கையாண்ட கி.ராஜநாராயணன் வரை தமிழகத்தின் கிராமங்களும் மனிதர்களும் அவர்கள் வாழ்க்கையும் எத்தனையோ படைப்புகளில் மிளிர்ந்திருக்கின்றன. அந்த வரிசையில் ‘கெடை காடு’ நாவலுக்கு மிக முக்கியமான, அதே நேரத்தில் தனித்துவமான இடமுண்டு. வழக்கம் போல ஒரு கிராமம், அதில் ஏதோ ஓர் ஆண் அல்லது பெண்ணை மையப்படுத்தி, ஏதோ ஒரு பிரச்னையை முன்னிலைப்படுத்தியபடி நகரும் நாவலாக ‘கெடை காடு’ இல்லை. ஒவ்வொரு மலருக்கும் ஓர் வடிவம், மணம் என்று தனித்தன்மை இருப்பது போல இந்நாவலில் காட்சிப்படுத்தப்படும் மனிதர்களும் அவரவர்களுக்கான இயல்புகளுடனும் குணங்களுடனும் வலம் வருகிறார்கள்.

கணவன், இன்னொருத்தியின் வீட்டில் இருப்பதைப் பார்த்து அதிர்ந்து போனாலும், அவன் வெளியே வரும் வரை காத்திருந்து, ‘‘ஆம்பள யோக்கியம் தெரியாண்டாமா? அதான். இன்னையோட முடிஞ்சாச்சு. இனி ஒட்டும் இல்ல. உறவும் இல்ல’’ என்று உதறிவிட்டுப் போகிற புண்ணியத்தாயி…

‘‘இவங்க நினைச்சா சேர்க்கதுக்கும் நீக்கதுக்கும் நான் என்ன இவ்வோ வீட்டு மாடா, ஆடா? எனக்கு சங்கமும் வேண்டாம், ஒண்ணும் வேண்டாம்’’ என படபடக்கிற தனித்து வாழும் கல்யாணி…

எதிர்ப்பாலினத்தின் மேல் எழும் வேட்கையும் பார்க்கிற பெண்ணின் மேலேல்லாம் காதல் வயப்படத் தூண்டுகிற பருவத்திலிருக்கும் உச்சிமகாளி என நாவலில் வரும் ஒவ்வொரு கதாபாத்திரமும் நாம் நேரில் சந்தித்துப் பேசும் எத்தனையோபேரின் சாயலைக் கொண்டிருக்கிறார்கள். பாத்திரப் படைப்புகளின் யதார்த்த தன்மை நாவலின் போக்குக்கு பெரும் பலம்.

குள்ராட்டிக்கு மேய்ச்சலுக்குப் போன இடத்தில் அட்டளையில் தொங்கும் பாம்புச் சட்டைகள்… அநாமதேயமாக நடு வழியில் நிற்கும் பட்றையன் கோயில்… அமைதி சூழ் மலைப் பகுதியில் அவ்வப்போது கேட்கும் ஓநாய்களின் இரைச்சல்… இவற்றுக்கு மத்தியில் மாடுகளையும் காபந்து பண்ணி, தங்களையும் பாதுகாத்துக் கொள்ள வேண்டிய நிலையில் இருக்கும் மேய்ச்சலுக்கு வந்த மனிதர்களின் வாழ்க்கை… என இந்த நாவல் பதிவு செய்யும் விஷயங்கள் ஏராளம். மனித வாழ்வின் வசீகரத்தையும் அவலத்தையும் வலிந்து திணிக்காமல், போகிற போக்கில் யதார்த்தமாக கோடிட்டுக் காட்டுகிறது ஏக்நாத்தின் எழுத்து நடை. கால்நடை மேய்த்தல் தொடர்பாக தமிழில் பூமணியின் ‘ரீதி’ சிறுகதை போல வெகு சில படைப்புகளே வெளியாகியுள்ளன. அதையே முக்கியக் களமாகக் கொண்டு வெளியான முதல் நாவல் ‘கெடை காடு’ என்று தோன்றுகிறது. தங்கு தடை இல்லாத எழுத்து நடை, திடீர் திருப்பங்கள் என்று சலிப்பூட்டாத இயல்பான நிகழ்வுகள், இது வரை பார்த்தும் கேட்டும் அறியாத புதிய அனுபவத்தை தரும் கதைக் களம் என விரிகிற இந்நாவல் ஒரு வாழ்வியலை ஆவணப்படுத்தியிருக்கிறது. அது ஒவ்வொருவரும் படித்து, அனுபவிக்க வேண்டிய வாழ்வியல்!

கெடை காடு

ஆசிரியர்: ஏக்நாத்

விலை: 170

வெளியீடு: டிஸ்கவரி புக் பேலஸ்,

முகவரி: எண் 6, மஹாவீர் காம்ப்ளக்ஸ், முதல்தளம்,

முனுசாமி சாலை, மேற்கு கே.கே நகர்,

சென்னை – 600078.

(பாண்டிச்சேரி விருந்தினர் மாளிகை அருகில்).

போன்: 04465157525. செல்: 9940446650.

நூல் அறிமுகம் – 3

ஹிமாலயம்

book544

ந்த மதத்தைச் சேர்ந்தவராக இருந்தாலும், கடவுள் நம்பிக்கை உள்ளவராகவோ, இல்லாதவராகவோ இருந்தாலும் ‘ஹிமாலயக் கனவு’ எத்தனையோ பேருக்கு உண்டு. அந்தத் தூய பனிமலைப் பிரதேசத்தில் ஒரு முறையேனும் கால் பதித்துவிட மாட்டோமா என ஏக்கம் கொள்கிற அனேகம் பேர் உலகமெங்கும் இருக்கிறார்கள். மனிதர்களுக்குள் வாழ்க்கை குறித்த சரியான புரிதலை, ஓர் உள்ளெழுச்சியை, சக மனிதர்களை நேசிக்கும் மனப்பான்மையை, சிலரின் அறியாமையை, சிலரின் அபார அறிவை என எத்தனையோ அனுபவங்களை விதைத்துவிடும் வலிமை ஹிமாலய பயணத்துக்கு உண்டு. ஹிமாலயத்தின் பேரெழிலின் முன், அபாயங்களை உள்ளடக்கிய அமைதியின் முன் மனித வாழ்க்கை ஒன்றுமேயில்லை என்பதை உணர முடியும். அதன் பல பகுதிகளுக்கு தன் தோழி காயத்ரியுடன் சென்று வந்திருக்கிறார் இந்நூலாசிரியர் ஷௌக்கத். அந்த அனுபவங்களை விரிவாக இந்நூலில் பதிவு செய்திருக்கிறார். அந்த உணர்வுகளும் பாதிப்பும் துளிக்கூடக் குறைந்துவிடாமல் மலையாளத்திலிருந்து தமிழுக்கு மொழிபெயர்த்திருக்கிறார் கே.வி.ஜெயஸ்ரீ.

‘மந்திரங்கள் ஒலிக்க ஆயிரக்கணக்கான மக்கள் கங்கையில் மூழ்கி எழுகிறார்கள். அங்கே நீராடினால், பாவங்களெல்லாம் கரைந்து முக்தியடைவோம் என்பது பக்தர்களின் நம்பிக்கை. எங்களுடைய பாவங்களைக் கரைப்பதற்கான ஆசீர்வாதம் எதனாலோ எங்களுக்குக் கிடைக்கவில்லை. அந்த இடத்தில் கங்கை அவ்வளவு அழுக்காக ஓடிக் கொண்டிருந்தாள்.’

ஒரு படைப்பு கொண்டாடப்பட மொழி ஆளுமை, உத்தி, எழுத்து நடை போன்றவை மட்டும் போதுமானவை அல்ல. எழுத்தாளரின் அனுபவம் எழுத்தின் வழியாக வாசகனுக்குக் கடத்தப்பட வேண்டும். அந்த அடிப்படையில் ‘ஹிமாலயம்’ கொண்டாடப்பட வேண்டிய ஒரு படைப்பு! சுற்றுலாவுக்குப் போய்விட்டு வந்த ஒரு பதிவை இயந்திரத்தனமாக வாசித்துக் கடந்துவிடுவதைப் போல் அல்லாமல், ஹிமாலயத்தின் உள் பொதிந்திருக்கும் அர்த்தத்தை, அனர்த்தத்தை, அங்கே வாழும் மனிதர்களை, அவர்களின் வாழ்வியலை, போராட்டத்தை, குதூகலத்தை, இயற்கை அன்னையின் எழில் வதனத்தை, அது உணர்த்தும் மறை பொருளை… என பல அம்சங்களை அங்குலம் அங்குலமாக அலசியிருக்கிறது ஷௌக்கத்தின் பயணம்.

‘சாதுக்களின், ஆன்ம தேடல் உள்ளவர்களின் (சோம்பேறிகளின்) வாழ்விடமாக இருந்ததனாலோ என்னவோ ஆசிரமங்களும், தர்ம சாலைகளும், கோயில்களும் நிறைந்ததாக இருக்கிறது ரிஷிகேஷ்.’

ஹரித்வார், ரிஷிகேஷ், யமுனோத்ரி, உத்தரகாசி, கங்கோத்ரி, கோமுகம், கேதார்நாத், பத்ரிநாத், அமர்நாத்… ஹிமாலயத்தின் முக்கியமான அனைத்து இடங்களையும், அங்கே பார்த்ததையும், நடந்ததையும், சந்தித்த மனிதர்களையும், அவர்களின் குண இயல்புகளையும், மன விசாரங்களையும் ஒரு தேர்ந்த படைப்பாளியின் வார்த்தைகளில் விவரிக்கிறார் ஷௌக்கத். ஒவ்வோர் இடத்துக்கும் நம்மையும் கையைப் பிடித்து அழைத்துப் போகிறது கே.வி.ஜெயஸ்ரீயின் தேர்ந்த மொழிபெயர்ப்பு. ஷௌக்கத்தின் உணர்வுகள் நம்மையும் தொற்றிக் கொள்கின்றன. உதாரணமாக, யமுனோத்ரி பயணத்தில், யமுனைக் கரையில் ஒரு பாறையில் குத்துக்காலிட்டு அமர்ந்து, எதற்கென்றே தெரியாமல் ஷௌக்கத் கண்ணீர் வடிக்கும் போது நமக்கும் உள்ளூர ஏதோ ஒரு சோகம் வந்து உட்கார்ந்து கொள்கிறது.

‘மரணம் சகஜமானதுதான் என்றும், அது எப்படியும் நிகழக் கூடியதுதான் என்றும், பயப்படக் கூடியதாக அதில் ஒன்றுமேயில்லையென்றும் வாய்ப்பு ஏற்படும் போதெல்லாம் சொல்லிக் கொண்டேயிருந்த நான் வார்த்தைகளின் அர்த்தமின்மையை அப்போது உணர்ந்தேன்.’

மனித நாகரிகம் வளர்ச்சியடைய வித்திட்டவை பயணங்களே! மனதை ஆற்றுப்படுத்தும், லகுவாக்கும் தன்மை இயல்பாகவே பயணங்களுக்கு உண்டு. ஒவ்வொரு நாளும் எத்தனையோ பேர் மோட்டார் வாகனங்களிலும், விமானத்திலும், ரயிலிலும், கப்பலிலும் ஓர் இடத்திலிருந்து மற்றோர் இடத்துக்குச் சென்றபடிதான் இருக்கிறார்கள். மகிழ்ச்சியாக, சோகமாக, புது வாழ்க்கையைத் தேடி, வாழ்க்கையைத் தொலைத்து என மனிதர்களின் பயணம் நிகழ்ந்து கொண்டே இருக்கிறது. ஆனால், தங்களின் பயணத்தை எழுத்துப் பூர்வமாக ஆவணப்படுத்தியவர்கள் மிகக் குறைவு. வெளி வந்த பயணங்கள் தொடர்பான படைப்புகளிலும் வாசகனின் தேடலைப் பூர்த்தி செய்தவை வெகு குறைவு. இந்நூல் பயண இலக்கிய வரிசையில் கவனம் பெற வேண்டிய ஒன்று. ஹிமாலயம், அதன் எழில், ஆகிருதி, உயிர்ப்பு, முக்கியத்துவம் அத்தனையையும் நூலாசிரியர் ஷௌக்கத் தன் எழுத்தின் மூலமாக நம் முன் வைத்திருக்கிறார். ஹிமாலயத்துக்குப் பல முறை சென்று வந்தவர்களே கூட இந்நூலைப் படித்தால் ஒரு புதிய தரிசனத்தைப் பெறுவார்கள் என்று தோன்றுகிறது. அங்கே இதுவரை செல்லாதவர்கள், ஹிமாலயம் குறித்தான தங்கள் கற்பனை எப்படி வேறொரு வடிவம் கொள்கிறது என்பதை அனுபவிப்பார்கள். இந்நூல் குறித்து எழுத்தாளர் பவா செல்லதுரை இப்படிக் குறிப்பிட்டிருக்கிறார்… ‘புனைவுக்கும் சற்று மேலே வைத்துப் பார்க்க்க்கூடிய பிரதி இது’. மறுக்க முடியாத உண்மை.

– பாலு சத்யா

himalayas

நூல்: ஹிமாலயம்

மலையாள மூலம்: ஷௌக்கத்

தமிழில்: கே.வி. ஜெயஸ்ரீ

வெளியீடு: வம்சி புக்ஸ்,

19, டி.எம்.சாரோன்,

திருவண்ணாமலை – 606 601.

செல்: 9445870995, 04175-251468.

விலை: ரூ.300/-

மின்னஞ்சல்: vamsibooks@yahoo.coms

வாசிக்க…

நூல் அறிமுகம் – 1

நூல் அறிமுகம் – 2

 

நூல் அறிமுகம் – 2

வேண்டுவன நல்கும் விரத பூஜைகள் 

 book490 துன்பம் வரும் போது துவண்டு போகும் மனிதர்கள் சரணாகதி அடையும் இடம் இறைவன் சன்னிதானம். இன்னலில் சிக்கியிருக்கும் தருணங்களில் யார் என்ன சொன்னாலும் அதைச் செய்து பரிகாரம் தேட முயற்சிப்பார்கள். கடற்கரையோரக் கோயில், மலை மேல் அமைந்திருக்கும் முருகன் சன்னதி, நவக்கிரகத் தலங்கள் என்று எதையாவது சொல்லி, எந்தத் திசையில் கை காட்டினாலும் விழுந்தடித்துக் கொண்டு ஓடுவார்கள்… மனமுருகப் பிரார்த்திப்பார்கள்… பூஜைகள் செய்வார்கள்… விரதமிருப்பார்கள். எல்லாவற்றுக்கும் அடிப்படை துன்பம் அகல வேண்டும், இன்பம் சூழ வேண்டும்! அந்த வகையில் இந்துமத மரபில் விரத பூஜைகளுக்கு தனி மகத்துவம் உண்டு. முறையாக விரதமிருந்து, பூஜை செய்தால் அதற்கேற்ற உன்னத பலனும் உண்டு. இந்நூலில் ஐந்து விரத பூஜைகள், அவற்றுக்கான அடிப்படை, செய்யும் முறை அனைத்தையும் தொகுத்து விரிவாக விளக்கியிருக்கிறார் எழுத்தாளர் அனுராதா ரமணன்.

‘சங்கடஹர சதுர்த்தி விரதம்’, ‘கேதார கௌரி விரதம்’, ‘அகண்ட தீப பூஜை’, ‘ஆஞ்சநேய பூஜை’, ‘சந்தோஷி மாதா பூஜை’ என ஐந்து முக்கிய பூஜைகள் இந்நூலில் விரிவாகக் குறிப்பிடப்பட்டிருக்கின்றன. ‘தடைகள் விலக, கல்வி சிறக்க, செல்வம் பெருக, மணப்பேறு வாய்க்க, மகப்பேறு கைகூட, தம்பதியர் ஒற்றுமை ஓங்க, பகைவர் நண்பராக எனக் கவலைகள் அனைத்துக்கும் உரிய பரிகாரங்களை உற்ற தெய்வத்துக்குச் செய்து பூஜித்தால் நிச்சயம் பலன் கிட்டும்’ என்று நூலின் முன்னுரையில் சொல்கிறார் இதன் ஆசிரியர்.

ஒவ்வொரு விரதத்துக்கும் அடிப்படையான ஒரு பின்னணி உண்டு. ‘கேதார கௌரி விரதம்’ அன்னை உமா மகேஸ்வரிக்கு கௌதம முனிவரால் உபதேசம் செய்யப்பட்டதாம். இது போன்ற சுவாரஸ்ய தகவல்களும் இந்நூலில் இடம் பிடித்திருக்கின்றன. எளிய நடையில் அனைவரும் புரிந்து கொள்ளும் விதமாக எழுதப்பட்டிருக்கும் இந்நூலில் பூஜைகளும், அவற்றுக்கான விளக்கங்களும், முக்கியத்துவமும், பலன்களும் தெளிவாகக் குறிப்பிடப்பட்டிருக்கின்றன. விரத பூஜைகளைக் கடைப்பிடித்து வாழ்வில் எல்லா நலன்களும் பெறுவோம்.

***

வேண்டுவன நல்கும் விரத பூஜைகள்

தொகுத்தவர்: அனுராதா ரமணன்

வெளியீடு: தங்கத்தாமரை பதிப்பகம்.

விலை: ரூ.25/-

முகவரி: 37, கால்வாய்க்கரைச் சாலை, கஸ்தூரிபா நகர், அடையாறு, சென்னை – 600 020.

தொடர்புக்கு: +91 73057 76099 / 044-2441 4441.

மின்னஞ்சல்: mail2ttp@gmai.com