முதலுதவி… உயிர் காக்கும்!

Image

இன்று உலக முதலுதவி தினம்! இந்த தினத்தை ‘செஞ்சிலுவைச் சங்கம்’ (பன்னாட்டு செஞ்சிலுவை மற்றும் செம்பிறை இயக்கம் – International Red Cross Red Crescent Movement) 2000ம் ஆண்டு அறிமுகப்படுத்தியது. ஓர் உயிரைக் காப்பாற்ற விழிப்புணர்வை ஏற்படுத்தும் வாய்ப்பாக இந்த தினத்தைக் கடைப்பிடிக்க வேண்டும் என்பது இதன் நோக்கம். இந்த வருடம், முதலுதவி தினம் ‘முதலுதவி மற்றும் சாலைப் பாதுகாப்பு’ என்கிற கருத்தின் அடிப்படையில் அனுசரிக்கப்படுகிறது.

உலக அளவில் மனித உயிர்களை பலி வாங்குவதில் முதல் இடம் வகிப்பது சாலை விபத்து. உலக அளவில் 30 வினாடிகளுக்கு ஒருவர் சாலை விபத்தில் இறக்கிறார். விபத்து நிகழ்வுகளில், அது நிகழ்ந்த சில நிமிடங்களுக்குள் 50 சதவிகிதத்துக்கும் மேல் உயிரிழப்பு ஏற்படுகிறது. இருந்தாலும் இந்த உயிரிழப்பைத் தடுக்க முடியும், அடிபட்டவருக்கு முதலுதவி சிகிச்சை அளித்தால்! முதலுதவிப் பயிற்சி, விபத்தின் போது எப்படி நடந்து கொள்ள வேண்டும் என்பதை மக்களுக்குக் கற்றுக் கொடுக்கிறது. மிகப் பெரிய மற்றும் சிறிய அவசரகாலங்களில் உதவுவதற்கும் சிறப்பாக செயல்படுவதற்கும் தேவையான திறமையைக் கொடுக்கிறது.

இந்த ஆண்டு, ‘டிரைவிங் லைசென்ஸ் வைத்திருக்கும் ஒவ்வொருவரும் முதலுதவி பயிற்சி பெற்றிருக்க வேண்டும்’ என்பதை சட்டபூர்வமாக்க வேண்டும்’ என்கிற கோரிக்கையை வைத்திருக்கிறது செஞ்சிலுவைச் சங்கம். முதலுதவிப் பயிற்சி ஒரு மனிதனின் வாழ்க்கையின் அத்தனை நிலைகளிலும், வீடு, பள்ளி, பணிபுரியும் இடம் என எல்லா இடங்களிலும் அவசியம். எனவே, அதை எல்லோருக்கும் அறிமுகப்படுத்த வேண்டிய கட்டாயம் இருக்கிறது. முதலுதவி சிகிச்சையை யார் வேண்டுமானாலும் எளிதாகக் கற்றுக் கொள்ளலாம்.

நெருங்கிய தோழி… நன்றாகப் பேசிக் கொண்டிருக்கும் போதே நெஞ்சைப் பிடித்துக் கொண்டு சரிந்து விழுந்து விடுகிறார். அவருக்கு ஹார்ட் அட்டாக் என்பது நமக்குப் புரிகிறது. இந்த நேரத்தில் அவருக்கு சிறியதாக ஒரு மசாஜ் செய்தால் போதும்… அவரைக் காப்பாற்றிவிடலாம். இதை முதலுதவிப் பயிற்சியில்தான் கற்றுக் கொள்ள முடியும். உண்மையில் முதலுதவி குறித்த விழிப்புணர்வு நம் தேசத்தில் மிக மிகக் குறைவு என்கிறார்கள் மருத்துவர்கள். இந்திய செஞ்சிலுவைச் சங்கம் அதற்கான பயிற்சி முகாம்களைத் தொடர்ந்து நடத்தி வருகிறது. ஒருவர் ஒருமுறை முதலுதவிப் பயிற்சியைக் கற்றுக் கொண்டால் மட்டும் போதும். தொடர்ந்து அந்தப் பயிற்சியை செய்முறையாக செய்து கொண்டே இருந்தால்தான், அவசர காலத்தில் அவரால் சரியாகச் செயல்பட முடியும்.

கிணற்றில் ஒரு சிறுவன் விழுந்து விடுகிறான். அவனைக் கிணற்றிலிருந்து தூக்கியும் விடுகிறார்கள். ஆனால், அவனைக் காப்பாற்ற என்ன மாதிரியான முதலுதவியைத் தர வேண்டும் என்பது பக்கத்தில் இருப்பவர்களுக்குத் தெரியவில்லை என்றால், அவனைக் காப்பாற்ற முடியாது.

பல நாடுகளில் முக்கியமான பொது இடங்களில் ஏ.இ.டி. (Automated External Defibrillators) என்கிற முக்கியமான உயிர்காக்கும் சாதனங்களை வைத்திருக்கிறார்கள். இந்த சாதனங்களைக் கையாளத் தெரிந்தால் போதும்… பல உயிர்களைக் காப்பாற்றிவிடலாம். இது போன்ற முதலுதவி சிகிச்சை சாதனங்களை இந்தியாவில் பல இடங்களில் வைக்க வேண்டிய அவசியத்தில் நாம் இருக்கிறோம்.

அவசர காலங்களில் செய்ய வேண்டியவை… செய்யக் கூடாதவை என சில விஷயங்கள் இருக்கின்றன. அவற்றில் சில…  

விபத்து

* கார் வைத்திருப்பவர்கள், அதில் கண்டிப்பாக முதலுதவிப் பெட்டி வைத்திருக்க வேண்டும்.

* விபத்து ஏற்பட்டு ஒருவர் மயங்கி விழுந்து கிடந்தால், அவருடைய கழுத்துப் பகுதியில் அதிக கவனம் செலுத்த வேண்டும். கழுத்து ஆடாமல் இருப்பதற்கு எதெல்லாம் கிடைக்கிறதோ, அதைப் பயன்படுத்த வேண்டும். அவரை வெகு ஜாக்கிரதையாக மருத்துவமனைக்கு அழைத்துச் செல்லவேண்டும். இல்லையென்றால், ஒரு சிறிய காயம் கூட, பெரிய விளைவை ஏற்படுத்திவிடும்.

* அடிபட்ட ஒருவரின் ஹெல்மெட்டைக் கழற்றும் போது, அவருடைய தலை, கழுத்து மற்றும் உடலுக்குத் தேவையான சப்போர்ட் கொடுக்க வேண்டும். இதைச் சரியாகச் செய்யவில்லை என்றாலும், காயம்பட்டவருக்கு பெரிய அளவில் பாதிப்பு ஏற்படும்.

* அடிபட்டவருக்கு மருத்துவரின் ஆலோசனை இல்லாமல் எந்த மருந்தையும் டானிக்கையும் கொடுக்கக் கூடாது.

பாம்புக் கடி

* பாம்பு கடித்த இடத்தைச் சுற்றி எந்த வெட்டுக் காயத்தையும் ஏற்படுத்தக் கூடாது.

* கட்டு எதையும் போடக் கூடாது.

விஷம்

* யாராவது விஷம் குடித்து மயக்க நிலையில் இருந்தால் அவர்களுக்கு உப்புக் கலந்த தண்ணீரயோ அல்லது வேறு எந்த திரவத்தையோ குடிக்கக் கொடுக்கக் கூடாது. அதை உறிஞ்சிக் குடிப்பதால் அவர் இறந்து போகவும் வாய்ப்பு உண்டு.

வீட்டில்…

* சமையலறையில் உடம்பில் எங்காவது தீக்காயம் ஏற்பட்டால், காயம்பட்ட இடத்தைக் குளிர்ந்த நீரால் கழுவவும். பிறகு அதன் மேல் கொஞ்சம் வெண்ணெயை எடுத்துத் தடவவும்.

* வெட்டுக்காயம் பட்டால், காயம் பட்ட இடத்தை நீரால் கழுவிவிட்டு, அதன் மேல் சிறிது ஐஸ் கட்டியை வைக்கவும். அந்த இடத்தில் ரத்தம் உறைந்து போகும். பிறகு அதன் மேல் முகத்துக்குப் பூசும் பவுடர், கடலை மாவு அல்லது கொண்டைக் கடலை மாவு எதையாவது வைத்து லேசாக அழுத்தவும்.

* வாய்ப்புண்ணால் தாங்க முடியாத வலியா? வெந்நீரில் சிறிது கிறிஸ்டல் உப்பைக் கலந்து வாயைக் கொப்புளிக்கவும்.  கறிவேப்பிலை இலைகளையோ அல்லது 10 மணத்தக்காளி இலைகளையோ வாயில் போட்டும் மெல்லலாம். உடனடி பலன் கிடைக்கும்.

* தோலில் தடிப்பு அல்லது கட்டிகள் ஏற்பட்டால் மஞ்சள் தூளும் தேங்காய்த் தண்ணீரும் கலந்து பூசலாம்.

* அஜீரணக் கோளாறால் ஏற்படும் தலைவலிக்கு சீரகத்தை நீரில் கொதிக்க வைத்து அருந்தினால் பலன் கிடைக்கும்.

* வெயிலில் நடந்ததால் ஏற்பட்ட களைப்பில் மயக்கமா? ஒரு டம்ளர் தண்ணீரில் சிறுதுண்டு இஞ்சி, எலுமிச்சைச்சாறு ஒரு டேபிள்ஸ்பூன், சிறிது சர்க்கரை, சிறிது உப்புக் கலந்து குடித்தால் உடனடியாக மயக்கம் தெளியும்.

இவையெல்லாம் வீட்டு வைத்தியம் மட்டுமல்ல… முதலுதவியும் கூட.

ஒவ்வொரு வீட்டிலும் முதலுதவிப் பெட்டி இருப்பது நல்லது. அதை அவ்வப்போது பராமரிக்க வேண்டும். அதில் துணி, காயங்களுக்குத் தேவைப்படும் அத்தியாவசிய மருந்து, அவசர உதவி எண்கள், அருகிலிருக்கும் மருத்துவமனை மற்றும் மருத்துவர்களின் தொலைபேசி எண்களைக் குறித்து வைத்திருக்க வேண்டும். வீட்டில் இருக்கும் பெரியவர்களுக்கு முதலுதவி சிகிச்சை செய்யத் தெரிந்திருக்க வேண்டும்.

பல மருத்துவமனைகளிலும், செஞ்சிலுவைச் சங்கங்களிலும் முதலுதவி செய்வதற்கான பயிற்சிகளைக் கற்றுக் கொடுக்கிறார்கள். அதைக் கற்றுக் கொள்வது ஒவ்வொருவரின் சமூகக் கடமை. முதலுதவி சிகிச்சை உயிரைக் காப்பாற்றும்… அது எங்கேயும், எப்போதும், எல்லோருக்கும் தேவையான உயிர் காக்கும் ஆயுதம்.

– பாலு சத்யா

 Picture Courtesy: http://www.ncfsc.com/ 

குழந்தைகள் பாதுகாப்பு விழிப்புணர்வு திட்டம்!

Image

குழந்தைப் பாதுகாப்பைப் பற்றி நாம் யோசிக்கிறோமா? ஆபத்து, அவசர காலத்தில் அவர்களுக்கு என்னென்ன முதலுதவி, சிகிச்சை தரவேண்டும் என்று கற்று வைத்திருக்கிறோமா? இப்படிக் கேட்டால் பெரும்பாலானவர்கள் சொல்லும் பதில்   ‘இல்லை’. இன்றைய அவசர உலகில் அதற்குப் பலருக்கும் நேரமும் இருப்பதில்லை. அந்த அவசியத்தைப் பற்றி யோசித்திருக்கிறது ஒரு மருத்துவமனை. யோசித்ததோடு நிறுத்திக் கொள்ளாமல் அதை செயல்படுத்தவும் களத்தில் இறங்கியிருக்கிறது. அது, சென்னை அப்போலோ குழந்தைகள்  மருத்துவமனை.

அவசரநிலை நேர்வுகளின்போது குழந்தைகளுக்கு முதலுதவி மற்றும் அடிப்படை உயிர்காப்பு மற்றும் ஆதரவை வழங்குவதில் முக்கியப் பங்காற்றுபவர்கள் ஆசியர்களும் பெற்றோர்களும். அவர்களுக்கு அந்தத் திறனை கற்றுக் கொடுக்க, சென்னை மாநகரிலுள்ள பள்ளிகளை இலக்காகக் கொண்ட விழிப்புணர்வு இயக்கம் ஒன்றை அப்போலோ குழந்தைகள் மருத்துவமனை கடந்த ஆண்டு செப்டம்பர் மாதத்தில் ‘உலக முதலுதவி தின’ அனுசரிப்பின்போது தொடங்கியது. இன்றைக்கு, அது தொடங்கப்பட்டு ஓராண்டு நிறைவடைந்த நிலையில், குழந்தைகள் காப்பகங்கள் உட்பட 40 பள்ளிகளில் இச்செயல்திட்டமானது ஆர்வத்தோடு செயல்படுத்தப்பட்டு வருகிறது. மருத்துவர்களின் நேரடி பயிற்சி மற்றும் மேற்பார்வைகளின் கீழ் குழந்தைகளுக்கு அவசரநிலை மருத்துவ உதவி தேவைப்படும் முதல் 30 நிமிடங்களில் உயிர்காக்க அவசியமான முதலுதவியை வழங்க 600 ஆசிரியர்கள் பயிற்சியையும், அதற்கு உரிய சான்றிதழையும் பெற்றிருக்கிறார்கள்!

Image

குழந்தைகள் மருத்துவமனையில் இதற்காக நடைபெற்ற ஆண்டுதின நிகழ்ச்சியில் தமிழ்நாடு காவல்துறை தலைவர் K.இராமானுஜம், ஐ.பி.எஸ்., D.சபிதா, ஐ.ஏ.எஸ்., அரசு முதன்மைச் செயலர், பள்ளி கல்வித்துறையைச் சேர்ந்த பிரபல பிரமுகர்கள் பங்கேற்றனர். வீட்டில், சாலையில், பள்ளி வளாகத்துக்குள் குழந்தைகளை பாதிக்கின்ற, விரும்பத்தகாத விபத்துகள், நிகழ்வுகளை தவிர்க்கவும் உதவவும் அரசு மற்றும் தனியார் துறையைச் சேர்ந்த பள்ளிகள் அதிக எண்ணிக்கையில் பங்கேற்பதை ஊக்குவிப்பதாக இவர்களின் பங்கேற்பு அமைந்தது. குழந்தைகளுக்குக் காயங்கள் ஏற்படுவதை தடுப்பதற்காக,  அப்போலோ குழந்தைகள் மருத்துவமனை தன் ஆதரவை வித்தியாசமான முறையில் தெரிவித்தது. இந்நிகழ்ச்சியில் பங்கேற்ற அனைத்துப் பள்ளிகளின் பிரதிநிதிகளுக்கும் சிபிஆர் சாதனத்தொகுப்பை வழங்கியது.

குழந்தைகளுக்கு விபத்து ஏற்படும் நேர்வுகளில், அது நிகழ்ந்ததற்கு அடுத்த முதல் முப்பது நிமிடங்கள்தான் அவர்கள் உயிர் பிழைப்பது அல்லது மீட்கப்படுவதற்கான சாத்தியங்கள் நிறைந்த தருணம். குழந்தைகள் தொடர்பான விபத்துகள் அதிகரித்துவரும் நிலையில், பங்கேற்கின்ற பள்ளிகளின் நிர்வாகம் மற்றும் சென்னை போக்குவரத்து காவல்துறையோடு சேர்ந்து அப்போலோ குழந்தைகள் மருத்துவமனையைச் சேர்ந்த மருத்துவர்கள், இத்தகைய அவசரநிலையை கையாள போதுமான அளவு தயாராக இருக்கிறார்கள். அதோடு, தொடர்புடைய நபர்களுக்கு கல்வியையும் பயிற்சியையும் வழங்குவதற்கான முயற்சியையும் மேற்கொள்கிறார்கள். பூச்சிக்கடிகள், தொண்டையில் ஏதாவது  சிக்கிக்கொள்வது, தீக்காயங்கள், அதிர்ச்சி மற்றும் விபத்து போன்ற நேர்வுகளில் உடனடியாக முதலுதவி நடவடிக்கையை விரைவாகச் செய்ய இது போன்ற பயிற்சிகள் அவர்களுக்கு உதவும்.

Image

அவசரநிலையில், மருத்துவ சிகிச்சைக்காக பாதிக்கப்பட்ட குழந்தையை மருத்துவமனைக்கு அழைத்துச் செல்வதற்கு முன்பாக நாம் மேற்கொள்ள வேண்டிய உயிர்காப்பு நடவடிக்கைகள் சில இருக்கின்றன. அது தொடர்பான ஒரு சிற்றேடு, பயிற்சி பெற்ற நபர்களுக்கு வழங்கப்படுகிறது. அப்போலோ குழந்தைகள் மருத்துவமனையின் குழந்தைகள் பிரிவு அவசரநிலை மற்றும் ஐசியு துறையின் முதுநிலை மருத்துவர் டாக்டர் இந்திரா ஜெயகுமார் இந்நிகழ்ச்சியில் பேசினார்.   “இச்செயல்திட்டத்தின் முதலாண்டானது, அதிக மகிழ்ச்சியும் நம்பிக்கையும் அளிப்பதாக இருக்கிறது.  சென்னையிலும் தமிழ்நாடு முழுவதிலும் இன்னும் அதிக பள்ளிகளை வருகின்ற மாதங்களில் இத்திட்டத்தில் ஈடுபடுத்த முடியும் என்று நாங்கள் நம்புகிறோம். வயது வந்த நபர் எதிர்கொள்கின்ற இதே போன்ற சிரமங்களோடு ஒப்பிடும்போது குழந்தைகளுக்கு ஏற்படுகின்ற காயங்கள் மாறுபட்டவை. வீடுகளில் பெற்றோர் போதுமான பாதுகாப்பு நடவடிக்கைகளை எடுக்க வேண்டும். முதலுதவி வழங்குவதற்கு போதுமான வசதியிருப்பதையும் அவற்றை வழங்க ஆசிரியர்கள் பயிற்சியளிக்கப்பட்டிருப்பதையும் பள்ளி நிர்வாகம் உறுதி செய்ய வேண்டும். கீழே விழுவதானால் ஏற்படும் ரத்தக் கசிவு அல்லது எலும்பு முறிவிலிருந்து விளையாட்டுப் பொருட்கள் அல்லது உணவுப் பொருட்களை விழுங்கும்போது குழந்தைகளின் தொண்டையில் சிக்கிக்கொள்வது என அனைத்துமே ஆபத்தான நிகழ்வுகள். இவற்றைக் கையாள முதலுதவி செய்பவர்கள் தயார் நிலையில் இருப்பது அவசியம். விபத்து நேரத்திலிருந்து பயிற்சி பெற்ற மருத்துவ நிபுணர்களிடம் குழந்தை கொண்டு சேர்க்கப்படும் வரை, முடிந்தவரை மிகக் குறைந்த அளவே பாதிப்பு ஏற்படுவதை நாம் உறுதிப்படுத்த வேண்டும். அப்போலோ நடத்திய இப்பயிற்சித் திட்டத்தால் பயனடைந்த பெற்றோர்களும் ஆசியர்களும், இத்தகைய சூழ்நிலைகளில் போதுமான முன்னெச்சரிக்கை நடவடிக்கைகளை பிறருக்கும் கற்பிக்க வேண்டும்.” என்று கூறினார்.

சென்னை மாநகரிலுள்ள குழந்தைகள் பாதுகாப்பாக இருப்பதை உறுதிபடுத்த ‘அப்போலோ ஹாஸ்பிடல்ஸ் குழுமம்’ மேற்கொள்கிற சிறப்பான செயல்முயற்சியாக ‘குழந்தை
பாதுகாப்பு விழிப்புணர்வு திட்டம்’ இருக்கிறது. எல்லோருக்குமே இதில் பொறுப்பு இருக்க வேண்டியது அவசியமென்பதால் சென்னை போக்குவரத்து காவல்துறையின் ஆதரவோடு சாலை விபத்து பாதுகாப்பு விழிப்புணர்வு மற்றும் அவசர நிலையில் முதலுதவி வழங்குவதற்கான பயிற்சி திட்டங்களை அப்போலோ மருத்துவமனை நடத்திவருகிறது. பள்ளிக் குழந்தைகளை அழைத்துச் செல்லும் பள்ளி வேன் ஓட்டுனர்கள் மற்றும் ஆட்டோ ஓட்டுனர்களுக்கு மருத்துவ உதவி பணியாளர்களால் இப்பயிற்சி வழங்கப்பட்டு வருகிறது. மேலும், குழந்தைகளுக்கான அவசர நிலையைக் கையாள, காவல்துறையினருக்குப் பயிற்சியளிக்க தனியாக பி.எல்.எஸ். திட்டத்தை நடத்த இருக்கிறது அப்போலோ மருத்துவமனை. நல்ல திட்டம். வளரட்டும்!