வழிகாட்டும் ஒளி!

(‘குங்குமம் தோழி’ பொறுப்பாசிரியர் ஆர்.வைதேகிக்கு ‘பாப்புலேஷன் ஃபர்ஸ்ட்’ அமைப்பு வழங்கிய ‘லாட்லி ஊடக விருது’ (பெஸ்ட் கேம்பெயின்) இந்த ஆண்டு கிடைத்திருக்கிறது. அவருடைய விருது பெற்ற ‘வழிகாட்டும் ஒளி’ என்ற முழுக் கட்டுரை இங்கே…) 

Image

உதாரணமாகவும் உதவிக்காகவும் ஒரு அமைப்பு! அப்பா, கணவன், மகன் பிறந்தது முதல் சாகும் வரை ஏதோ ஒரு ரூபத்தில் பெண்களின் வாழ்க்கையில் சிலபல ஆண்கள்… இணையாக இறுதி வரை வருபவர்களைவிட, இருப்பையே வெறுக்கச் செய்கிற ஆண்களே அதிகம். சிலருக்கு ஆண் துணையில்லாத வாழ்க்கை இம்சை. பலருக்கோ ஆணுடனான வாழ்க்கை நரகம்! திருமணமாகாதவர்கள், கணவரைப் பிரிந்தவர்கள், இழந்தவர்கள், விவாகரத்தானவர்கள், குடும்பத்தாரால் கைவிடப்பட்டவர்கள் என தனிமையில் தவிக்கும் பெண்களுக்கு ஆறுதலையும், வாழ்க்கையில் வெளிச்சத்தையும் காட்டுகிற ஒரு அமைப்பு ‘வழிகாட்டும் ஒளி’.

‘வழிகாட்டும் ஒளி’யை ஆரம்பித்து, வழிநடத்தும் பிரேமா, ரேவதி, சுஜாதா ஆகிய மூவருமே வாழ்க்கையில் வஞ்சிக்கப்பட்டவர்கள்.

‘‘காலத்துக்கும் கூட வர்றதுக்கு ஒரு துணை வேணும்னுதான் எல்லாரும் கல்யாணம் பண்ணிக்கறோம். என்னோடது காதல் கல்யாணம். பதினஞ்சு வருஷ கல்யாண வாழ்க்கையில ஒரு நாள் கூட சந்தோஷமோ, நிம்மதியோ இல்லை. அர்த்தமே இல்லாத அந்த வாழ்க்கையிலேருந்து வெளிய வர வேண்டிய கட்டாயம் எனக்கு. பிரிஞ்சு போன கணவர் ரூபத்துல மட்டுமில்லாம, சமுதாயத்துலேருந்தும் எக்கச்சக்க பிரச்னைகள். தனிமை பயமா இருந்தது. என்னைச் சுத்தி இருந்த நல்ல மனசுக்காரங்களோட ஆறுதலும் அரவணைப்பும் என்னை தனிமையிலேருந்து வெளிய கொண்டு வந்தது.

ஓரளவு மீண்டு எழுந்தபோது, மிகப்பெரிய விபத்துல சிக்கி, கிட்டத்தட்ட மரணப் படுக்கைக்கே போயிட்டேன். அந்த விபத்துலேயே என் வாழ்க்கை முடிஞ்சிருக்கலாம். இத்தனையும் தாண்டி, நான் உயிரோட இருக்கேன்னா, அதுக்கு ஏதோ ஒரு காரணம் இருக்கணும்னு உணர்ந்தேன். குணமாகி வந்ததும், ‘நேசம்’னு ஒரு அமைப்பை ஆரம்பிச்சேன். ஆர்வமிருந்தும் படிக்க வசதியில்லாத பிள்ளைகளுக்கும், மாற்றுத்திறனாளிகளுக்கும் முடிஞ்ச உதவிகளைச் செய்யற அமைப்பா ‘நேசம்’ வளர ஆரம்பிச்சது. அதுக்காக களத்துல இறங்கினப்ப, நாங்க சந்திச்ச பெண்களோட நிலைமை ரொம்பப் பரிதாபமா இருந்தது. அப்பா, கணவன், மகன்னு எந்த ஆணோட ஆதரவும் இல்லாமத் தவிக்கிற பெண்களோட கண்ணீர் கதைகளை தினம் தினம் கேட்க ஆரம்பிச்சோம். தனிமையில தவிக்கிற பெண்களுக்கு ஏதாவது செய்யணுங்கிற வைராக்கியத்துல ‘வழிகாட்டும் ஒளி’ அமைப்பை ஆரம்பிச்சேன். ஆண் துணை இல்லாம அலைக்கழிக்கப்படற எந்தப் பெண்ணும் இந்த அமைப்புல உறுப்பினராகலாம். அவங்களோட படிப்புக்கும் தகுதிக்கும் ஏத்தபடி அவங்களுக்கு ஒரு எதிர்காலத்தை உருவாக்கிக் கொடுத்து, சொந்தக் கால்கள்ல நின்னு, வாழ்ந்து காட்ட முடியும்னு ஒரு நம்பிக்கையைக் கொடுக்கிற அமைப்பா வளர்ந்திட்டிருக்கு…’’

கண்ணீரைத் துடைத்தபடி சொல்கிற பிரேமா, ‘வழிகாட்டும் ஒளி’யின் தலைவி.

***

பார்வையில் கனிவும் மாறாத புன்னகையுமாக அமைதியாக இருக்கிற ரேவதி, இந்த அமைப்பின் செயலாளர். துயரங்களின் உச்சம் பார்த்தவர்தான் இவரும்.

‘‘பெரியவங்கதான் பார்த்து கல்யாணம் பண்ணி வச்சாங்க. எனக்கு வந்தவருக்கோ, படிச்ச பொண்ணுங்க எல்லாம் தப்பானவங்கன்ற எண்ணம். தினம் தினம் அவரோட சந்தேகப் பார்வையாலேயும், அசிங்கமான கேள்விகளாலேயும் கூனிக்குறுகி நிப்பேன். அந்தச் சூழல்ல என் குழந்தை வளர்றது பிடிக்காம, வெளியே வந்தேன். ‘நீ வாழ்ந்துடுவியான்னு பார்க்கறேன்’னு அவர் சவால்விட்டார். மூணு வயசுக் குழந்தையோட வெளியில வந்தப்ப, எனக்கான ஒரே நம்பிக்கை என்னோட எம்.ஏ படிப்பும், டீச்சர்  வேலையும்தான். இன்னிக்கு என் பையனை எம்.பி.ஏ படிக்க வச்சு, ஒரு நல்ல அந்தஸ்துல உட்கார வச்சிருக்கேன். என் பையன்தான் எனக்கு உலகம். பெண்களை எப்படி நடத்தணும், மதிக்கணும்னு அவனுக்கு சொல்லிக் கொடுத்து வளர்த்திருக்கேன்.

என் அண்ணன் கூட பேங்க்ல வேலை பார்க்கற பிரேமாவோட அறிமுகம் கிடைச்சது. அனுபவங்களைப் பகிர்ந்துக்கிட்டதுல, நான் தனியாள் இல்லைங்கிற நம்பிக்கை தெரிஞ்சது. நாங்க அனுபவிச்ச வலி, இனிமே எந்தப் பெண்ணுக்கும் வரக்கூடாது, ‘வழிகாட்டும் ஒளி’ல என்னையும் இணைச்சுக்கிட்டேன்”.

வலிகளைத் தாண்டி, வெற்றி பெற்ற பிறகும்கூட, கடந்த கால நினைவுகள் கண்ணீராக வழிகின்றன ரேவதிக்கு.

***

டபடப் பேச்சும், துருதுரு பார்வையுமாக இருக்கிற சுஜாதா, சோகங்களின் புதைகுழியில் சிக்கி மீண்டவர் என்றால் நம்ப முடியவில்லை.

‘‘மதுரையில என் மாமனார் குடும்பம் ரொம்பவும் பிரபலமானது. சின்ன வயசுலேயே கல்யாணமாயிடுச்சு. கணவருக்குக் குடிப்பழக்கம் இருந்தது. வேலை எதுவும் பார்க்காம, 24 மணி நேரமும் போதையிலேயே இருப்பார். எப்போதும் சண்டை, பிரச்னைன்னு குடும்பத்துல நிம்மதியே இல்லாமப் போச்சு. போதை தலைக்கேறினதுல, ஒரு நாள் நடுராத்திரி வீட்டை விட்டு வெளியே துரத்திவிட்டார். ஒண்ணேகால் வயசுல மகனையும், பத்தரை வயசுல மகளையும் வச்சுக்கிட்டு வழி தெரியாம நடுத்

தெருவுல நின்னேன்.

நான் பத்தாவதுக்கு மேல படிக்கலை. உலகம் தெரியாது. ‘நீ தற்கொலை பண்ணிக்கிற அளவுக்கு உன்னை டார்ச்சர் பண்ணுவேன்’னு மிரட்டின கணவருக்கு முன்னாடி, என் பிள்ளைங்களுக்காகவாவது வாழ்ந்தே ஆக வேண்டிய கட்டாயம். ஸ்கூல் தோழி மூலமா, ‘ஆல் இந்தியா பியூட்டிஷியன் அண்ட் ஹேர் டிரெஸ்ஸர்ஸ் அசோசியேஷன்’ல வேலை கிடைச்சு, இப்ப பி.ஆர்.ஓ.வா இருக்கேன். அப்படியே எம்.ஏ. முடிச்சேன்.

ஒரு மீட்டிங்ல பிரேமாவை சந்திச்சேன். வந்தவங்க பெயர்களை லிஸ்ட் எடுத்திட்டிருந்த நான், பிரேமான்னு சொன்னதும், இனிஷியல்னு கேட்டேன். ‘ஜஸ்ட் பிரேமா’ ன்னு சொன்னாங்க. கணவனோட இனிஷியல் இல்லாம பேரை சொல்றதே தப்புங்கிற நினைப்புல வளர்ந்த எனக்கு, அது அதிர்ச்சியாகவும் ஆச்சரியமாகவும் இருந்தது. அவங்களோட ‘நேசம்’ அமைப்புல என்னையும் இணைச்சுக்கிட்டேன். அதுக்கப்புறம்தான் கணவன் மட்டுமே வாழ்க்கை இல்லைங்கிறது புரிய ஆரம்பிச்சது. மகனையும் மகளையும் நல்லபடியா வளர்த்து, ஆளாக்கிட்டேன். நடந்ததை நினைச்சு இன்னிக்கும் நான் ஒரு சொட்டு கண்ணீர்கூட விடறதில்லை. 28 வயசுல நடந்தது 40 வயசுல நடந்திருந்தா? என் உடம்புலேயும் மனசுலேயும் தெம்பிருக்கிறப்பவே நடந்ததையும், நான் ஜெயிச்சதையும் நினைச்சு சந்தோஷப்பட்டுக்கறேன்’’ என்கிற சுஜாதா, ‘வழிகாட்டும் ஒளி’யின் பொருளாளர்.

‘‘தனிமை வாழ்க்கைக்குத் தள்ளப்பட்ட எந்தப் பெண்ணும், ‘வழிகாட்டும் ஒளி’யில் இணையலாம். ‘கணவனோடு பிரச்னையா, பெத்த பிள்ளைங்க விரட்டறாங்களா, உடனே விட்டுட்டு வந்து எங்க அமைப்புல சேருங்க’ன்னு நாங்க சொல்லலை. பிரச்னை உள்ள யாரும் முதல்ல எங்களை அணுகினா, அவங்களுக்கு கவுன்சலிங் கொடுத்து, பிரியாம இருக்க முயற்சிகள் செய்வோம். உளவியல் நிபுணர், வக்கீல்னு எங்க அமைப்புல நிபுணர் குழு இருக்கு. அவங்க முயற்சிகள் எல்லாம் பலனில்லாமப் போனா, அடுத்து என்ன பண்ணலாங்கிறதுக்கான வழிகாட்டலும் எங்கக்கிட்ட கிடைக்கும். எங்க மூணு பேருக்கும் நடந்த கொடுமைகள் எங்களோடயே போகட்டும். கண்ணுக்கெதிரே அது இன்னொரு பெண்ணுக்கு நடக்கிறதைப் பார்த்துக்கிட்டு, நாங்க சும்மா இருக்க மாட்டோம். நாங்க இருக்கோம் உங்களுக்கு… உதாரணமாகவும் உதவிக்காகவும்னு காட்டத்தான் ‘வழிகாட்டும் ஒளி.’’’

வலிகளைக் கடந்த தோழிகளின் பேச்சையும் அனுபவங்களையும் பார்க்கும்போது இப்படித்தான் எண்ணத் தோன்றுகிறது.

‘தனியாக இருக்கும்போது ஒன்றுமில்லாதவர்களாக இருப்பவர்கள், சேர்ந்திருக்கும்போது எல்லாமுமாகவும் ஆகிறார்கள்!’

– ஆர்.வைதேகி

படங்கள்: ஆர்.சந்திரசேகர்

லாட்லி ஊடக விருது 2013

பிளாக் பிரின்ட்டிங்கில் பிசி!

Image

‘காட்டனோ, காஞ்சிபுரம் பட்டோ… நாம் கட்டினா நாலு பேராவது நல்லாயிருக்கேனு பாராட்டணும். எங்க வாங்கினீங்கன்னு விசாரிக்கணும்…’ – புது உடை உடுத்தும் எல்லா பெண்களின் ஆசையும் இப்படித்தானே இருக்கும்? டிசைனர் சேலையும் சுடிதாரும் இருக்குதான். ஆனால், பட்ஜெட்தான் பயமுறுத்துகிறதே!

உங்கள் உடை, கூட்டத்தில் உங்களைத் தனித்துக் காட்ட வேண்டுமா? பிளாக் பிரின்ட்டிங் செய்த உடைகளை உடுத்தின அனுபவமுண்டா உங்களுக்கு?

பலருக்கும் பிளாக் பிரின்ட்டிங் என்றால் என்னவென்றே தெரிந்திருக்க வாய்ப்பில்லை. இன்னும் சிலரோ, அதெல்லாம் பணக்காரர்களுக்கானது என்ற நினைப்பில் இருப்பார்கள். சில  நூறு ரூபாய் மதிப்புள்ள சாதாரண காட்டன் சேலை, பிளாக் பிரின்ட்டிங் செய்த பிறகு ஏதேனும் ஒரு பொட்டிக்கில் சில ஆயிரம் ரூபாய் விலை அட்டையுடன் அழகாகத் தொங்குவதைப் பார்த்திருப்பீர்கள். அதுதான் பிளாக் பிரின்ட்டிங்கின் மவுசு! 

Image

Image

ந்திராவைச் சேர்ந்த அருணா விஜயகுமாரை, இன்று சென்னையில் முன்னணி பிசினஸ் உமனாக அடையாளம் காட்டியிருப்பது பிளாக் பிரின்ட்டிங்தான். இந்தத் துறையில் இவருக்கு 10 வருட அனுபவம்!

”ராஜஸ்தான், ஜெய்ப்பூர், ஹைதராபாத்ல பிளாக் பிரின்ட்டிங் ரொம்பப் பிரபலம். நான் ஹைதராபாத்ல கத்துக்கிட்டேன். கல்யாணத்துக்குப் பிறகு சென்னைக்கு வந்து, வீட்டுக்குள்ளயே சின்ன அளவுல பண்ணிட்டிருந்தேன். இதுக்கான வரவேற்பைப் பார்த்துட்டு, இப்ப தனியா யூனிட் ஆரம்பிச்சுப் பண்ணிட்டிருக்கேன். படிப்புமில்லை, பொரிய வசதியுமில்லை, எப்படித்தான் பிழைக்கிறதுனு நினைக்கிறவங்களுக்கு, இது அருமையான பிசினஸ். வேலையில்லாதவங்க மட்டுமில்லாம, பேங்க், ஐ.டி., ஸ்கூல்ல வேலை பார்க்கிறவங்க கூட இதை பொழுதுபோக்கா கத்துக்கிட்டு, சொந்த உபயோகத்துக்கு செய்துக்கறாங்க…” என்கிற அருணாவின் பயிற்சியில், இதுவரை 25க்கும் அதிகமானோர் வெற்றிகரமாக பிசினஸ் நடத்திக் கொண்டிருக்கிறார்கள்!

Image

”ஒரு காலத்துல இது ஆம்பிளைங்க மட்டுமே பண்ற பிசினஸா இருந்தது. மரத்துலேருந்து எடுக்கிற பிசினை வச்சுத்தான் பண்ணுவோம். இன்னிக்கு இருக்கிற அளவு இத்தனை கலர்கள் கிடையாது. வெயில் காலத்துல மட்டும்தான் பண்ண முடியும். மழை நாள்னா, கலர் பரவிடும். பிரின்ட் செய்த துணியை இட்லி அவிக்கிற மாதிரி வேக வச்சு, அதுக்கு மேல சல்ஃப்யூரிக் ஆசிட் போட்டாத்தான் கலரும் பிரின்ட்டும் நிற்கும். அப்படியெல்லாம் செய்தாலும், நினைக்கிற கலர் அப்படியே வராது. கிட்டத்தட்டதான் கிடைக்கும். ஒரு மெட்டீரியலை முடிக்க குறைஞ்சது 1 வாரம் பிடிக்கும். ரெடிமேட் பெயின்ட், விரும்பின கலர், சிரமமில்லாத வேலைன்னு இன்னிக்கு எல்லாமே சிம்பிளாயிடுச்சு. ஒரு மணி நேரத்துல் ஒரு சேலை பிரின்ட் பண்ணி, உடுத்திட்டே போயிடலாம்! ஆண்கள் மட்டுமே பண்ணிட்டிருந்த இந்த பிசினஸ்ல இப்போ பெண்கள்தான் அதிகமிருக்காங்க. எத்தனை போட்டியாளர்கள் இருந்தாலும், யாருமே சோடை போகாத ஒரே பிசினஸ் இது” என்கிறார் பிளாக் பிரின்ட்டிங்கில் 47 வருட அனுபவம் கொண்ட கே.பழனி.

 

இது இப்படித்தான்! 

Image

Image

மூலப் பொருள்கள்

ஆபீஸ் டேபிள், மர ஃபிரேமும் லெதர் கவரிங்கும் செய்த ட்ரே, உட்டன் பிளாக்குகள், பிக்மென்ட் கலர்கள், உட்டன் ஸ்க்வீசர், இது தவிர பிரின்ட் செய்ய சேலையோ, சல்வாரோ, துப்பட்டாவோ இப்படி ஏதோ ஒரு மெட்டீரியல். சிந்தெடிக் மட்டும் கூடாது. பியூர் காட்டன், பியூர் பட்டு, பியூர் ஷிஃபான், பியூர் கோட்டா மெட்டீரியல்களில் மட்டும்தான் பிரின்ட் செய்ய முடியும்.

எங்கே வாங்கலாம்?

உட்டன் பிளாக்குகளை சாதாரண கார்பென்டர்களிடம் கொடுத்துச் செய்ய முடியாது. தேக்குமரத்தில், நுணுக்கமாகச் செய்ய வேண்டிய வேலை ஆதலால், கலை தெரிந்தவர்களிடம் செய்து வாங்க வேண்டும். ஹைதராபாத் மற்றும் மசூலிப்பட்டினத்திலிருந்து வரவழைக்கப்படுகிற பிளாக்குகள் சிறப்பாக இருக்கும்.

முதலீடு

வீட்டிலுள்ள பழைய டேபிளே போதும். உட்டன் பிளாக்குகள் குறைந்தது 50 ரூபாய் முதல் அதிகபட்சமாக 500 ரூபாய் வரை கிடைக்கும். பிக்மென்ட் கலர் கிடைக்கும். பிக்மென்ட் கலர் அரை கிலோ 200 ரூபாய். அதில் 4 சேலைகளுக்குப் போடலாம். உட்டன் ஸ்க்வீசர் 50 ரூபாய். மெட்டீரியல் செலவு உள்பட மொத்தத்துக்கும் 10 முதல் 25 ஆயிரம் ரூபாய்.

இட வசதி?

டேபிள் போடும் அளவுக்குகான இடம் போதுமானது. பிரின்ட் செய்த துணிகளை 1 மணி நேரம் வெயிலில் காய வைக்க வேண்டும் என்பதால், உலர்த்தத் தோதாக சிறிது இடம் தேவை. சுற்றுப்புறம் மாசடையுமோ என்கிற பயமும் தேவையில்லை.

எதில் எல்லாம் செய்யலாம்?

சேலை, சுடிதார், டி ஷர்ட், குர்தா டாப்ஸ், துப்பட்டா, திரைச் சீலை, டேபிள் மேட், படுக்கை விரிப்பு, சணல் பைகள், பேப்பர் பைகள்…

மாத வருமானம்?

ஒரு சேலைக்கு அடக்க விலை 100 என்றால், 300 ரூபாய் வாங்கலாம். டிசைன் மற்றும் நுணுக்கத்தைப் பொறுத்து இது கூடும். இது வெறும் பிளாக் பிரின்ட்டிங் மட்டும் செய்து கொடுப்பதற்கான கூலி. ஒரு நாளைக்கு 2 முதல் 4 சேலைகளுக்கு செய்யலாம். செலவெல்லாம் போக மாதம் ரூ.20 ஆயிரம் வருமானம் பார்க்கலாம்.

மார்க்கெட்டிங்?

பெரிய ஜவுளிக்கடைகளில் பிளாக் பிரின்ட்டிங் வேலைக்கு ஆர்டர் இருக்கிறது. தூக்கிப் போட மனசின்றி பழசானாலும் பத்திரப்படுத்தி வைத்திருக்கிற புடவைகளுக்கு பிளாக் பிரின்ட்டிங் செய்வதன் மூலம் புதிய பொலிவைத் தர முடியும். அனேகமாக எல்லா பெண்களிடமும் இப்படி சென்டிமென்ட் சேலைகள் இருக்கும் என்பதால் அவர்களே உங்களுக்குப் பிரதான வாடிக்கையாளர்கள் ஆவார்கள்.

பயிற்சி?

பிக்மென்ட், கடி, மெட்டாலிக் என இதில் 3 வகையான பிரின்ட்டிங் உண்டு. முதல் வகை டார்க் கலர்கள் பற்றியது. கடி என்பது லைட் கலர்களுக்கானது. கோல்ட், சில்வர், காப்பர் கலர்கள் எல்லாம் மெட்டாலிக் வகையறா. மூன்றுக்கும் ஒரே நாள் பயிற்சி. மார்க்கெட்டிங் டிப்ஸ், பொருள்கள் வாங்க ஆலோசனை என எல்லாவற்றுக்கும் சேர்த்து ரூ.700 கட்டணம்.

–  ஆர்.வைதேகி

படங்கள்: ஆர்.சந்திரசேகர்

அருணா விஜயகுமார் தொலைபேசி எண்: 9003124632

பட்டுப்புடவை பாலீஷ்… பளிச் பணம்!

Image

ட்டுக்கும் பெண்களுக்குமான பந்தம், தலைமுறைகள் தாண்டி, அன்று முதல் இன்று வரை தொடர்கிற பிணைப்பு! பட்டு விஷயத்தில் எல்லா பெண்களுக்கும் ஏதோ ஒரு சென்டிமென்ட் நிச்சயம் இருக்கும்.

முதல் பட்டுப்புடவை, கூரைப்புடவை, சீமந்தப் புடவை, ப்ரியமான யாரோ பரிசளித்த புடவை… இப்படி ஒவ்வொருவரின் ஒவ்வொரு பட்டுப்புடவையின் பின்னணியிலும் ஒரு சுவாரஸ்யம் ஒளிந்திருக்கும். பழசானால் தூக்கிப் போடுகிற மற்ற புடவைகளைப் போல பட்டை அத்தனை சுலபத்தில் ஓரங்கட்ட யாருக்கும் மனசு வராது. உடுத்தவும் முடியாமல், ஒதுக்கவும் முடியாமல் வெறும் நினைவுச் சின்னங்களாக மூலையில் உறங்கும் அத்தகைய சேலைகளை என்னதான் செய்வது?

‘‘பாலீஷ் போட்டால் புதுப்புடவை மாதிரிப் பளபளக்கும்’’ என்கிறார் சென்னையைச் சேர்ந்த கனகவல்லி. 12 வருடங்களுக்கும் மேலாக பட்டுப்புடவை பாலீஷ் பிசினஸில் கொடிகட்டிப் பறப்பவர்!

‘‘நான் பிசினஸ் ஆரம்பிச்ச புதுசுல, பட்டுப்புடவைக்கு பாலீஷ் போட்டுப் புதுசாக்கலாம், தொய்வடைஞ்ச புடவைகளை சரியாக்கலாம்னு சொன்னா யாரும் நம்ப மாட்டாங்க.

பட்டாச்சே… வீணாக்கிடுவாங்களோ, தூக்கிட்டு ஓடிருவாங்களோன்னு பயந்து புடவையைக் கொடுக்க மாட்டாங்க. ரொம்பக் கஷ்டப்பட்டுப் பேசிப் புரிய வச்சுதான், என் பிசினஸை வளர்த்தேன். இன்னிக்கு வெளியூர்லருந்தெல்லாம் பாலீஷுக்கு புடவைகளை ஆர்டர் எடுக்கற அளவுக்கு இந்த பிசினஸ் என்னை பிசியா வச்சிருக்கு” என்கிற கனகவல்லி, பட்டுப்புடவைகளுக்கு பாலீஷ் போடுவது மட்டுமின்றி, நைந்து போன பார்டர்களை மாற்றித் தருவது, கறைகளை நீக்குவது, கிழிந்த பகுதிகளை சரி செய்வது போன்றவற்றுடன்,  காட்டன் புடவைகளுக்கு கஞ்சி போட்டு, ரோல் பிரஸ்ஸும் செய்து தருகிறார்.

****

Image

இது இப்படித்தான்!

மூலப் பொருள்கள்

இரும்புக் கம்பிகள் 70 இன்ச் நீளத்தில் 6, 72 இன்ச் அகலத்தில் 6, புடவைக்குள் செருகும் மெல்லிய கம்பிகள் 40, புடவை மடிக்கும் கம்பி 3, ரோலர் கட்டைகள் வட்ட வடிவில் 5, சதுரத்தில் 5, பாலீஷ் பசை, காட்டன் நூல், வெள்ளை அல்லது பிளெயின் புடவை, கிளீனிங் லிக்விட்.

எங்கே வாங்கலாம்?

கம்பிகளை வெல்டிங் கடைகளிலும், கட்டைகளை தச்சர்களிடம் ஆர்டர் கொடுத்தும், மற்ற பொருள்களை பட்டு நெசவுக்குத் தேவையான பொருள்கள் விற்பனை செய்கிற கடைகளிலும் வாங்கலாம். காஞ்சிபுரம், ஆரணி, கும்பகோணம் பகுதிகளில் சுலபமாகக் கிடைக்கும். ஏற்கனவே பட்டு பாலீஷ் துறையில் உள்ளவர்களிடம் சொல்லி வைத்தும், மொத்த விலையில் வாங்கலாம்.

முதலீடு

கம்பிகள் மற்றும் ரோலர்களுக்கு சேர்த்து 25 ஆயிரம். பாலீஷ் பசை, ஒரு கிலோ 100 ரூபாய். ஒரு புடவைக்கு 20 கிராம் தேவை. கிளினீங் லிக்விட் 350 ரூபாய்.

இட வசதி?

10க்கு 10 அளவுள்ள அறை போதும். அது தவிர, பாலீஷ் செய்த புடவையை உலர்த்தும் அளவுக்கு மொட்டை மாடியோ, பால்கனியோ அவசியம்.

எந்தெந்தப் புடவைகளுக்கு பாலீஷ் செய்யலாம்?

பட்டு, மைசூர் சில்க், டிசைனர் சேலைகளுக்கு பாலீஷ் செய்து, புதுப் பொலிவு பெறச் செய்யலாம். காட்டன் சேலைகளாக இருந்தால், கஞ்சி போட்டு, ரோல் பிரஸ் செய்து கொடுக்கலாம். ரோல் பிரஸ் செய்வதன் மூலம், காட்டன் சேலைகளில், இஸ்திரி செய்ததைவிட மூன்று மடங்கு மெருகேறும். சிறிய சுருக்கம் கூட இருக்காது. 25 வருடங்கள் ஆன பட்டுப்புடவைகளுக்குக் கூட பாலீஷ் போட்டு, புதிது போல மாற்றலாம். புடவை நைந்து போகாமல், நல்ல நிலையில் இருக்க வேண்டியது மட்டும் அவசியம்.

மாத வருமானம்?

ஒரு பட்டுப்புடவையை உலர் சலவை (ட்ரை வாஷ்) செய்து, பாலீஷ் போட்டுக் கொடுக்க புடவையைப் பொறுத்து 150 ரூபாய் முதல் 450 ரூபாய் வரை வாங்கலாம். சிலர் புடவையைத் தண்ணீரில் நனைத்துத் துவைத்துக் கொடுக்கச் சொல்லிக் கேட்பதுண்டு. அதற்குக் கூடுதலாக 50 ரூபாய். நமக்கு ஒரு புடவைக்கான செலவு வெறும் 30 ரூபாய். காட்டன் சேலைக்கு கஞ்சி போட்டு, ரோல் பிரெஸ் செய்து கொடுக்க 35 ரூபாய் வாங்கலாம். நமக்கான அடக்க விலை 25 ரூபாய்.

ஒரு நாளைக்கு 10 புடவைகளுக்கு பாலீஷ் போட முடியும். அப்படிப் பார்த்தால் மாதம் 20 ஆயிரம் சம்பாதிக்கலாம்.

மார்க்கெட்டிங்?

பெண்கள் அதிகம் வேலை பார்க்கிற அரசாங்க அலுவலகங்கள், வங்கிகள், கல்லூரிகள் என எல்லா இடங்களிலும் நேரில் சென்று பேசி, ஆர்டர் பிடிக்கலாம். சேலையை வாங்கிச் செல்லவும், பாலீஷ் போட்ட பிறகு திரும்பக் கொண்டு சேர்க்கவும் ஒரு ஆளை வைத்திருப்பது நலம்.

பயிற்சி?

செயல்முறை விளக்கங்கள், மார்க்கெட்டிங் உத்திகள் என எல்லாவற்றுக்கும் சேர்த்து 3 நாள் பயிற்சிக்குக் கட்டணம் ரூ.5 ஆயிரம்.

****

புதுசுக்கும் போடலாம் பாலீஷ்!

Image

ழைய பட்டுப்புடவையை புதுசு போலாக்க பாலீஷ் செய்வது ஒரு பக்கமிருக்க, புத்தம் புதிய புடவைகளுக்கும் பாலீஷ் போடலாம் என்கிறார் இந்தத் துறையில் 45 வருட அனுபவமுள்ள, கும்பகோணத்தைச் சேர்ந்த சாந்தாராம்.

‘‘பட்டுப்புடவை வியாபாரம் பண்றவங்க, மொத்தமா பதினஞ்சு, இருபது புடவைகளைக் கொண்டு போவாங்க. வாடிக்கையாளர்களுக்குப் பிரிச்சுக் காட்டி, திரும்ப மடிச்சு வைக்கிறதுல, சில புடவைகள் அழுக்காகி, கசங்கிப் போகும். அந்த மாதிரிப் புடவைகளுக்கும் பாலீஷ் போடலாம். அதனால புடவையோட தரத்துக்கு எந்த பாதிப்பும் வராது. கூடுதல் பளபளப்புதான் கிடைக்கும்” என்கிறவர், பட்டுப் பராமரிப்புக்கான டிப்ஸ்களையும் சொல்கிறார். 

* பட்டுப்புடவையின் உடல் பகுதியை இஸ்திரி பண்ணக் கூடாது. ஜரிகைப் பகுதியை மட்டும்தான் செய்ய வேண்டும்.  

* பட்டுப்புடவையை தாராளமாகத் துவைக்கலாம். புடவை ஒரு கலரிலும், பார்டர் ஒரு கலரிலும் இருந்தால், முந்தானையையும், பார்டரையும் ஒரு கயிற்றால் கட்டி, தண்ணீரில் படாமல், உடல் பகுதியை மட்டும் பூந்திக்கொட்டை ஊற வைத்த தண்ணீரில் நனைத்துத் துவைக்கலாம். பிறகு அதைக் காய வைத்து, அடுத்து பார்டர், முந்தானைப் பகுதிகளை வேறு தண்ணீரில் தனியே துவைத்து உலர்த்த வேண்டும்.

* பட்டைத் துவைக்காமலோ, பாலீஷ் போடாமலோ அப்படியே உடுத்தினால், வியர்வை பட்டு, அதிலுள்ள உப்பு, ஜரிகைப் பகுதியை அரித்து விடும்.

– ஆர்.வைதேகி

படங்கள்: ஆர்.சி.எஸ்.

கனகவல்லி தொலைபேசி எண்: 9445283994.

6 மாதக் குழந்தை முதல் 60 வயது தாத்தா-பாட்டி வரை எல்லோரும் செய்யலாம் மாடலிங்!

Image

Gisele Bündchen – உலகிலேயே மிக அதிக பணம் சம்பாதிக்கும் மாடல்!

“பணக்காரங்க, ரொம்ப அழகா இருக்கிறவங்க, பொழுது போகாதவங்க… இவங்கதான் மாடலிங் துறைக்கு வரலாங்கிற நிலைமை இன்னிக்கு இல்லை. ஓரளவு அழகும், நிறைய தன்னம்பிக்கையும் இருக்கிற யாரும் மாடலிங் துறைக்கு வரலாம். டாக்டர், வக்கீல்னு வேற துறைகள்ல பிசியா இருக்கிற எத்தனையோ பேர் மாடலிங்கும் பண்ணிட்டிருக்காங்க. அந்தளவுக்கு கௌரவமான துறையா மாறிட்டு வருது இது” என்கிறார் சங்கீதா பாலன்.

Imageமாடலிங் கோ-ஆர்டினேட்டரான இவர், விளம்பரப் படங்கள், டி.வி சீரியல், சினிமா என எல்லாவற்றுக்கும் மாடல்களை ஏற்பாடு செய்து கொடுப்பவர். ’கோலங்கள்’ உள்ளிட்ட பல தொடர்களிலும், ‘காதலில் விழுந்தேன்’, ‘கற்றது தமிழ்’, ‘பேராண்மை’, ‘எந்திரன்’, ‘சுல்தான் தி வாரியர்’ எனப் படங்களிலும் இவரது மாடல்கள் முகம் காட்டியிருப்பது குறிப்பிடத்தக்கது. 6 மாதக் குழந்தை முதல் 60 வயது தாத்தா-பாட்டி வரை அனைத்து வயதினருக்கும் மாடலிங் உலகக் கதவுகள் விரியத் திறந்து வரவேற்பதாகச் சொல்கிறார் இவர்.

’’ஃபேஷன் டெக்னாலஜி முடிச்சிட்டு, அந்தத் துறைல இருந்தேன். அப்ப ஃபேஷன் ஷோ, ராம்ப் வாக்னு நிறைய நிகழ்ச்சிகளுக்குப் போவேன். மாடல்களோட அறிமுகம் கிடைச்சது. ஒரு டிரெட்மில் விளம்பரத்துக்காக மாடல் தேவைப்பட்டப்ப, யதேச்சையா ஒரு நிறுவனம் என்கிட்ட, ’மாடல் யாராவது கிடைப்பாங்களா’னு கேட்டாங்க. எனக்குத் தெரிஞ்ச ஒரு பெண்ணை அவங்களுக்கு அறிமுகப்படுத்தி வச்சேன். அப்படியே அடுத்தடுத்து பலரும் கேட்க ஆரம்பிச்சாங்க. அப்படித்தான் மாடலிங் கோ-ஆர்டினேட்டரானேன். பத்து வருஷத்துக்கு மேலே பண்ணிட்டிருக்கேன். நான் அறிமுகப்படுத்தின எத்தனையோ மாடல்கள் சீரியல், சினிமானு கலக்கிட்டிருக்காங்க.

Image

’மாடலிங்னா ஆபத்தான துறை, பெண்களுக்கு ஏற்றதில்லை’ங்கிற நிலை, சில வருஷங்களுக்கு முன்னாடி வரை இருந்தது. இன்னிக்கு அதைப் போல டீசன்ட்டான துறை வேற இல்லைனு சொல்லலாம்! அழகு இங்கே ரெண்டாம்பட்சம்தான். இனிமையான பேச்சும் தைரியமும்தான் மூலதனம். தயக்கமோ, பயமோ கூடாது. மத்தபடி எந்த வயசுலயும், யாரும் மாடலாகலாம். டாக்டர், வக்கீல்னு பலரையும் மாடலாக்கின அனுபவம் எனக்கிருக்கு. இவ்வளவு ஏன்? நிறைய ஹவுஸ் ஒயிஃப் மாடலிங் பண்ண விரும்பி வராங்க. பணம், புகழ்னு எல்லாம் கொடுக்கிற துறை இது” என்கிறவர், மாடலிங் செய்ய விரும்புவோருக்கான வழிமுறைகளைப் பட்டியலிடுகிறார்.

“போர்ட்ஃபோலியோனு சொல்ற போட்டோஸ் ரொம்ப முக்கியம். அவங்கவங்க வசதியைப் பொறுத்து 1500 ரூபாய்லேர்ந்து, 40 ஆயிரம் வரை கூட இதுக்கு செலவு பண்ணலாம். மாடலிங் கோ-ஆர்டினேட்டரை அணுகினா போர்ட்ஃபோலியோ எடுக்கிறதுலேர்ந்து, வாய்ப்பு வாங்கிக் கொடுத்து, சம்பளம் கைக்கு வர்றது வரை எல்லாத்தையும் அவங்களே பார்த்துப்பாங்க. சராசரியா பொண்ணுங்களுக்கு ஒரு வாய்ப்புக்கு 7500 ரூபாய்லேர்ந்து 10 ஆயிரம் வரைக்கும், பசங்களுக்கு 5 ஆயிரம் ரூபாயும், குழந்தைங்களுக்கு 3500 ரூபாயும் சம்பளம் கிடைக்கும். அதுல ஒரு சிறிய தொகையை மாடலிங் கோ-ஆர்டினேட்டரோட கமிஷனா கொடுக்க வேண்டியிருக்கும்.

Image

தேவை என்னனு தெரிஞ்சு வர்றவங்களுக்கு இதுல வாய்ப்புகள் அதிகம். உதாரணத்துக்கு சிலர் வெறும் விளம்பரங்கள்ல மட்டும் வந்தா போதும்னு நினைப்பாங்க. படிக்கிற பிள்ளைங்க, ஸ்கூல், காலேஜுக்கு லீவு போட முடியாது, அதுக்கேத்தபடியான வாய்ப்புகளா கொடுங்கனு கேட்பாங்க. வெளியூரெல்லாம் போகத் தயாரா இருக்கிறவங்களுக்கு சினிமா ஓ.கே. இப்படி விருப்பத்துக்கும் வசதிக்கும் ஏத்தபடியான வாய்ப்புகளை தேடிக்கலாம்’’ என்கிறார் சங்கீதா.

(தொடர்புக்கு: 99414 81483)

–  ஆர். வைதேகி